Nyu'or maan daka nɛ li laa la yɛla
38
1 Ba da lɛn nɔk na'aziinr daadi maal nyu'or maan daka ka li wa'alim nɛ li yalʋŋ zem taaba ka an nɔba makir ayɔpɔi nɛ pʋsʋk, ka li dʋʋb mɛ an nɔba makir anu nɛ pʋsʋk. 2 Ba daa maal gʋʋdiŋ ka li duoe gɔla nwɛnɛ iila nɛ maan daka la kpikpɛmis anaasi la ni ka iila la nɛ maan daka an yinne. Ka nɔk kʋntzɛn'ugʋ bʋligi li wʋsa. 3 Ba daa nɔk kʋntzɛn'ugʋ maali li la'ad la wʋsa; dʋgid banɛ ka ba mɔri vaad tampɛligim nɛ soobulnam nɛ labanɛ ka ba mɔri misid nɛ linɛ ka ba mɔri lɛbigid ni'im nɛ ban mɔr si'eli vaad bugum saanna la. 4-5 Ka nɔk kʋntzɛn'ugʋ maal bʋn linɛ nwɛnɛ ziiŋ-ɔɔnliŋ nɛ, ka maal kʋnt baansi tabili li lɔdis anaasi la wʋsa, ka nɔki sa'al maan daka la pʋʋgin, ka li ziiŋ-ɔɔnliŋ la sigi paae li pʋsʋk. 6 Ka o maal na'aziinr daad, ka nɔk kʋntzɛn'ugʋ bʋligi ba, 7 ka nɔk daad la tʋ baans la pʋʋgin ka ba na bɛ maan daka la lʋga ayi' ni. Dinɛ na kɛ ka ba nyaŋidi gban'e daad la ʋk maan daka la mɔri ken. O nɔk dalamma maal maan daka la ka li pʋʋgin an vɔɔsʋm.8 Ka o di'e gɔtis pu'a banɛ tʋm pʋ'ʋsim Fuug Sʋgʋr za'anɔɔrin la ka nɔki li kʋntzɛn'ug la maal latita'ar nɛ li zi'esir.
Fuug Sʋgʋr la zak yɛla
9 Ka Bezalel da maal Fuug Sʋgʋr la zak ka li dagɔbʋg baba wa'alim la an wʋʋ nɔba makir kɔbiga nɛ pisnu, ka maal fupielsʋŋʋ bɛŋi li, 10 ka nɔk daad pisi, ka maal zi'esa tʋʋ ba' ka ba zi'e sappi, amaa ka li kpa'as nɛ baans la an anzurifa; 11 ka li datiuŋ baba la wa'alim mɛ da an nɔba makir kɔbiga nɛ pisnu, nɛ li kʋntzɛn'ug daad pisi banɛ an sappi, nɛ ba zi'esa nɛ li anzurifa kpa'as nɛ baans; 12 ka li tuon baba yalʋŋ la an nɔba makir pisyɔpɔi nɛ anu, ka maal fuud bɛŋir ka li mɔr daad kanɛ zi'e sappi nɛ anzurifa zi'esa piig-piig; 13 ka li zin'ikanɛ kpa' winnigi tansid zin'isi'a la yalʋŋ an nɔba makir pisyɔpɔi nɛ anu, 14-15 Ba da nɔk fupielsʋŋ linɛ yalʋŋʋ an nɔba makir pisi nɛ ayi' nɛ pʋsʋkʋ yul daad atan' la nɛ ba zi'esa la bɛ zin'ikanɛ ka ba dɔlli kpɛn'ɛd zakin la luaa yinne ka mɛ niŋ ala lɔ zin'ikaŋa la mɛn. 16 O da nɔk fupiel sʋŋ hali maal zak la fuud la wʋsa mɛn. 17 Dabanɛ an sappi la zi'esa wʋsa da anɛ kʋntzɛn'ug ka li kpa'as nɛ baans la da anɛ anzurifa, ka ba nɔk anzurifa bʋligi ba zut; alazug, dabanɛ zi'e sappi gilig zak la wʋsa da mɔri anzurifa baans. 18 O da nɔk fuug linɛ an sʋ'ʋŋa ka an bʋlʋ nɛ pipɛl-zɛn'ug nɛ bʋnzɛn'is nɛ fupieligi sɛɛn sɛn ka li vɛnl, ka ba na zaŋi ligil Fuug Sʋgʋr la za'anɔɔr. Li yalʋŋ anɛ nɔba makir pistan', ka li wa'alim an wʋʋ fubanɛ gilig zak la nɛ, 19 ka mɔr dabanɛ an sappi anaasi ka ba mɔr kʋntzɛn'ug zi'esa anaasi. Ka nɔk anzurifa maali li baans nɛ kpa'as la, ka bʋligi ba zut nɛ ba baans la wʋsa nɛ anzurifa. 20 O da nɔk kʋntzɛn'ugʋ maal kpada banɛ na gban'e Fuug Sʋgʋr nɛ zak la fuud la wʋsa kiŋ-kiŋ.
