Israel dim nyaŋ Keenan dim
21
1 Keenan dim na'ab onɛ da sʋ'oe Arad teŋ linɛ bɛ Negef teŋin la da wʋm ye Israel dim la da dɔl Atarim suor la kena la, o da yii tʋ'ʋsi zab nɛ Israel dim la ka nyaŋi gban'e ba sieba. 2 Israel dim la da kaanb, kaanb kaŋa tis Zugsɔb la ye, “Fʋ ya'a na kɛ ka ti nyaŋ nimbama, ti na san'ami ba teŋ la wʋsa tisif.” 3 Zugsɔb la da wʋmi ba fabʋlʋg ka kɛ ka ba nyaŋ Keenan dim la. Ba da kʋʋ ba wʋsa ka san'ami ba teŋ la wʋsa ka pʋdi li yʋ'ʋr ye Horma.aKʋntzɛn'ug waaf la yɛla
4 Ba da naam Hor zuorin la dɔl suokanɛ ken Atɛuk Zɛn'ugʋn la, ye ba dɛn'ɛn Edom teŋ baba. Amaa nidib la sʋnf da duonɛ pamm suorin la 5 ka ba pian' zɛrig Wina'am nɛ Moses, n yɛt ye, “Bɔ ka ya mɔri ti yi Egipt teŋin kena ye ti kpi mɔɔgin kpɛla? Diib kae! Ku'om kae! Ka ti mɛ pʋ bɔɔd diyɔɔd banɛ bɛ la!” 6 Dinzug Zugsɔb la da tʋm wa'atɔɔdi ba san'an; ka ba dum nidib la ka Israel dim bɛdegʋ kpi. 7 Nidib la da kɛn Moses san'an na yɛl o ye, “Ti tʋm taal tinamɛ pian' zɛrig Zugsɔb nɛ fʋ la. Sɔsim Zugsɔb la ka o yis wiigi la ti san'an!” Ka Moses da sɔs Wina'am nidib la yɛla. 8 Ka Zugsɔb la da yɛl Moses ye, “Maalim waafʋ nɔki tabil daugʋ sɛɛl sappi, ka onɛ wʋsa ka waaf dum o tun'e gɔsi li ka vʋ'ʋg.” 9 Moses da nɔk kʋntzɛn'ugʋ maal waafʋ ya'al daug zug. Ka onɛ wʋsa ka waaf da dum o ka o gɔdigi gɔsi li da vʋ'ʋgid nɛ.
Moab suor la yɛla
10 Israel dim la yʋ'ʋn da vurigi paae Obof teŋin. 11 Ka naam ani paae zi'en Iye Abarim, sian'anr kanɛ kpa' Moab n lɛbisid nintaŋi yit zin'isi'a na la. 12 Ba da naan ani paae Zered bɔn'ɔgin zi'en ani. 13 Ka yii ani keŋ la'as teŋ kanɛ bɛ Aanon kɔldaug la lɔm, sian'anr linɛ paae Ammon dim sʋ'ʋlim la ni. Aanon da anɛ Moab teŋ titɔndig, ka bɛ Moab nɛ Amor dim tɛɛns la teŋsʋk. 14 Linɛ kɛ ka gbauŋ kanɛ ka ba sɔb Zugsɔb zaba yɛla la yɛl ye, “Waheb linɛ bɛ Sufa teŋin nɛ li bɔn'ɔfaligin nɛ Aanon kɔldaug baba la 15 nɛ bɔn'ɔfalig linɛ zuligid hali ti paae Ar teŋin zin'ikanɛ lɛbid Moab titɔndigin la.”
16 Ba da yii ani tʋgisi paae teŋ kanɛ buon Beer la, bulkanɛ ka Zugsɔb la da yɛl Moses ye, “La'asim nidib la na ka m na tisi ba ku'om.”
17 Ala ka Israel dim da yʋ'ʋm yʋʋm kaŋa yɛt ye,
“Buliga bulim!
18 Yʋ'ʋmmi bulig kanɛ ka tuongatib tu,
ka ninsʋma yaae la yɛla,
banɛ zanl na'am dansaya nɛ duoya la.”
