Miriam nɛ Aaron n zɛrig Moses la yɛla
12
1 Moses da di Etiopia pu'a, ka Miriam nɛ Aaron da zɛrig Moses li zug. 2 Ba da fabili bu'os ye, “Zugsɔb la dɔlisid nɛ Moses ni gʋllim pian'adaa? O ɛɛnti pʋ dɔlisid tinam san'anɛ pian'ada?” Ka Zugsɔb wʋm ban yɛt si'em la. 3 Moses da anɛ sikimɛŋ sɔb, o da sikidi o mɛŋi gaad sɔ' wʋsa dunia nwa ni.4 Ani ka Zugsɔb la yɛl Moses nɛ Aaron nɛ Miriam ye babatan' la yim keŋ La'asʋg Fuug Sʋgʋrin la, ka ba sid da yii keŋ. 5 Ka Zugsɔb la sig na bɛ saŋgbauŋinɛ zi'e Fuug Sʋgʋr la za'anɔɔrin ka buol Aaron nɛ Miriam, ka babayi' la da yi tuon na. 6 Ka o yɛli ba ye, “Kɛlisimi m pian'ad la sʋ'ʋŋa. Mam Zugsɔb nɔdi'es ya'a bɛɛ ya sʋʋgin, man nied nɛ m mɛŋi pa'al o, ka pian'adi tisid o zaansʋŋ pʋʋgin. 7 Amaa ya'a an man tʋmtʋm Moses, li ka' ala, m yin la wʋsa onɛ an sida sɔb; 8 man nɛ on ɛɛnti kpa' nɛ taaba ka m pian'adi tisid o nyain-nyain, ka' nɛ siilimaa. Bɔɔ kɛ ka ya pʋ zɔ dabiem ka zɛrig Moses onɛ aan m tʋmtʋm la?” 9 Zugsɔb la sʋnf da duoe ya ka o gaad ka basi ba.
10 Saŋgbauŋ la da naam Fuug Sʋgʋr la zugʋ dʋ agɔl la, ka Miriam kpɛn lieb kʋkɔmi zi'e pɛlig farr wʋʋ sakugir nɛ. Aaron da gi'e nyɛ ka o zi'e an kʋkɔm, 11 ka o yɛl Moses ye, “M zugdaana, bɛlimnɛ, kɛlli ti taali bas nɛ tinamɛ tʋm yalim tʋʋmbɛ'ɛsi'a la. 12 Da kɛ ka o nwɛnɛ bikpi'iŋi yit o ma pʋʋgin na ka o pʋsʋk kae la.” 13 Alazug Moses da kaasi tis Zugsɔb ye, “M Zugsɔb Wina'am, m bɛlimnɛ, ti'ebim o!” 14 Zugsɔb la da lɛbis ye, “O saam ya'a tʋbisin nitɔɔndi niŋ o nindaa, nyan kʋ kpɛn' o daba ayɔpɔi, bɛɛ ka' alaa? Alazug asɛɛ ka o yi la'asʋg zin'ig la yiŋi niŋ bakuai ka li nya'aŋ ka ya nyaan mɔr o lɛb na.” 15 Alazug ba da yis Miriam la'asʋg zin'ig la yiŋ daba ayɔpɔi, ka nidib la da pʋ duoe tɔɔm hali ka o ti lɛb na.
16 Lin nya'aŋ ka nidib la da bas Hazerof ka la'asi digin Paran mɔɔgin.