Zi'elʋg 1

Zi'elʋg Tiɛnr

Moses pian' tis Israel dim

1 Pian'abanɛ ka Moses da pian' tis Israel dim wʋsa sian'arin, Joodan kɔldaug nya'aŋ linɛ bɛ Araba ka bɛ Suf tuon ka bɛ Paran teŋ nɛ Tofel nɛ Laban nɛ Hazerof nɛ Dizahab tɛɛns la teŋsʋk la nwa. 2 (Sɔ' ya'a yi Horeb Zuorin dɔl Seir zuoya la keŋ paae Kades Banɛa la anɛ dabpiiga nɛ yinne ken). 3 Yʋʋm pisnaasi saŋa nwadis piiga nɛ yinne la o dabisir yinne daar, Moses da mɔɔli tis Israel dim Zugsɔb la tis nɔɔri ba yɛla si'em la. 4 Nɛ'ɛŋa anɛ on da nyaŋ Sihon Amor dim na'ab la nya'aŋ, onɛ da an Hesbon teŋ na'ab la, ka Edire teŋin ka o nyaŋ Og onɛ an Basan na'ab Asitarof teŋin la. 5 Li da anɛ Joodan kɔldaug la nya'aŋ, teŋ kanɛ bɛ Moab sʋ'ʋlimin la, ka Moses da pin'ili tiɛn ba wada la yɛla yɛt ye, 6 “Zugsɔb onɛ aan ti Wina'am da yɛli ti Horeb zuorin la ye, ‘Ya yuug zuokaŋa zug hali; li sia'ala ala. 7 Duomini ya la'asʋg zin'igin la ka keŋ tuon zuor teŋ dinɛ an Amor dim sʋ'ʋlim la ni, nɛ nimbanɛ kpi'e nɛ banɛ bɛ Araba teŋin la nɛ zuoya teŋ nɛ kʋkʋna teŋ linɛ bɛ li tuon la nɛ Negef teŋ la nɛ teŋ kanɛ pʋ lal nɛ atɛuk nɔɔr la, la'am nɛ Keenan nɛ Lebanon tɛɛns wʋsa, hali ti paae Kɔldatita'ar dinɛ an Efiritis la. 8 Gɔsima, m zaŋ teŋ kaŋa tisi ya. Kem kpɛn' ka sʋ'ʋgini li, ka teŋ kan la ka mam Zugsɔb la, da pɔɔ zi'el ye m na tisi ya yaab Abraham nɛ Isaak nɛ Jakob nɛ ba yaas wʋsa banɛ na ti duoe ba nya'aŋ na la.’ ” 9 Saŋkan la ka m da yɛli ya ye, “Ya anɛ zitita'are tisim ka m kʋ tun'e ziidi ya m kɔn'ɔkɔn'. 10 Zugsɔb Wina'am la paasi ya kal, ka zina ka ya yʋ'ʋn zu'oe nwɛnɛ nwadbibis banɛ bɛ saŋgbauŋin la nɛ. 11 Zugsɔb onɛ aan ya yaanam Wina'am la kɛl ka ya maligim paas nɔɔr tusir ya'as ka niŋi ya bareka nwɛnɛ on da zi'el si'em la! 12 Amaa m na niŋ wala zii ya yɛla nɛ ya ziid nɛ ya zaba la wʋsa m kɔn'ɔkɔn'? 13 Gaŋim banɛ an ya'am dim ka gban'ad pian'ad gbin ka nidib na'asidi ba la yinne-yinne ya dɔɔd la wʋsa ni ka m na nɔki ya gu'uli ba.” 14 Ka ya da lɛbisim ye, “Fʋn gban'e ye fʋ niŋ si'el la an sʋm.” 15 Ala ka m nɔk tuongatibi ya buudi la ni banɛ mɔr ya'am ka nidib na'asidi ba la, gaŋi ba ye ba mɔr kpi'euŋʋ sʋ'oe ya, ka sieba sʋ'oe nidib tusir-tusir, ka sieba sʋ'oe kɔbig-kɔbig, ka sieba sʋ'oe pisnu nu, ka sieba sʋ'oe piig-piig; ka ba an dɔɔd la kpɛɛmnam. 16 Saŋa kan la ka m da tisi ya sariakatib la nɔɔr ye ba kɛlisi ya antu'a ka tis bʋʋd ka li dɔl suor, pian'ad la ya'a anɛ Israel dim nɛ taaba bɛɛ banɛ an saam la. 17 Ya da kɛ ka baregaŋ bɛ sariakadib la nii; kɛlisim banɛ an tadimnam nɛ banɛ an kpi'emnam wʋsa pian'ad. Da zɔ dau sɔ' dabiem; sariakadib anɛ Wina'am din. Pian'ad kanɛ kpi'emi tisi ya, mɔri kɛɛn m san'an na ka mam mɛŋ kɛlis pian'ad la. 18 Saŋkan la mɛn, m da pa'ali ya si'el wʋsa dinɛ ka ya na tʋm.

