Nɔnaar daka la yɛla
37
1 Ka Bezalel da nɔk na'aziinr daadi maal daka ka li wa'alim an wʋʋ nɔba makir anaasi ka li yalʋŋ na an nɔba makir ayi' nɛ bi'ela ka li dʋʋb an wʋʋ nɔba makir ayi' nɛ bi'ela mɛn, 2 ka nɔk sanlima bʋligi li pʋʋgin nɛ li nya'aŋ la wʋsa ka maali kuoɛn dɔlis nɔya la. 3 Ka maal sanlima baans anaasi ka lɔɔ ba yinne-yinne tabil daka la nɔba anaasi la ni. 4 Ka nɔk na'aziinr daad ayi' ka nɔk sanlima bʋligi ba. 5 Ka o nɔk daug yinne wʋsa tʋ baans ayi' la pʋʋgin, dinɛ na kɛ ka ba nyaŋi gban'e daad la ʋk daka la mɔri keŋ. 6 Ka o nɔk sanlima maal suguru sɔsʋg liŋe pibil daka la nɔɔr ka li pa'an Wina'am mɔr suguru nɛ ba si'em. Ka li wa'alim an wʋʋ nɔba makir anaasi, ka li yalʋŋ an nɔba makir ayi' nɛ bi'ela. 7 Ka o nɔk sanlima zan' maal Kerubnam ayi' la ka ba zi'e liŋ la zug. 8 Ka kɛ ka yinne zi'e daka la liŋ la datiuŋ, ka yinne mɛ zi'e li dagɔbʋg, ka ban nɛ liŋ la wʋsa an sanlim yinne. 9 Ka Kerubnam la kpa' taaba n sʋnri gɔt daka la, ka ba kpʋkpama la yadig ka ba ma'asim pil liŋ la.Sanlima teebul la yɛla
10 Ka Bezalel nɔk na'aziinr daugʋ maal teebul, ka li wa'alim an wʋʋ nɔba makir atan', ka li yalʋŋ an nɔbir makir yinne nɛ pʋsʋk ka li dʋʋb an wʋʋ nɔba makir ayi' nɛ bi'ela. 11 Ka o nɔk sanlima maali dɔlis nɔya la wʋsa, ka bʋligi li pʋʋgin nɛ li nya'aŋ la wʋsa nɛ sanlima. 12 Ba daa nɔk dabibisi tabili gilig teebul la ka ba wa'alim an wʋʋ nu'ug yalʋŋ nɛ, ka nɔk sanlima bʋligi ba wʋsa. 13 Ka o maal sanlima baans anaasi ka lɔɔ ba yinne-yinne tabil teebul la nɔba anaasi la ni. 14 Baans la da kpi'enɛ dabibis banɛ gilig daka la, ka li kɛ ka ba na tun'e tʋʋdi ʋkid teebul la mɔri ken. 15 Ka o nɔk na'aziinr daad ka bʋligi ba nɛ sanlima ye ba mɔri ʋgisid teebul la ken. 16 Ka ba nɔk sanlima maal laas nɛ dʋgid nɛ bʋtiis la wʋsa, ka ba na mɔri maan bʋnnuuda maana.
Fita zi'esir la yɛla
17 Ka Bezalel da nɔk sanlima kʋnt fita zi'esir ka nwɛ'-nwɛ' li ka li gbin an lammiri ka li teŋsʋk daug la an sappi. Fita la zi'esir nɛ li daug nɛ li bʋnvɛnla banɛ nwɛnɛ tipuum la wʋsa da anɛ yinne. 18 Ka fita zi'esir teŋsʋk daug la mɔr wila ayuobʋ. Atan' da bɛnɛ lʋgir yinne ka atan' mɛ bɛ lʋgir yinne. 19 Ka wil wʋsa mɔr bʋnam ka li nwɛnɛ tipuum nɛ bɛɛ li vaandin la. Wila ayuobʋ la wʋsa daa anɛ ala. 20 Ka fita zi'esir la teŋsʋk daug la mɛ mɔr puum nɛ vaand anaasi nwɛnɛ bama la. 21 Dutir da bɛ zin'ikanɛ ka wila ayi' wɛligid. Ayinne da bɛ yiiga wil la wɛligid si'el la, ka yinne bɛ linɛ paas ayi' la ni ka yinne bɛ linɛ paas atan' la ni. 22 Ka ba nɔk sanlim yinne maal fita zi'esir la, nɛ li wila nɛ li puum nɛ vaand la wʋsa. 23 Ka ba daa maal kpaam fita ayɔpɔi nɛ sanlima ka maal ma'adiŋ kanɛ ka ba na mɔri zin'ed lauŋʋ la nɛ tampɛligim laas. 24 Ba daa nɔknɛ sanlim gbila pisyuobʋ nɛ anii maal fita zi'esir la nɛ li la'abanɛ paas la.
Bʋnyubisa Maan Daka la yɛla
25 Ka Bezalel nɔk na'aziinr daadi maal daka kanɛ ka ba nyu'od tudaari li ni la, ka ba wa'alim nɛ yalʋŋ zem taaba ka an nɔbir makir ayinne nɛ pʋsʋk, ka li dʋʋ gaadi li wa'alim la nɔɔr ayi'; ka li gʋʋdis duoe agɔla nwɛnɛ iila nɛ. 26 Ka o nɔk sanlima bʋligi li zug nɛ li lʋga anaasi la nɛ li iila la wʋsa. Ka nɔk sanlim kuoɛn giligi li nɔɔr la wʋʋ nwiig nɛ. 27-28 Ka maal na'aziinr daad ka nɔk sanlima maali kuaki ba. Ka maal sanlima baans anaasi tabil maan daka lʋga anaasi la. Baans la sʋm ye ba gɛɛl daad la, ka na nyaŋi zanl dabanɛ ka ba nɔkidi ziid maan daka la. 29 Bezalel da maal bʋnnyubisa nɛ malʋŋ kpasʋŋ linɛ an Wina'am din ka ba mɔri kpa'adi niŋid maanmaan zug la, nɛ tudaari zɔm linɛ nyuugʋ malis.