Ka ba naam mɔɔgin la keŋ paae Matana teŋin, 19 yi Matana teŋin keŋ paae Nahaliel ka yi Nahaliel keŋ paae Bamof 20 ka yi Bamof keŋ paae bɔn'ɔg kanɛ bɛ Moab zuokanɛ buon Piisig sisɛrim la lɛbisid Jesimon pipirig la baba.
Ban nyaŋ na'ab Sihon nɛ na'ab Og si'em
21 Israel dim la da tʋm nidib ye ba yɛl Amor dim na'ab onɛ yʋ'ʋri buon Sihon la ye, 22 “Ti bɛlimnɛ, kɛl ka ti dɔlli fʋ teŋin la gaad. Ti kʋ buŋi ya vain tiis pɔɔdin bɛɛ nu ku'om bulsi'a nii. Ti ye ti dɔl nɛ Na'ab Suoraug la tituaa hali nɛ tinamɛ na ti yii fʋ teŋin la.” 23 Amaa Sihon da pʋ siak ye ba dɔl ani gaadɛ. O da la'as o zabzabidib la tʋ'ʋs Israel mɔɔgin la. On da paae Jahaz teŋin la, o da zab nɛ Israel ani. 24 Israel da nyaŋi ba, ka faaɛn teŋ la lin naam Aanon ti paae Yabok kɔldaug, hali ti paae Ammon dim teŋ titɔndig la bɔzugɔ, teŋ kan da kpi'em nɛ hali. 25 Israel dim da nyaŋ Amor dim tempʋʋs la wʋsa ka zin'in ani, la'am nɛ Hesbon teŋ nɛ linɛ gilig la wʋsa. 26 Hesbon da anɛ Amor na'ab Sihon tempʋʋg, ka o da zab nɛ Moab na'akʋdʋg ka faaɛn o teŋ la ti paae Aanon kɔldaug la paas. 27 Linɛ kɛ ka onɛ siilim siiliŋ la yɛl ye,
“Kem Hesbon na ka kɛ ka li maligim mɛ';
kɛl ka Sihon teŋ la lɛn lɛbi li zin'igin.
28 Bugum da naam Hesbon yina,
bugum pielim yi Sihon teŋin na.
Li da kanb Ar teŋ linɛ bɛ Moab la,
nɛ banɛ sʋ'oe Aanon teŋ kʋkʋna la.
29 Yɛl paae ya, Moab dima!
Ya paam san'auŋ yanam banɛ wɔ'ɔgid Kemos la!
O nɔk o biribisi tis ka ba lieb wʋʋ banɛ zɔt nɛ
ka o bipumis lieb wʋʋ yammis nɛ tis Sihon onɛ an Amor na'ab la.
30 Amaa nannanna tinam san'ami ba wʋsa;
Hesbon san'am nɛ hali ti paae Dibon teŋin.
Ti nwa'ae li hali paae Nofa
teŋ kanɛ tiɛn hali ti paae Medeba la.”
31 Alazug Israel dim da zin'in Amor dim la teŋin.
32 Moses n da tʋm nidib ye ba keŋ labisi gɔs Jaza la nya'aŋ, Israel dim da zabi nyaŋ teŋ la nɛ li teŋkpɛmis la ka faaɛn li ka kad Amor dim banɛ bɛɛ ani la yis.
33 Ba yʋ'ʋn da fɛndigi nɔk suori kpa' Basan, ka Og onɛ an Basan na'ab la la'as o zabzabidibi tʋ'ʋsi ba Edire teŋin zab nɛ ba. 34 Zugsɔb la yɛl Moses ye, “Da zɔɔ o dabiem, ka m gban'e ba tisi ya sa, on nɛ o zabzabidib la nɛ o teŋ la wʋsa. Maalim o wʋʋ fʋn da maal Sihon onɛ an Amor dim na'ab ka da sʋ'oe Hesbon teŋ si'em la.” 35 Ba da kʋ Na'ab Og nɛ o biis, nɛ o zabzabidib la wʋsa, ka sɔ' pʋ kpɛlim; ka da di'e o teŋ la sʋ'ʋg.