La'ad banɛ ka ba maal Fuug Sʋgʋr la yɛla
21 Moses da yɛl maanmaannib la ye ba kaalim la'ad la, ka Aaron biig Itamar da sʋ'oe Levi dim banɛ da kaal la'ad la.
Ban da nɔk la'adi maal la'asʋg Fuug Sʋgʋr la wʋsa yɛla nwana: 22 Bezalel onɛ an Hur yaaŋ, Uri biig, ka an Juda dɔɔg nid la da sʋ'oe tʋʋma la wʋʋ Wina'am n pa'al Moses si'em la; 23 ka Akisamak biig Oholiyab onɛ yi Dan tuŋʋn na la da sʋŋid o, ka an onɛ kpi'ed daad nɛ kuga, ka mi' la'ad la na gʋl si'em, ka lɛn nɔk gum dinɛ an bʋlʋ nɛ bʋnsʋma dinɛ mu'oe zim-zim, nɛ bʋnzɛn'is, nɛ pien piela sɛɛn, sɛn ka fuud la vɛnl.
24 Ka nidib la mɔr sanlima na ka li tɛbisim makir an wʋʋ bʋntɛbisa pisi nɛ awai, nɛ linɛ pʋ tɛbis la kɔbisyɔpɔi nɛ pistan' (ba da maki tɛbisim ka li dɔl nɛ Wina'am Fuug Sʋgʋr makir). Ba da nɔk sanlima la wʋsa tʋm Fuug Sʋgʋr la tʋʋma naae. 25 Ka anzurifa linɛ ka ba da mɔr la na tɛbisim da anɛ kɔbiga, nɛ linɛ tɛbisim pʋ paae makir la tusir nɛ kɔbisyɔpɔi nɛ pisyɔpɔi nɛ anu (1,775) (ba da mak tɛbisim la ka li dɔl nɛ Wina'am Fuug Sʋgʋr makir).
Ba da di'e nɛ'ɛnam wʋsa nidib la san'an ban da kaali ba yʋda naae la. 26 Ba ya'a da kaal sɔ' wʋsa o da tisidi la'abielif linɛ buon bɛka (ba da maki li tɛbisim ka li dɔl nɛ Wina'am Fuug Sʋgʋr makir), ka ba da kaal banɛ an yʋma piswai la, ka ba an dap tusa kɔbisyuobʋ nɛ atan' nɛ kɔbisnu nɛ pisnu (603,550). 27 Anzurifa gbila tusa yuobʋ nɛ kɔbisnii ka ba da nɔki maal Fuug Sʋgʋr nɛ fugɔbʋg la zi'esa kɔbiga linɛ sʋŋi gban'e Fuug Sʋgʋr la kiŋ-kiŋ. 28 Ka anzurifa linɛ kpɛlim la ka ba da nɔki maal kpa'as nɛ baansi ga'al daad banɛ zi'e sappi la, ka bʋligi ba zut. 29 Ka nidib la lɛm mɔr kʋntzɛn'ug gbila tusa anaasi nɛ kɔbisnii na 30 ka ba nɔki maal dazi'edis banɛ bɛ za'anɔɔrin la, ka lɛn maal maan daka la nɛ li bʋn linɛ nwɛnɛ ziiŋ-ɔɔnliŋ la, nɛ li la'ad la wʋsa. 31 Ba da lɛm maal zi'esa linɛ ba'a daad banɛ gu'ud fubanɛ gilig zak la, nɛ banɛ bɛɛ li za'anɔɔrin la, nɛ kpada banɛ gban'e fuud la gilig wʋsa kiŋ-kiŋ.