Bugum naan Zugsɔb la san'anɛ sig na la yɛla
11
1 Saŋkaŋa nidib la da nyɔnnɛ lin tɔi si'em tisi ba, ka Zugsɔb la wʋm, ka o sʋnf duoe. Bugum da naam Zugsɔb la san'anɛ sig na diti ba la'asʋg zin'ig la kpikpɛŋ. 2 Nidib la da kaasi tis Moses, ka o sɔs Zugsɔb la ka bugum la kpiig. 3 Alazug ba da pʋd zin'ikan la yʋ'ʋr ye Tabera;a bugum naam Zugsɔb la san'anɛ sigi ba teŋsʋk na dit la zug.Zugsɔb tis Israel dim kɔdis
4 Ninzʋna banɛ da gɛndigi ba la da gɛn'ɛd diib yɛla, ka Israel dim la lɛm pin'ili nyɔnnɛ yɛt ye, ba pʋ mɔr ni'imi na ɔnbɛ. 5 Ba da yɛt ye, “Ti tiɛn zimi banɛ ka ti daa ɔnbid Egipt teŋin zaalim nɛ gɔla banɛ ka ti daa dʋgidi ɔnbid nɛ wɔtamɛlɔn nɛ gabʋ buudi wʋsa la. 6 Amaa nannanna ti ya'amlɛog wʋsa gaadya; ti pʋ lɛn nyɛt si'ela asɛɛ dikanɛ buon manna nwa ma'aa.” 7 Manna la da anɛ bʋngbilis wʋʋ ma'anbiili ka an pipɛl-zɛn'ug. 8 Nidib la da ɛɛnti yinɛ pi'isi li, ka nɛɛmi li nɛɛrin bɛɛ tua li tuodir pʋʋg. Ba da ɛɛnti dʋgi li nɛ bɛɛ nɔki maal ma'asa ka li malis wʋʋ ban na nɔk olif kpaam maal si'el. 9 Mɛligim ya'a da lu yʋ'ʋŋʋ ba la'asʋg zin'igin la, manna la dɔlnɛ mɛligim la lut na.
10 Moses da wʋm ka yir wʋsa nidib bɛɛ ba sʋga la za'anɔya nii kaasid, ka Zugsɔb la sʋnf duoe hali, ka li daam Moses. 11 O da fabili tis Zugsɔb la ka bu'os o ye, “M Zugsɔba, m anɛ fʋ sankpan'as; bɔ ka fʋ zi yɛl kaŋa na ziili ma? M maal bɔ kimm ka li pʋ malisi fɔ ka fʋ nɔk nimbama wʋsa ziidi ziil mam? 12 Manɛ gban'e nimbama wʋsa pʋʋgɔɔ? Manɛ du'a baa? Bɔ ka fʋ ye m zanli baa m nu'ugin nwɛnɛ biyuole na zanl biigi wa'ae teŋ kanɛ ka fʋ kaanbi zi'el ye fʋ tisi ba yaanam la? 13 Man na nyɛ ni'im yaanɛ tis nimbama wʋsa? Ba kaasidi saŋa wʋsa m tʋba ni ye, ‘Tisimi ti ni'im ka ti ɔnb!’ 14 Man kʋ nyaŋi zi nimbama nɛ m mɛŋ paŋa. Ziid la tɛbis nɛ hali gaad mam. 15 Li ya'a aan anwa ka fʋ ye fʋ maal mam, lɛɛ kpɛn kʋʋm nannanna. M ya'a paae fʋ ya'am, fʋn da kɛ ka m vʋe ti nyɛɛm san'auŋɔ.”
16 Zugsɔb la da yɛl Moses ye, “La'asim kpɛɛmnam pisyɔpɔi banɛ ka fʋ mi' ye ba anɛ tuongatib, nidib la sʋʋgin; kɛl ka ba kɛn La'asʋg Fuug Sʋgʋrin la na, ka fʋn nɛ ban la'am zi'en ani. 17 M na sig na ka pian' tisi ya anina ka kɛ ka Siig kanɛ bɛɛ fʋ ni la mɛ na bɛɛ ba ni, ka ba nyaŋi sʋŋi fʋ zi nidib la ziid ka fʋ da lɛn ziidi fʋ kɔn'ɔkɔn'.”
