Maanmaannib fuud maalʋg yɛla
39
1 Ba da nɔk gum dinɛ an bʋlʋ nɛ pipɛl-zɛn'ug nɛ bʋnzɛn'isi sɛn tis maanmaannib la, ye ba ya'a ti kpɛn' Fuug Sʋgʋrin la tʋmmi ba tʋʋma ba na yɛ fuud nwa. Ba mɛ da maal fubanɛ bɛɛ li kɔn' tis Aaron wʋʋ Zugsɔb la yɛl Moses si'em la.2 Ba da nɔk sanlima gum nɛ gum linɛ an bʋlʋ nɛ pipɛl-zɛn'ug nɛ bʋnzɛn'is nɛ fupiel sʋŋʋ sɛn dansik la. 3 Ka banɛ mi' sanlima tʋʋma la nɔk sanlima la zan' nwaasi maal wʋʋ gum nɛ nɔki tabil gum dinɛ an bʋlʋ nɛ pipɛl-zɛn'ug nɛ bʋnzɛn'is nɛ pien piela. 4 Ka ba maal lɔɔdis ayi' sɛɛn tabil dansik la ban'ad la zug, ka ba tun'e lɔɔd taaba. 5 Ka nɔk sanlima nɛ gum dinɛ an bʋlʋ nɛ gum pipɛl-zɛn'ug nɛ bʋnzɛn'isi ʋk sɛnbidiŋ ka din nɛ dansik la an yinne nwɛnɛ Zugsɔb la tisi ba nɔɔr si'em la. 6 Ka ba maal kugvɛnla ayi' banɛ ka ba nɔk sanlima dɔlisi li nɔya la ka li gban'e nwɛnɛ nu'ubibis nɛ, ka sɔb Israel biribis la yʋda niŋ anina. 7 Ka ba nɔki lii tabil dansik la ban'ad la zug, ka ba an kugbanɛ na tɛɛnsid Israel biribis nwɛnɛ Zugsɔb la tis Moses nɔɔr si'em la.
8 Ka onɛ mi' sɛɛnb sʋŋa nɔk sanlima, nɛ gum dinɛ an bʋlʋ nɛ pipɛl-zɛn'ug nɛ bʋnzɛn'is nɛ fupiel sʋŋʋ sɛɛn maal linɛ lɔɔdi tabin maanmaan fuug nyɔ'ɔgin la, ka li pien la an linɛ ka ba nɔki sɛn dansik la nɔɔ. 9 Li da kpilimnɛ abʋyi' ka li wa'alim nɛ li yalʋŋ zem taaba, ka li makir an wʋʋ hakir-hakir nɛ. 10 Ba da nɔk kugvɛnla pii nɛ ayi' sɛɛn tabili li, abʋtan' tan', zin'is anaasi. Atan' banɛ bɛɛ agɔl la anɛ kanelian nɛ kirisolat nɛ emeral, 11 ka kugvɛnla banɛ tia'al mɛ an takuos nɛ safir nɛ bʋmpielig, 12 ka banɛ paas atan' la an yasin nɛ agat nɛ ametis, 13 ka banɛ paas anaasi la an bɛril nɛ onik nɛ jaspa. Ba da maal sanlima bʋnkanɛ na nyaŋi gban'e kuga la nɔya. 14 Kuga pii nɛ ayi' nwa zug, ba da sɔb Israel biis pii nɛ ayi' la yʋda yinne-yinne, ka li pa'an Israel dim dɔɔd pii nɛ ayi' la wʋsa yɛla. 15 Ka ba maal sanlima zɔnt banɛ nwɛnɛ nwiis nɛ niŋ linɛ lɔɔd nyɔ'ɔgin la. 16 Ba da maal sanlima baans ayi' nɛ sanlima bʋnama ayi' ka ba nwɛnɛ nu'ubibis nɛ gban'e kuga. Ka zaŋ baans la lɔ nyɔ'ɔgin fuug la nɔya ayi' la ni. 17 Ba da nɔk sanlima nwiis ayi' la lɔ baansin banɛ bɛ dinɛ lɔɔd nyɔ'ɔgin nɔya ni 18 ka ba gaadi paae lɔ baans banɛ bɛ dansikin la, ka li kɛ ka li tabil dansik la kpʋkpama tuon zin'is; 19 Ba da maal sanlima baans ayi' niŋ fukanɛ lɔɔd nyɔ'ɔgin la lʋga ayi' ka li gban'e li teŋir nɔɔr la ka tabil dansik la. 20 Ba da maal sanlima baans ayi' ya'asi sɛɛn tabil dansik la biankimpiiung teŋir ka li kpi'e dansik la sɛnbidiŋ lɛbisid zugin. 21 Ba da nɔk gum kanɛ an bʋlʋ n lɔ baans banɛ bɛ nyɔ'ɔgin la ken tabil nɛ baans banɛ bɛ dansik la ni n tɔ'ɔŋ nɛ sɛnbidiŋ la, ka li kɛ ka nyɔ'ɔgin pien la kʋ yi ka bas dansik la, wʋʋ Zugsɔb la da pa'al Moses si'em la.
