Nidib la giligi gɔs Keenan teŋ la yɛla
13
1 Zugsɔb la da yɛl Moses ye, 2 “Tʋm dap sieba ka ba keŋ labisi gɔs Keenan teŋ linɛ ka m nɔkid ye m tis Israel dim la. Gaŋim dɔɔg wʋsa ni nid yinne onɛ an tuongat.” 3 Moses sid da tʋm wʋʋ Zugsɔb la yɛl o si'em la. Ban da nam bɛ Paran mɔɔgin la, o da gaŋ nidibi tʋm ka ba yii keŋ. Ba wʋsa da anɛ Israel nidib la tuongatib. 4 Nidib la yʋda nwa: Reuben dɔɔg la ni ba da gaŋnɛ Sammua onɛ an Zakur biig la.5 Simeon dɔɔg la ni ba da gaŋnɛ Safat onɛ an Hori biig la.
6 Juda dɔɔg la ni ba da gaŋnɛ Kaleb onɛ an Jefune biig la.
7 Isaka dɔɔg la ni ba da gaŋnɛ Igal onɛ an Josef biig la.
8 Efiram dɔɔg la ni ba da gaŋnɛ Hosua onɛ an Nun biig la.
9 Benjamin dɔɔg la ni ba da gaŋnɛ Palti onɛ an Rafu biig la.
10 Zebulun dɔɔg la ni ba da gaŋnɛ Gadi'el onɛ an Suedi biig la.
11 Manase dɔɔg (linɛ mɛ an Josef dɔɔg la) ni, ba da gaŋnɛ Gadi onɛ an Susi biig la.
12 Dan dɔɔg la ni ba da gaŋnɛ Ammiel onɛ an Gemal biig la.
13 Aser dɔɔg la ni ba da gaŋnɛ Setur onɛ an Maikel biig la.
14 Naftali dɔɔg la ni ba da gaŋnɛ Nahib onɛ an Vofisi biig la.
15 Gad dɔɔg la ni ba da gaŋnɛ Gueel onɛ an Maki biig la.
16 Nimbanɛ ka Moses da gaŋ ye ba labisi gɔs Keenan teŋ la, la; (Moses da tiak Hosua onɛ an Nun biig la yʋ'ʋri pʋd o ye Josua.)
17 Moses n da tʋmi ba ye ba labisi gɔs teŋ la, o da yɛli ba ye, “Dɔlli pipirkanɛ buon Negef la paae teŋ kanɛ an kʋkʋna la. 18 Gɔsimi teŋ la an si'em, nɛ nimbanɛ bɛɛ ani la ye ba mɔr paŋ bɛɛ ba ka' paŋa, ba zu'oya bɛɛ ba pʋ zu'oe. 19 Gɔsimi ye teŋ kanɛ ka ba bɛ la an wala? Li anɛ teŋ sʋŋ bɛɛ tembɛ'ɛdɛ? Tempʋʋd banɛ ka ba bɛɛ li ni la an wala? Ba mɛ zaŋguoma giligi ba bɛɛ ba pʋ mɛ? 20 Teŋ la ta'am an wala? Li mɔr kʋ'ʋlʋm bɛɛ li kae? Tiis bɛ teŋin la bɛɛ li kae? Kpɛ'ɛŋimini ya mɛŋ ka mɔri teŋ la tiwala na!” (Li da sia'al nɛ ba tiwala bi'igir saŋa.)
21 Ba sid da keŋ ye ba labisi gɔs teŋ la, lin pin'il Zin mɔɔgin la hali ti paae teŋ kanɛ buon Rehob linɛ bɛ Lebo-Hamat kpikpɛŋ la. 22 Ba da dɔlli yi Negef keŋ paae Hebron teŋ zin'ikanɛ ka Ahiman nɛ Siesai nɛ Talimai banɛ an Anak yaas la da bɛ la. (Hebron teŋ la da dɛŋi mɛ' yiiga, yʋma ayɔpɔi nya'aŋ ka ba nyaan mɛ' Zoan linɛ bɛ Egipt teŋin la.) 23 Ban da paae bɔn'ɔg kanɛ buon Esikol la, ba da nwaae nɛ tiwala kanɛ ka ba mɔri maannɛ ba daam la wil yinne linɛ wala an gbɛsi. Nidiba ayi' da nɔk daugʋ buk ka yinne bɛ tuon ka yinne mɛ bɛ nya'aŋ ka lɔ wil la ba teŋsʋk nɛ tiwala la ken. Ka ba da paam teŋ la tiwal sieba mɛ zii keŋ. 24 Ba da buol zin'ikan yʋ'ʋr ye Esikol bɔn'ɔg,a bɔzugɔ ani ka Israel dim la da nwaae tiwala la. 25 Ba da nɔk nɛ dabisa pisnaasi labisi gɔs teŋ la ka nyaan lɛb na.
26 Ba da lɛb Moses nɛ Aaron nɛ Israel dim la wʋsa san'an, teŋ kanɛ buon Kades, Paran mɔɔgin la. Ani ka ba da yɛl nidib la ban nyɛ si'el ka pa'ali ba teŋ la diib nɛ li tiwala an si'em. 27 Ban da yɛl Moses si'eli nwa: “Ti keŋ teŋ kanɛ ka fʋ tʋmi ti la, ka bin'isim nɛ siind pʋbid! Nɛɛ li tiwala nwa. 28 Amaa nimbanɛ bɛɛ ani la anɛ ninkpi'ema, ka ba tɛɛns la mɛ an tembɛda ka mɔr zaŋguom kpi'ema; hali ti nyɛ Anak yaas la ani. 29 Amalek buudi la zin'inɛ Negef mɔɔgin la, ka Hitti dim nɛ Jebus dim nɛ Amor dim la zin' teŋ kanɛ an kʋkʋna la, ka Keenan buudi la zin' kpi'e nɛ Atɛuk nɛ Joodan kɔldaug la.”
30 Ani ka Kaleb da yɛl nidib la ye ba kɛl vuud Moses tuon, ka yɛl ye, “Ayei! Ti kem di'e teŋ la sʋ'ʋg, bɔzugɔ ti sid na nyaŋi sʋ'ʋgi li.” 31 Amaa nimbanɛ ka on nɛ ban da la'am keŋ gɔs teŋ la da yɛl ye, “Ti kʋ nyaŋi zab nɛ nidib la; ba kpi'emi gati ti.” 32 Ka ba yʋ'ʋn pin'ili pian'ad teŋ kanɛ ka ba keŋ gɔs la yɛla bɛ'ɛd bɛ'ɛdi tisid Israel dim la yɛt ye, “Teŋ kanɛ ka ti keŋ gɔsi gilig la ka' sʋ'ʋm, ti kʋ nyaŋi bɛɛ ani. Nimbanɛ bɛɛ ani la wʋsa anɛ nimbɛda ka wa'am. 33 Ti nyɛ Nefil dima ani.” (Anak yaas anɛ Nefil dim) “Tinam mɛŋ gɔsi ti mɛŋ ka ti an wʋʋ sisɔma ba tuon, ka ti mi' ye ban mɛ gɔs ka ti anɛ ala mɛn.”