Anzurifa na'atana la yɛla
10
1 Zugsɔb la da yɛl Moses ye, 2 “Zan'am anzurifa maal na'atana ayi', ka mɔri li buon nidib la la'asid, ka li ya'a ti anɛ ye ba tɔlis ban on wʋmi li ka tɔlis. 3 Na'atana ayi' la wʋsa ya'a ti pieb, nidib la wʋsa na la'asi fʋ tuon La'asʋg Fuug Sʋgʋr la za'anɔɔrin. 4 Amaa na'atan yinne ya'a pieb, li anɛ banɛ an dɔɔd la tuongatibi na la'asi fʋ san'an na. 5 Na'atan la ya'a pieb ken piebʋg, dɔɔd banɛ bɛ ya-nya'aŋ la na duoe gban'e ken; 6 onɛ pɛ'ɛs ayi' la ya'a pieb, banɛ bɛ dagɔbʋg la na duoe gban'e ken. Piebʋg la na an zanbinnɛ pa'al ye ba duom keŋ. 7 Ban na niŋ si'em la'as nidib la anɛ ba pieb na'atana la. Amaa li sʋm ye piebkan bɛɛ li kɔn' ka kɛ ka ken piebʋg la mɛ bɛɛ li kɔn'.8 “Aaron bibanɛ an maanmaannib la na piebid na'atana la. Ba na sʋ'oe tʋʋm kaŋa saŋa wʋsa. 9 Ya ya'a ti bɛɛ ya mɛŋ teŋinɛ zabid nɛ ya dataas banɛ namisidi ya la, yanam on pieb na'atana la, ka li na kɛ ka Zugsɔb onɛ aan ya Wina'am la tiɛn ya yɛla ka faaɛn ya yii ya dataas la nu'usin. 10 Linɛ paas, ya ya'a ti maan sumalisim saŋa si'a, nɛ ya malima, nɛ nwadpaalig di'ema la, asɛɛ ya pieb na'atana la yanamɛ maannɛ ya nyu'or maana saŋsi'a la, nɛ ya taaba la'asʋg maana la, ka li na an tiɛnr yanam nɛ ya Wina'am la teŋsʋk. Manɛ aan ya Zugsɔb Wina'am.”
Israel dim la da duoe Sinai sian'arin la yɛla
11-12 Yʋma ayi' la ni, li nwadis ayi' la, li dabisa pisi daar, Israel dim la da bɛ Sinai mɔɔgin la, saŋgbauŋ la da naam Nɔnaar Fuug Sʋgʋr la zugʋ dʋʋ agɔl, ka ba yʋ'ʋn da pin'ili ken zin'ig-zin'ig, hali nɛ saŋgbauŋ la ti sig Paran mɔɔgin la zi'en. 13 Saŋkan la ka ba da dɛŋi duoe yii keŋ wʋʋ Zugsɔb la dɔlis Moses san'anɛ tisi ba nɔɔr si'em la. 14 Juda dɔɔg la da gaad tuon nɛ ba tuuta, ka Nason onɛ an Aminadab biig la luu ba tuon; 15 ka Netanɛl onɛ da an Zuar biig la da lu Isaka dɔɔg la tuon, 16 ka Eliab onɛ an Helon biig la mɛ lu Zebulun dɔɔg la tuon.
17 Ba yʋ'ʋn da kpilim Fuug Sʋgʋr la ka Gerson tuŋ la nɛ Merari tuŋ banɛ ziidi li la duoe keŋ.
18 Reuben dɔɔg la da tia'al nɛ ba tuuta. Elizu onɛ an Sediu biig la da luu ba tuon; 19 ka Selumiel onɛ da an Zurisiadai biig la da lu Simeon dɔɔg la tuon; 20 ka Eliasaf onɛ an Duodi biig lu Gad dɔɔg la tuon. 21 Ka Kohat tuŋ la yʋ'ʋn duoe dɔl, ka ziid la'abanɛ an kasi la. Li da anɛ ye ba ti' Fuug Sʋgʋr la naae ka ba nyaan paae na.
22 Efiram dɔɔg la da tia'al nɛ ba tuuta. Elisama onɛ an Ammihud biig la da luu ba tuon. 23 Ka Gamaliel onɛ an Pedazu biig la da lu Manase dɔɔg la tuon; 24 ka Abidan onɛ an Gideon biig la da lu Benjamin dɔɔg la tuon.
25 Li naarin la, Dan dɔɔg la an banɛ da kpɛlim nya'aŋi dɔl ka gur nidib la. Ahieza onɛ an Amisiadai biig la da luu ba tuon.
26 Pagiel onɛ an Okiran biig la da lu Aser dɔɔg la tuon.
27 Ka Ahira onɛ an Enan biig la da lu Naftali dɔɔg la tuon.
28 Israel buudi la da tuunl taaba yi si'em la.
29 Moses da yɛl Hobab onɛ an Reuel biig ka an Midian nid la, ka mɛ an Moses diem la ye, “Ti yitnɛ wa'ae zin'ikanɛ ka Zugsɔb da yɛl ye o na nɔki tisi ti la. Dɔlli ti keŋ ka ti na maalif sʋ'ʋm, bɔzugɔ Zugsɔb la kaanb ye o na tis Israel dim bʋnsʋma.” 30 Ka o lɛbis ye, “Ayei, man kʋ keŋɛ. Man lɛbidnɛ m mɛŋ teŋin nɛ m mɛŋ nidibin.” 31 Amaa Moses da yɛl o ye, “M bɛlimnɛ, da lɛb ka basi tii. Fʋn mi' zin'ikanɛ ka ti na la'as taaba mɔɔgin la, fʋ na tun'e pa'annɛ ti. 32 Fʋ ya'a dɔlli ti, tinam nɛ fʋ na pʋdig la'asʋma banɛ wʋsa ka Zugsɔb la na tisi ti.”
33 Alazug ba da naam Sinai Zuokanɛ an Zugsɔb Zuorin la keŋ daba atan'. Zugsɔb Nɔnaar Daka la ka ba da zii bɛ tuon daba atan' ken la pʋʋgin ye li ie zin'ikanɛ ka ba na la'as anii vʋ'ʋs. 34 Ban da duoe ba la'asʋg zin'igin ye ba keŋ la, Zugsɔb saŋgbauŋ la da bɛnɛ agɔla nintaŋ. 35 Saŋa kanɛ wʋsa ka Nɔnaar Daka la da duoe gaad tuon, Moses yɛti ye,
“Zugsɔba, duom!
Kɛl ka fʋ dataas widig,
ka banɛ kisif zɔɔ yii fʋ tuon!”
36 Daka la ya'a ti paae zin'ikanɛ an ye li digin la, o yɛti ye,
“Zugsɔba, lɛm na!
Kemi fʋ nidib Israel dim banɛ ka' bɛn la san'an na!”