Ban giligid sian'arin la yɛla
2
1 Ka Moses lɛn yɛli ba ye, “Ani ka ti fɛndigi lɛb nya'aŋi kpa'ad sian'ari dɔl Atɛuk Zɛn'ug suor wʋʋ Zugsɔb la dɛŋi yɛlim si'em la. Ka ti giilim Seir dinɛ an kʋkʋna teŋ la yuug. 2 Ani ka Zugsɔb la yɛlim ye, 3 ‘Ya giilim kʋkʋna teŋ nwa, ka li yuugi galis; nannanna fɛndigim kpa'ae datiuŋ baba.’ ” 4 Tisim nidib la nɔkaŋa: “Ya yʋ'ʋn bɔɔdi kpɛn' nɛ ya ba'abiis banɛ an Esau yaas sʋ'ʋlimin linɛ bɛ Seir teŋin la. Ba na zɔti ya dabiem amaa gu'usimi 5 ka da kɛ ka ba sʋnya duoe ka ba zab nɛ ya, ka man pʋn kʋ tisi ya ba teŋ la baa bi'ela ka li siaki ya nɔbpauŋ zi'eligɔ. M da nɔk Seir dinɛ an kʋkʋna teŋ la tis Esau ye o sʋ'oe. 6 Asɛɛ ka ya nɔk ligidi da' diib linɛ ka ya na dit nɛ ku'om linɛ ka ya na nuud la.” 7 Zugsɔb onɛ aan ya Wina'am la niŋi ya nu'us tʋʋma bareka. O gɔsi ya suor zug sian'atita'arin la. Yʋma pisnaasi nwa pʋʋgin ka Zugsɔb onɛ aan ya Wina'am la bɛ nɛ ya, ka si'el pʋ pɔ'ɔgi ya. 8 Ka ti mɔr kennɛ ti tʋʋgi ti ba'abiis banɛ an Esau yaas ka bɛ Seir teŋin la, ka fɛndigi yi Araba suorin dinɛ yit Elaf nɛ Eziyon Geber n dʋt na la, ka dɔl Moab sian'anr suori keŋ.9 Ani ka Zugsɔb la yɛlim ye, “Da daami Moab nidib la bɛɛ ya kɛ ka ba sʋnya duoe ka ba zab nɛ ya, ka m kʋ tisi yaa ba teŋ la zin'isi'a baa bi'elaa. Man nɔk Ar teŋ la tis Lot yaas ye ba sʋ'oe.”
10 (Saŋa linɛ gaad la, Emi dim banɛ mɔr paŋ ka zu'oe ka wa'ami nwɛnɛ Anak dim la da bɛɛ ani. 11 Ban nɛ Anak dim la wʋsa, ba da buonnɛ ba ye Refa dim, amaa Moab dim la da buonnɛ ba ye Emi dim. 12 Hor dim la mɛ da ɛɛnti bɛ Seir, amaa Esau yaas la kadi baa yis. Ba da san'am Hor dim la ka zin'inɛ ba bɛllim zin'ig la sʋ'ʋgi li, nwɛnɛ Israel dim la da niŋ si'em teŋ kanɛ ka Zugsɔb la tisi ba ka ba sʋ'ʋgi li la.)
13 Ka Zugsɔb la yɛl ye, “Nannanna, duom lɔ'ɔŋi Zered bɔn'ɔg la.” Ala ka ti sid lɔ'ɔŋ bɔn'ɔg la. 14 Tinamɛ yi Kades Banɛa na yʋma pistan' nɛ anii ka ti nyaan lɔ'ɔŋ Zered bɔn'ɔg la. Saŋkan la ka zʋmaaŋ kanɛ mɔr dap banɛ da an zabzabidib la da lɛn kae ba sʋʋgin nwɛnɛ Zugsɔb la pɔɔ zi'eli ba si'em la. 15 Zugsɔb la sʋnf da duonɛ ba, hali ti paae saŋkanɛ ka o li' ba wʋsa la'asʋg la zin'igin.
16 Zabzabidib la yʋ'ʋn da kpii naae nidib la sʋʋgin la, 17 ka Zugsɔb la yɛlim ye, 18 “Zina ka ya na dɔlli yi Moab sʋ'ʋlim linɛ an Ar teŋin la. 19 Ya ya'a ti paae Ammon dim teŋin na, yanam da daami ba, bɛɛ ya kɛ ka ba sʋnya duoe ka ba zabɛ, ka man kʋ tisi ya Ammon dim teŋ paalʋ la zin'isi'a ka ya sʋ'ʋgɛ, li anɛ Ammon dim teŋ ka m nɔki li tis Lot yaas ye ba sʋ'oe.”
