Bugum fita la nar ye ba zi'el si'el
8
1 Zugsɔb la da yɛl Moses ye 2 “Yɛlim Aaron ye o ya'a nyu'oe bugum fita ayɔpɔi la, li anɛ o sʋn'ʋl fita zi'esir la zug ka li nie lɛbisi li tuon baba.” 3 Aaron da niŋ ala: o da nyu'oe fita la sʋn'ʋl fita zi'esir la zug ka li nie lɛbis tuon, wʋʋ Zugsɔb la zi'el Moses si'em la. 4 Ban da maal fita zi'esir la si'em nwa: lin yi li gbinnin ti paae li zugin linɛ nwɛnɛ puum nɛ ka ba zan' sanlima maali li. Ba da maal fita zi'esir la ka li dɔl nɛ Zugsɔb la pa'al Moses ye ba maal si'em la.Ban wɛlig Levi dɔɔg dimi ba kɔn' la yɛla
5 Zugsɔb la da yɛl Moses ye, 6 “Yisim Levi dɔɔg dim la Israel dim la sʋʋgin ka maal maan kanɛ na kɛ ka ba lieb nyain. 7 Fʋn na niŋ si'em ka ba lieb nyain anɛ nwa: misigimɛ ba nɛ ku'okanɛ kɛt ka ba na an nyain la. Ka kɛ ka ba pʋni ba niŋgbiŋ kɔnbilʋg wʋsa ka piesi ba fuud, ka li kɛ ka ba lieb nyain. 8 Kɛl ka ba nɔk na'arapɔl nɛ zʋʋd maan linɛ an zɔm baanligi gɛndig nɛ kpaam: ka lɛn nɔk na'arapɔl ya'as ka li an tʋʋmbɛ'ɛd maan. 9 Mɔr Levi dim la na ka ba zi'en La'asʋg Fuug Sʋgʋr la tuon, ka la'as Israel nidib la wʋsa na. 10 Li anɛ fʋ kɛ ka Levi dim yina zi'en Zugsɔb la tuon, ka Israel dim la wʋsa nɔki ba nu'usi pa'ali ba zug, 11 ka Aaron an ye o mɔr Levi dɔɔg dim la kɛn Zugsɔb tuon na tis wʋʋ nyɔɔsʋŋ maan linɛ yit Israel dimin la na, ka li kɛ ka ba na an banɛ ti'eb ye ba tʋm Zugsɔb la tʋʋma. 12 Levi dɔɔg la dim ya'a nɔki ba nu'ugi pa'al na'araad la zugʋ naae, fʋn on nɔk yinne maal tʋʋmbɛ'ɛd maan ka kɛ yinne la maal nyu'or maan ka li an suguru sɔsʋg maanni tis Levi dɔɔg dim la. 13 Kɛl ka Levi dɔɔg dim la zi'en Aaron nɛ o biis la tuon ka fʋ nɔki ba maal nyɔɔsʋŋ maannɛ tis Zugsɔb la. 14 Fʋ ya'a niŋ ala li pa'al ye fʋ wɛlig Levi dɔɔg la nɛ zi'eli ba kɔn' nɛ Israel dim la, ka Levi dim la na an man nidib.
15 “Fʋ ya'a maal maan kanɛ kɛt ka Levi dɔɔg la an nyain la naae, ka niŋi ba wʋʋ nyɔɔsʋŋ maan la, ba yʋ'ʋn na kpɛn' La'asʋg Fuug Sʋgʋrin la tʋmmi ba tʋʋma. 16 Banɛ na an Israel dɔɔg kanɛ nɔki ba mɛŋ wʋsa pɛsigi tis mam. Manɛ gaŋi ba ye ba lɛdig Israel dim bikpɛɛmnam la zin'ig, bɛɛ biribiŋ kpɛŋ onɛ ka Israel pu'a du'a wʋsa. 17 Linɛ du'a Israel wʋsa ka an bʋndaug anɛ man din, li ya'a anɛ nid bɛɛ bʋnkɔnbʋg. Man da kʋ bʋnkpɛŋ wʋsa Egipt teŋin la, m da bas ban nɛ ye ba an man din. 18 Man nɔk Levi dɔɔg la nɛ ka ba lɛdig Israel bikpɛɛmnam la wʋsa zin'ig. 19 Israel nidib la wʋsa sʋʋgin, man nɔk Levi dɔɔg la dimi tis Aaron nɛ o biis, ye ba zi'en Israel dim nɔba zugʋ tʋm La'asʋg Fuug Sʋgʋr la tʋʋma, ka sɔsid suguru tisidi ba ka li na kɛ ka ba ya'a li'el Fuug Sʋgʋr la ba kʋ paam san'auŋɔ.”
20 Moses nɛ Aaron nɛ Israel dim la wʋsa da maal Levi dɔɔg dim la wʋʋ Zugsɔb la da ye ba maal si'em la. 21 Levi dɔɔg la da maali ba mɛŋ nyain ka pie ba fuud, ka Aaron nɔki ba keŋ Zugsɔb la tuon nyɔɔsimi ba wʋʋ nyɔɔsʋŋ maannɛ sɔs suguru tisi ba, ka li kɛ ka ba lieb nyain. 22 Lin nya'aŋ la, Levi dɔɔg la da keŋ ye ba tʋm La'asʋg Fuug Sʋgʋr la tʋʋma, ka Aaron nɛ o biis la pa'annɛ ba ban na tʋm si'em. Ba da maal Levi dim la wʋʋ Zugsɔb la da yɛl Moses ye o niŋ si'em la.
23 Zugsɔb la da yɛl Moses ye, 24 “Levi dim la na niŋ si'eli nwa: dap banɛ an yʋma pisi nɛ anu bɛɛ gaad ala anɛ ba kena tʋm tʋʋma La'asʋg Fuug Sʋgʋrin la. 25 Amaa onɛ ti paae yʋma pisnu li anɛ ye o bas ka keŋ vʋ'ʋs ka da lɛn tʋm ya'asɛ. 26 Ba tun'e sʋŋi ba taaba la ka ba tʋm La'asʋg Fuug Sʋgʋr la tʋʋma, amaa bam mɛŋ da tʋm tʋʋma la. Ala ka fʋ na pʋdig tʋʋma tis Levi dim dɔɔg la.”