Ban tʋm sieba ye ba labisi gɔs teŋ la

(Kal 13:1-33)

19 Nwɛnɛ Zugsɔb onɛ aan ti Wina'am la zi'el nɔɔr si'em tisi ti la, ti da yi Horeb kennɛ kpa'ad Amor dim teŋ kanɛ an kʋkʋna teŋ la, ka ti dɔlli yi sian'atita'ar linɛ mɔr dabiem la, ka yʋ'ʋn paae Kades Banɛa na. 20 Ka m yɛli ya ye, “Ya paae kʋkʋna teŋ dinɛ an Amor dim teŋ la, dinɛ ka Zugsɔb onɛ aan ti Wina'am tisi ti la. 21 Gɔsimiya, Zugsɔb onɛ aan ya Wina'am la tisi ya teŋ la. Kem kpɛn' ka sʋ'ʋgi li, nwɛnɛ Zugsɔb onɛ aan ya yaanam Wina'am la yɛli ya si'em la. Da zɔti dabiem, mɛ da kɛ ka ya giinla siɛn.” 22 Ka ya wʋsa kɛɛn m san'an na yɛl ye, “Kɛl ka ti tʋm nidib ka ba keŋ tuonnɛ labisi gɔs teŋ la ka lɛb na yɛli ti suor kanɛ ka ti na dɔlli kpɛn', nɛ tempʋʋd banɛ ka ti na paae. 23 Gban'akaŋa da an sʋm tisim, ka m gaŋi ya nidib piiga nɛ ayi'; dɔɔg wʋsa nid yinne. 24 Ka ba duoe keŋ kʋkʋna teŋin ti paae Esikol bɔn'ɔgin gɔɔndi giligid. 25 Ka mɔr teŋ la zʋʋdi lɛb na pa'ali ti, ka yɛl ye teŋ kanɛ ka Zugsɔb onɛ aan ti Wina'am tisi ti la anɛ teŋ sʋŋ.” 26 Amaa ya da pʋ bɔɔd ye ya keŋɛ, ka zan'as Zugsɔb onɛ aan ya Wina'am nɔzi'elʋg la. 27 Ya da kpɛm bɛɛ ya sʋga la ni ka nyɔnnɛ yɛt ye, “Zugsɔb la kisi ti nɛ, ka yisi ti Egipt teŋin ye o zaŋi ti niŋ Amor dim nu'usin ka ba san'ami ti. 28 Ya ka ti na keŋɛ? Ti ba'abiis la kɛ ka ti giinla kɛns nɛ; ba yɛl ye, nidib la wa'am ka mɔr paŋi gati ti; tempʋʋd la anɛ tempʋbɛda, ka li zaŋguoma wa'ami paae saŋgbauŋ, hali ba nyɛ Anak dim banɛ an gandaad la anina!” 29 Ani ka m yɛli ya ye, “Da kɛ ka ya ya'am iankɛ, da zɔɔnɛ ba dabiem. 30 Zugsɔb onɛ aan ya Wina'am onɛ gati ya tuon la na zabi tisi ya, nwɛnɛ on da niŋ Egipt si'em tisi ya ka ya nini nyɛ la. 31 Sian'arin la mɛn, ya da nyɛ Zugsɔb onɛ aan ya Wina'am la mɔri ya nwɛnɛ dau na ziidi o biig si'em la, din yi zin'ikanɛ ka ya yina la ti paae kpɛla na. 32 La'am nɛ nɛ' wʋsa ni, ya pʋ tisi ya Zugsɔb Wina'am la sidaa, 33 hali nɛ on da gaadi ya tuonnɛ ya suor duor la pʋʋgin, an bugum yʋ'ʋŋ ka an saŋgbauŋ nintaŋi tisi ya ye o pa'ali ya zin'ikanɛ ka ya na vʋ'ʋs nɛ suokanɛ ka ya na dɔl la.”

