Fuug Sʋgʋr la ti'ib yɛla
40
1 Ka Zugsɔb yɛl Moses ye, 2 “Nɔkim Fuug Sʋgʋr la ti' pin'ilʋg nwadig la, li yiiga dabisir la ni, ka li na an nidib la la'asʋg zin'ig. 3 Nɔkim Nɔnaar Daka la niŋ Fuug Sʋgʋr la pʋʋgin, ka nɔk fuug la lus daka la. 4 Mɔr teebul la na ka nɔk linɛ wʋsa nar ye li bɛɛ li zugin la pa'al nwɛnɛ lin nar si'em; ka mɔr fita zi'esir la na, ka mɛ nɔki li fita la sʋn'ʋl li zug. 5 Nɔkim sanlima maan daka kanɛ ka ba na nyu'od tudaari li zug la mɔr na, ka li na zi'e Nɔnaar Daka la tuon. Ka nɔk fugɔbʋg linɛ bɛŋid la ya'ali lus Fuug Sʋgʋr la za'anɔɔr. 6 Nɔkim maan daka kanɛ ka ba na nyu'od malima li zug la mɔr na zi'el Fuug Sʋgʋr la za'anɔɔr tuon. 7 Nɔkim laa la mɔr na zi'el Fuug Sʋgʋr la nɛ maan daka la teŋsʋk, ka mɔr ku'om na niŋ. 8 Ti'im zak la gilig Fuug Sʋgʋr la, ka nɔk fuug la ya'ali gilig, ka nɔk fukanɛ lusid za'anɔɔr la ya'ali lus. 9 Nɔkim malʋŋ kpaam la bu'oe siɛn Fuug Sʋgʋr la nɛ linɛ bɛɛ li pʋʋgin wʋsa. Pɛsigimi li nɛ li la'ad wʋsa tis mam Zugsɔb ka li na an kasi. 10 Ka mɛ bu'oe malʋŋ kpaam la niŋ nyu'or maan daka la nɛ di la'ad la wʋsa ka li an kasi hali tis mam Zugsɔb. 11 Nɔkim malʋŋ kpaam la bu'oe niŋ laa la, nɛ linɛ ka li sʋn'e li zug la wʋsa, ka pɛsigi li tis mam Zugsɔb ka li an kasi. 12 Mɔr Aaron nɛ o biis la kɛn la'asʋg Fuug Sʋgʋr za'anɔɔrin la na, ka sʋʋ ba ku'om. 13 Nɔkim maanmaan fuud la yɛɛl Aaron ka nɔk malʋŋ kpaam bu'oe niŋ o ka pɛsig o tisim ka o an maanmaan, 14 ka lɛm mɔr o biis la na ka yɛɛli ba fupiela, 15 ka bu'oe malʋŋ kpaam niŋi ba ka ba lieb maanmaannib wʋʋ ba saam nɛ. Li na kɛ ka ba wʋsa an maanmaannib zʋmaan kanɛ na ti duoe na wʋsa.”16 Moses da maal si'el wʋsa nwɛnɛ Zugsɔb la yɛl o si'em la.
