Kum Maliak Gaadʋg malʋŋ
9
1 Zugsɔb la da pian' tis Moses Sinai mɔɔgin ban da yi Egipt la yʋma ayi' nya'aŋ, li nwadig kanɛ pin'in yiiga ni la ye, 2 “Kɛl ka Israel dim la maal Kum Maliak Gaadʋg Malʋŋ la saŋa kanɛ nar ye ba maali li la. 3 Ba maalimi li saŋa kanɛ nar, ka li anɛ nwadig nwa, li dabisa pii nɛ anaasi daar, winnig ya'a ti bɔɔd kpɛn'ɛb, ka li dɔl nɛ li suor nɛ li zi'ela wʋsa an si'em nɔɔ.”4 Ka Moses da yɛl Israel dim la ye ba maalim Kum Maliak Gaadʋg malʋŋ la. 5 Ka ba sid da niŋ ala Sinai mɔɔgin nwadkanɛ pin'in la li dabpii nɛ anaasi la daar, winnigi da bɔɔd kpɛn'ɛb la saŋa. Israel dim la da maal si'el wʋsa wʋʋ Zugsɔb la pa'al Moses si'em la.
6 Amaa ba sieba da pʋ nyaŋi di Kum Maliak Gaadʋg malʋŋ la daakanɛ, bɔzugɔ ba da si'is nɛ kum ka ba malima pʋʋgin ba ka' nyainnɛ. Alazug ba da kɛn Moses nɛ Aaron san'an na daakan la nɔɔ, 7 yɛl Moses ye, “Tinam ka' nyainnɛ bɔzugɔ, ti si'is nɛ kum, ka lina na kɛ ka ti kʋ nyaŋi la'as nɛ ti taaba banɛ an Israel dim la nɔki ti maannɛ tis Zugsɔb la?” 8 Ka Moses lɛbisi ba ye, “Gu'usimi ka m bu'os Zugsɔb la gɔs ye o na yɛl ye bɔɔ ya yɛla.” 9 Zugsɔb la da lɛbis Moses ye, 10 “Yɛlim Israel dim la ye, ‘Ya sɔ' bɛɛ ya yaas ya'a ti ka' nyainnɛ ka li anɛ ye o si'is nɛ kum, bɛɛ o duoe nɛ suori bɛ lallisa, o na tun'e di Malʋŋ kanɛ an Zugsɔb Kum Maliak Gaadʋg la. 11 Ba na di Malʋŋ la nɛ nwadkanɛ paas ayi' la li dabpii nɛ anaasi daar. Li anɛ ye ba ɔnb pɛribig la ni'im, la'am nɛ bodobodo linɛ ka' danbin la nɛ zɛnvantɔɔd la. 12 Ba mid ka ba ɔnb ni'im la ka si'el kpɛlim nie bɛog, bɛɛ kɔ'ɔgi li kɔnbir. Ba ya'a di Kum Maliak Gaadʋg malʋŋ la diib, ban dɔlli li suoya. 13 Amaa sɔ' ya'a an nyain ka mɛ pʋ duoe suorɛ, ka pʋ siak ye o di Kum Maliak Gaadʋg malʋŋ la, ba na yis ninkan daan o buudi ni, bɔzugɔ o pʋ nɔk maannɛ tis Zugsɔb la saŋa kanɛ nar ye o tis la. Ninkan daan tʋʋmbɛ'ɛd la taal na kpɛlim o zugin. 14 Saan ya'a bɛ nɛ ya ka mɛ bɔɔd ye o di Kum Maliak Gaadʋg malʋŋ la, asɛɛ o dɔlli li suor nɛ zi'ela la an si'em. Li sʋ'ʋm ye ya mɔr zi'elʋg yinne tis saam nɛ teŋin dim la wʋsa.’ ”
Saŋgbauŋ la bɛ Fuug Sʋgʋr la zugin la yɛla
15 Daar kanɛ ka ba da zi'el Pʋ'ʋsim Zin'ig linɛ an La'asʋg Fuug Sʋgʋr la, saŋgbauŋ da sig na ligili li ti paae zaam. Saŋgbauŋ la da lieb wʋʋ bugum nɛ yʋ'ʋŋ wʋsa ti nie bɛog. 16 Saŋa wʋsa li da anɛ ala, saŋgbauŋ la da ligili li nintaŋ, ka yʋ'ʋŋ ya'a sɔb ka li an wʋʋ bugum nɛ. 17 Saŋgbauŋ la ya'a da ɛɛnti naam Fuug Sʋgʋr la zugʋ dʋʋ agɔl, Israel dim la duodnɛ gban'e suori ken. Ka zin'ikanɛ wʋsa ka li paae zi'en, ani ka ba ti'idi ba sʋga la. 18 Zugsɔb la ya'a tis nɔɔr ye ba yim, ba yitnɛ; ka o ya'a ye ba zi'enim zin'isi'a, ba zi'enid nɛ. Saŋgbauŋ la ya'a sig na yuug Fuug Sʋgʋr la zug ba mɛ na kpɛlim ani yuug. 19 Saŋgbauŋ la ya'a yuug Fuug Sʋgʋr la zug, Israel dim la da siakid nɛ Zugsɔb la tis nɔsi'a la ka pʋ tɔlisid zin'isi'aa. 20 Saŋa si'a da bɛ ka saŋgbauŋ la sig Fuug Sʋgʋrin la na dabisa bi'ela ka ba wʋsa zin'in wʋʋ Zugsɔb la tis nɔɔr si'em la, ka o ya'a lɛn tis nɔɔr ye ba duom, ba duod nɛ. 21 Saŋa si'a da bɛ ka saŋgbauŋ la sig Fuug Sʋgʋr la zug na lin pin'il zaam ti nie bɛog la lɛn dʋ agɔla, ka ba mɛ duoe tɔlis. Li ya'a an yʋ'ʋŋ bɛɛ nintaŋ ba duod nɛ mɛn. 22 Saŋgbauŋ la ya'a kpɛn bɛ Fuug Sʋgʋr la zugʋ paae dabis ayi', bɛɛ nwadig, bɛɛ yʋʋm mum, Israel dim la mɛ da gur ala ka pʋ vurigida, amaa li ya'a ti dʋʋ agɔla, ba mɛ duod nɛ gban'ad suor. 23 Zugsɔb la ya'a da ye ba zi'enim, ba zi'enid nɛ; o ya'a ye ba kem ba kennɛ: ba da dɔl Zugsɔb la nɔɔr wʋʋ on da yɛl Moses ka o yɛli ba si'em la.