Wina'am tɛɛg Israel dim tʋbir

(Kal 14:20-45)

34 Zugsɔb la da wʋm yanamɛ yɛl si'el la, o sʋnf pɛlig nɛ ka o pɔ ye, 35 “Zʋmaaŋ bɛ'ɛd nwa nid baa yinne kʋ nyɛ teŋ sʋŋ kanɛ ka m kaanb ye m tisi ya yaanam la, 36 asɛɛ Kaleb onɛ an Jefune biig la ma'aa. O na nyɛɛ li ka man na tis o yaas teŋ kanɛ ka o nɔk o nɔbiri nɔ wʋsa, bɔzugɔ, o dɔl Zugsɔb la nɛ o sʋnf wʋsa.” 37 Yanam zug ka Zugsɔb la sʋnf pɛlig nɛ mam ka yɛlim ye, “Fʋn mɛ kʋ kpɛn' anii, 38 amaa fʋ nya'andɔl Josua onɛ an Nun biig la na kpɛn'. Kpɛmisim o bɔzugɔ, onɛ na gaad Israel dim tuon ka ba sʋ'ʋgi li. 39 Ka bibibis banɛ ka ya ye ba na gban'e ba ka ba lieb yammis nɛ ya biis banɛ nan zi' sʋm nɛ bɛ'ɛdi bakid la na kpɛn' teŋin la. M na nɔki li tisi ba ka ba na sʋ'ʋgi li. 40 Amaa ya'a kpɛlim nɛ yanam, fɛndigim kpa' sian'anr la dɔlli Atɛuk Zɛn'ug suor la.” 41 Ani ka ya lɛbis ye, “Ti tʋm tʋʋmbɛ'ɛdi pɔ'ɔg Zugsɔb la. Ti na lɛbi zab wʋʋ Zugsɔb onɛ aan ti Wina'am la tisi ti nɔɔr si'em la.” Ala ka sɔ' wʋsa nɔk o zaba la'ad, ka tɛn'ɛs ye, zuoya teŋ la kpɛn'ɛb na an na'ana. 42 Amaa Zugsɔb la yɛlim ye, “Yɛlimi ba ye, ‘Da keŋ zabinya, bɔzugɔ man kʋ bɛ nɛ ya. Ya dataas la na nyaŋi ya.’ ” 43 Ala ka m yɛli ya, amaa ya pʋ kɛlisɛ. Ya da zan'as Zugsɔb la nɔɔr ka nwɛ' nyɔ'ɔgʋ duoe keŋ zuoya teŋin la. 44 Ka Amor dim banɛ bɛ zuoya teŋin la da yina zab nɛ ya; ka kadi ya nwɛnɛ siins nɛ. Ba da nyaŋi ya Seir teŋinɛ kadi ya hali paae Horma teŋin. 45 Ka ya yʋ'ʋn lɛb na kum Zugsɔb la tuon; amaa ka o pʋ kɛlisi ya kukuma la, ka ɛndi o tʋba. 46 Ala ka ya da kpɛlim Kades teŋin dabisa bɛdegʋ.