22 Ba da nɔk pien kanɛ an bʋlʋ sɛn dansik la, 23 ka maal vɔɔnr fuug la teŋsʋk ka zug na nyaŋi kpɛn'; ka nɔk gumme kpamisi giligi li, dinɛ na kɛ ka li kʋ aaɛn. 24 Ka ba nɔk gum banɛ an bʋlʋ nɛ pipɛl-zɛn'ug nɛ bʋnzɛn'is nɛ pien pielsʋŋ linɛ ka ba pan'am maal tiwal kanɛ ka ba buon pomanganɛt la. 25 Ka maal sanlima lʋmma lɔ fuug la nɔɔrin lʋʋm pomanganɛt la. 26 Lʋmma la nɛ pomanganɛt la da lʋʋm nɛ taaba fukanɛ ka ba yɛɛdi maan maana la teŋir nwɛnɛ Zugsɔb la zi'el Moses si'em la.
27 Banɛ mi' fuud sɛɛnb sʋŋa da nɔk pien pieli sɛn fuudi tis Aaron nɛ o biis la mɛn, 28 nɛ zupibis ka nɔk pien piel sʋma sɛɛn ba kurgimis, 29 ka nɔk gum dinɛ an bʋlʋ nɛ pipɛl-zɛn'ug nɛ bʋnzɛn'is nɛ pien piela la ka li vɛnl hali sɛn sɛnbidiŋ ka nwɛ' li nɛ gum ka li vɛnl. Ka maanmaannib fuud la an wʋʋ Zugsɔb la yɛl Moses si'em la.
30 Ka o nɔk sanlimmɛŋiri maal bʋngbilig wʋʋ tipuum nɛ, ka sɔbi niŋ ye, “Li anɛ KASI TIS Zugsɔb” la, 31 ka nɔk gum dinɛ an bʋlʋ lɔɔ li tabil maanmaan zupibig la tuon. Ka zupibig nɛ li sanlima bʋmbil la an wʋʋ Zugsɔb la yɛl Moses si'em la.
Tʋʋma la naar yɛla
32 Ala ka ba da ti'eb la'abanɛ na maal Fuug Sʋgʋr kanɛ ka ba La'asid anina la nɛ li malima la'ad la wʋsa naae, ka Israel dim maali li wʋsa wʋʋ Zugsɔb la yɛl Moses si'em la. 33 Ka ba yʋ'ʋn mɔr Fuug Sʋgʋr la na pa'al Moses nɛ fuud linɛ ligin nɛ la nɛ di la'ad wʋsa nɛ di ga'adiŋgɔnlima nɛ dalamma nɛ dapuuda banɛ wa'am nɛ dabanɛ zi'e sappi nɛ zi'esa; 34 nɛ pɛraad gbana dinɛ ka ba mɔ'ɔnsi li ka di mu'oe la; linɛ na pili paas, nɛ gbansʋma linɛ na pili tak, nɛ fugɔbʋg linɛ na ya'ali lusi bɛŋid Fuug Sʋgʋr la; 35 nɛ Nɔnaar Daka la nɛ li daad nɛ li suguru sɔsʋg liŋ la; 36 nɛ teebul la nɛ li la'ad la wʋsa, nɛ bodobodo linɛ pa'annɛ li zug Zugsɔb tuon daar woo; 37 nɛ fita zi'esir ka fita la bɛɛ li zug, nɛ li la'ad la wʋsa, nɛ kpaam linɛ na nyu'od bugum; 38 nɛ sanlima maan daka, nɛ malʋŋ kpaam nɛ tudaar zɔm dinɛ nyuugʋ malis, nɛ fuug linɛ na ya'ali lus Fuug Sʋgʋr la za'anɔɔr la; 39 nɛ kʋntzɛn'ug maan daka nɛ li bʋn linɛ nwɛnɛ ziiŋ-ɔɔnliŋ la, nɛ li daad nɛ li la'ad la wʋsa; nɛ latita'ar la nɛ li zi'esir; 40 nɛ fubanɛ ya'ali gilig zak la, nɛ li dabanɛ zi'e sappi la nɛ zi'esa nɛ fuug linɛ na ya'ali lusi li za'anɔɔr la, nɛ li nwiis, nɛ kpa'as; nɛ la'ad wʋsa banɛ ka ba na mɔri tʋm Fuug Sʋgʋr la tʋʋma nɛ Fuug Sʋgʋr kanɛ ka ba La'asid anina tʋm tʋʋma wʋsa; 41 nɛ maanmaannib fubanɛ vɛnl hali ka ba yɛɛdi tʋm kasi zin'ig la tʋʋma; nɛ fubanɛ na tis Aaron nɛ o biis banɛ an maanmaannib la. 42 Israel dim sid da tʋmi li wʋsa naae wʋʋ Zugsɔb la yɛl Moses si'em la kiapi. 43 Ka Moses da nyɛ ka ba tʋm naae wʋʋ Zugsɔb la yɛl si'em la, ka kaanb, kaanb sʋŋʋ tisi ba.