18 Yɛlim nidib la ye, “Maalimi ya mɛŋ nyain ka bɛog, ya na paam ni'imi ɔnb. Zugsɔb la wʋm yanamɛ fabin ka yɛt ye, ‘Ti ya'a nyɛɛn ni'imɛɛ, ti naan kʋ ɔnbinɛɛ! Tinamɛ daa bɛ Egipt la, li daa an sʋ'ʋm tisi ti.’ ” Nannanna Zugsɔb la na tisi ya ni'im, ka ya ɔnb. 19 Ya kʋ ɔnbi li daar yinne bɛɛ daba ayi' bɛɛ daba anu bɛɛ dabpiiga bɛɛ pisi ma'aanɛ, 20 amaa nwadmum, hali ka li ti yiti ya nyɔnya ni. Bɔzugɔ, ya zan'as Zugsɔb onɛ bɛ nɛ ya la ka nyɔnnɛ yɛt ye, “Bɔzug kimm ka ti lɛɛ da yi Egipt teŋin la na?” 21 Moses da yɛl Zugsɔb la ye, “Nidib tusa kɔbisyuobʋ ka man luu ba tuon, ka fʋ ye fʋ na tisi ba ni'im ka li siaki ba ti paae nwadmummɛɛ? 22 Ti na nyɛ niigi nɛ pɛ'ɛsi kʋʋ tisi ba ka li siaki baa? Zimi banɛ bɛɛ atɛukʋn la na la'asi sia'ali baa?” 23 Ka Zugsɔb la lɛbis ye, “Mam paŋ la mɔr bɛnnɛɛ? Li kʋ yuugɛ ka fʋ baŋ ye man yɛl si'el la na niŋ bɛɛ li kʋ niŋɛ!”
24 Moses da yii yɛl nidib la Wina'am yɛl si'em. O da la'as tuongatib pisyɔpɔi la ka kɛ ka ba zi'enɛ gilig Fuug Sʋgʋr la. 25 Zugsɔb la da sig na bɛ saŋgbauŋ pʋʋgin ka pian' tis Moses ka nɔk Siig kanɛ ka o da tis o la mɛ tis tuongatib pisyɔpɔi la. Siig la da sigi ba zugin na la ba da pin'ili maan tʋkpiidʋg wʋʋ nɔdi'esidib nɛ, amaa ka lɛɛ pʋ maligim maal ala ya'asɛ. 26 Nidib ayi' pisyɔpɔi la sʋʋgin, ka ba yʋda buon Elidad nɛ Miedad da kpɛlim la'asʋg zin'igin la ka pʋ yii keŋ Sʋgʋrin laa. La'am nɛ ala, Siig la da sigi ba zugin na, ka ban mɛ pin'ili maan tʋkpiidʋg wʋʋ nɔdi'esidib nɛ. 27 Dasaŋ sɔ' da zɔɔ keŋ yɛl Moses ye, “Elidad nɛ Miedad bɛ la'asʋg zin'igin pian'ad nwɛnɛ nɔdi'esidib nɛ.” 28 Ka Josua onɛ an Nun biig ka da sʋŋid Moses o biilimin sa la da yɛl Moses ye, “M zugdaana, m bɛlimnɛ, gu'omi ba!” 29 Moses da lɛbis ye, “Fʋ bɛn'ɛdnɛ fufumɛ? Man bɔɔdin si'el anɛ ye Zugsɔb la Siig sig sɔ' wʋsa zugin ka ba pian'ad wʋʋ nɔdi'esidib nɛ!” 30 Ka Moses nɛ tuongatib la wʋsa lɛb la'asʋg zin'igin la.
31 Li da pʋ yuugɛ, ka Zugsɔb la kɛ ka sisi'etita'ar da'ae yi atɛuk baba na mɔr kɔdisi kɛɛn ba san'an na ka ba ian'ad yammin-yammin. Ba da tiigi zin'ig la wʋsa, ka fʋ ya'a ye fʋ dɔlis li wa'alim paae ba bɛn li na an wʋʋ dabismum ken, lʋga anaasi la wʋsa. 32 Alazug daakan la nɛ li yʋ'ʋŋ, nɛ dabisir kanɛ tia'al la, nidib la tʋʋm da anɛ kɔndis la gban'ab; sɔ' wʋsa da la'as ka li pʋ pɔɔda. Ba da dɛlig kɔndis la giligi ba la'asʋg zin'ig la wʋsa. 33 Ban da nam ɔnbid ni'im la, Zugsɔb la sʋnf duoe nɛ nidib la ka o kɛ ka ban'atita'ar luu ba sʋʋgin. 34 Ba da pʋd zin'ikan yʋ'ʋr ye Kibrof-Hataavab bɔzugɔ ani ka ba mum banɛ da kpiid ni'im yɛla la.
35 Nidib la da yii ani keŋ Hazerof, n la'asi bɛ ani.