20 (Nidib da buon zin'ikan la ye Refa dim teŋ bɔzugɔ Refa dim la da pʋn bɛɛ anina, amaa Ammon dim la da buonnɛ ba ye Zamzum dim. 21 Ba da anɛ nimbanɛ mɔr paŋ ka zu'oe, ka wa'ami nwɛnɛ Anak dim nɛ. Zugsɔb la da san'ami ba Ammon dim la nini ni; ba da kadi baa yis ka di'e ba zin'igi zin'in. 22 Zugsɔb la mɛ da niŋnɛ ala tis Esau yaas banɛ da bɛ Seir la. O da san'am Hor dimi ba nini ni. Ba da kadi baa yis ka zin'inɛ ani ti paae zina. 23 Ya'a kpɛlim Avi dim banɛ da bɛ teŋkpɛmisin hali mɔri paae Gaza la, Kafitor dim banɛ yi Kafitor la da kenna san'ami ba ka zin'inɛ ba zin'igin la.)
24 “Duomi nannanna keŋ tuonnɛ lɔ'ɔŋ Arnon bɔn'ɔg la. Gɔsimiya, m nɔk Sihon onɛ an Ammon nid ka an Hesbon na'ab nɛ o teŋgbauŋ la niŋi ya nu'ugin. Pin'ilim sʋ'ʋginɛ li ka tʋ'ʋs o nɛ zaba. 25 Din yi zina, m na kɛ ka nidib ya'am ian'ad ka dabiem mɔr buudi wʋsa banɛ bɛ dunia nwa ni la yanam zug. Ba na wʋmi ya labaar ka kirid ka ba sʋnya san'am yanam yɛla.”
Ba nyaŋ Hesbon na'ab Sihon
26 M da tʋm nidib ka ba yi Kedemof sian'arin keŋ Sihon onɛ an Hesbon na'ab la san'an tisid o sumbʋgʋsʋm, yɛt o ye, 27 “Kɛl ka ti dɔlli fʋ teŋgbauŋʋn la gaad. Ti na bɛ suoraug la zug ka kʋ fɛndig datiuŋ bɛɛ dagɔbʋga. 28 Kuosim diib nɛ ku'om tisi ti ka ti da' di ka nu. Kʋdim kɛl ka ti keŋ nɔba gaad, 29 nwɛnɛ Esau yaas banɛ bɛ Seir nɛ Moab dim banɛ bɛ Ar la niŋ si'em tisi ti, hali ti paae tinamɛ lɔ'ɔŋ Joodan n paae teŋ kanɛ ka Zugsɔb onɛ aan ti Wina'am tisi ti la. 30 Amaa Na'ab la zan'as ye ti kʋ gaadɛ. Zugsɔb onɛ aan ya Wina'am la kɛ ka o sʋnf digilim ka o zug kpɛ'ɛŋ ye li kɛ ka o lii ya nu'usin nwɛnɛ on niŋ si'em la.” 31 Zugsɔb la yɛlim ye, “Gɔsima, m pin'ili nɔkid Sihon nɛ o teŋgbauŋ la niŋidi ya nu'usin; nyaŋimini ba ka sʋ'ʋg o teŋ la.”
32 Sihon nɛ o soogianam la wʋsa da yi ye ba tʋ'ʋsi ti Jahaz teŋinɛ zab nɛ ti la, 33 Ka Zugsɔb onɛ aan ti Wina'am la nɔk o niŋi ti nu'usin ka ti nyaŋ o, on nɛ o biis nɛ o soogianam la wʋsa. 34 Saŋkan la ka ti faaɛn ba tempʋʋd la, ka kʋʋ ba dap nɛ ba pu'ab nɛ biis wʋsa, ka pʋ bas sɔ' ka o vʋ'ʋgɛ. 35 Amaa bʋnkɔnbid la nɛ dinɛ ka ti faaɛn tempʋʋdin la ti da zii kul ka li aan ti din. 36 Din yi Aroa linɛ bɛ Arnon bɔn'ɔg nɔɔrin la nɛ tempʋʋg dinɛ bɛ bɔn'ɔgin la, mɔr hali paae Gilead, tempʋʋg baa yinne kae gaadi ti paŋa. Zugsɔb onɛ aan ti Wina'am la zaŋi ba wʋsa tisi ti. 37 Amaa nwɛnɛ Zugsɔb onɛ aan ti Wina'am nɔɔr zi'elʋgʋ an si'em la, ya pʋ kpɛn' Ammon dim tɛɛnsin la, bɛɛ teŋ linɛ bɛ Yabok kɔldaug nɔɔrin la, bɛɛ tɛɛns banɛ bɛ kʋkʋna ni la.