17 Ba da ti' Fuug Sʋgʋr la naae, yʋʋm kanɛ paas ayi' ban yi Egipt na la, li yiiga nwadig la pin'ilʋg daar. 18 Moses da ti' Fuug Sʋgʋr la, o da zaŋi li zi'esa la ba'a teŋ, ka nɔk dalamma banɛ wa'am la ba'a li ni; ka nɔk dapuuda la tʋ ka li gban'e kiŋ-kiŋ. Ka yʋ'ʋn ba' dazi'eda la. 19 Ka o nɔk fuug linɛ ka ba maal nɛ bʋʋs kɔnbid la pil Fuug Sʋgʋr la, ka yʋ'ʋn nɔk pɛraad gbana banɛ ka ba mɔ'ɔns ka li mu'oe wii la pili bʋʋl, nwɛnɛ Zugsɔb la pa'al o si'em la. 20 Ka o nɔk nɔzi'ela la niŋ Nɔnaar Daka la pʋʋgin ka zaŋi li dapuuda la tʋ baansin la, ka nɔki li suguru sɔsʋg liŋ la pibil. 21 Ka yʋ'ʋn nɔk Nɔnaar Daka la mɔri kpɛn' Fuug Sʋgʋr la pʋʋgin digil Kasi Wʋsa Kasi zin'igin la, ka nɔk fugɔbʋg linɛ bɛŋid la ya'ali lus Nɔnaar Daka la, wʋʋ Zugsɔb la yɛl o ye o niŋ si'em la. 22 Ka Moses nɔk teebul la kpɛn' zi'el Wina'am Zin'isʋŋ, Fuug Sʋgʋr la datiuŋ baba, ka li bɛ fugɔbʋg linɛ bɛŋid la nya'aŋ, 23 ka nɔk bodobodo la pa'ali li zug Zugsɔb la tuon, wʋʋ Zugsɔb la yɛl o ye o niŋ si'em la. 24 Ka mɛ nɔk fita zi'esir la kpɛn' zi'el Wina'am Zin'isʋŋ, Fuug Sʋgʋr la pʋʋgin, ka li kpi'e teebul la dagɔbʋg baba sa, 25 ka nɔki li fita la sʋn'ʋl zi'esir la zug, wʋʋ Zugsɔb la yɛl o si'em la. 26 O da nɔk sanlima maan daka linɛ nyu'od tudaar la kpɛn' zi'el Fuug Sʋgʋr la pʋʋgin, fugɔbʋg la nya'aŋ na, 27 ka yʋ'ʋn nɔk tudaar zɔm nyu'oe li zug, wʋʋ Zugsɔb la yɛl o ye o niŋ si'em la. 28 Ka nɔk fuug la lus La'asʋg Fuug Sʋgʋr la za'anɔɔr. 29 O da nɔk maan daka kanɛ ka ba nyu'od malima li zug la zi'eli kpi'el Fuug Sʋgʋr la za'anɔɔrin, ka maal nyu'or malʋŋ, ka mɛ lɛm maal zʋʋd maannɛ tis Zugsɔb la, nwɛnɛ Zugsɔb la pa'al Moses si'em la. 30 Ka o zaŋ latita'ar la zi'el La'asʋg Fuug Sʋgʋr la nɛ maan daka la teŋsʋk, ka wik ku'om kpa'ae niŋi li pʋʋgin ka li an ku'opiedim; 31 ka Moses, nɛ Aaron nɛ o biis la, piesidi ba nu'us nɛ ba nɔba. 32 Saŋkanɛ wʋsa ka ba kpɛn'ɛd La'asʋg Sʋgʋrin la, asɛɛ ba zi'enɛ pie ba nu'us nɛ nɔba nwɛnɛ Zugsɔb la pa'al Moses si'em la. 33 Ka Moses nɔk fuud la ya'ali geŋ zak la gilig Fuug Sʋgʋr nɛ maan daka la, ka nɔk fuug la lus za'anɔɔr linɛ kpɛn'ɛd zakin la yʋ'ʋn naae o tʋʋma la wʋsa.
Saŋgbauŋ nɛ Zugsɔb girima la yɛla
34 Ka saŋgbauŋ la sig na n ligil La'asʋg Fuug Sʋgʋr la, ka Zugsɔb girima nie nyɛɛn pil-pil Fuug Sʋgʋr la pʋʋgin wʋsa, 35 ka Moses pʋ nyaŋi kpɛn', saŋgbauŋ la nɛ Zugsɔb girima nɛɛsim la zug. 36 Saŋkanɛ ka saŋgbauŋ la ʋk ka bas Fuug Sʋgʋr la, Israel dim duodnɛ gban'e suori ken. 37 Amaa saŋkanɛ ka saŋgbauŋ la pʋ ʋkɛ, ba mɛ pʋ ken si'ela, hali nɛ li ʋkir saŋa ya'as. 38 Ala ka Zugsɔb la saŋgbauŋ da ligil Fuug Sʋgʋr la nintaŋ, ka yʋ'ʋŋ ka li an bugum niedi tisid Israel dim la ba ken wʋsa pʋʋgin.