Ku'om yi tampiingin na si'em
20
1 Nwadkanɛ daa pin'in la ni Israel buudi la wʋsa da paae Zin mɔɔgin la zin'in Kades teŋin. Ani ka Miriam da kpi ka ba mum o.2 Saŋkaŋa ku'om da kae ka nidib la na nuu, ka ba la'as taaba nyɔn Moses nɛ Aaron. 3 Ba da zabid nɛ Moses ka yɛt ye, “Ti ya'a kpiin wʋʋ ti ba'abiis la daa kpi Zugsɔb la tuon si'em la naan sɔn'ɔn 4 Bɔ ka fʋ mɔr Zugsɔb nidib la kɛn mɔɔgin kpɛla na, ye tinam nɛ ti bʋnkɔnbid la kpi kpɛla? 5 Bɔ ka fʋ mɔri ti yi Egipt teŋin kɛn zin'itɔɔg kaŋa ni na? Diib bɛɛ kekama kae, pomanganɛt nɛ bʋnnuuda mɛ kae. Ka ku'om mɛ kae nuuda.” 6 Moses nɛ Aaron yi nidib la san'anɛ keŋ La'asʋg Fuug Sʋgʋr la za'anɔɔrini vanbin Zugsɔb la tuon, ka o girima sigi ba san'an na. 7 Zugsɔb la da yɛl Moses ye, 8 “Nɔkimi fʋ dansaar la ka fʋn nɛ Aaron la'as nidib la wʋsa. Pian'am tis tampiing la ka ba nini nyɛ, ka li na kpa'ae ku'okanɛ bɛɛ li ni la wʋsa yis na. Fʋ na paam ku'om tampiingin la ka nidib la nɛ ba bʋnkɔnbid la wʋsa nu.”
9 Moses sid da nɔk dansaar la Zugsɔb la nini ni wʋʋ on yɛl o si'em la. 10 Ka Moses nɛ Aaron da la'as nidib la tampiing la tuon ka Moses yɛl nidib la ye, “Kɛlisimi yanam nyɔnyɔlʋg dima, li anɛ tilas ye ti kɛ ka ku'om yi tampiing kaŋa ni naa?” 11 Ani ka Moses ʋk dansaar la nwɛ' tampiing la nɔɔr ayi' ka ku'om da tansi yina, ka nidib la nɛ ba bʋnkɔnbid la wʋsa nu.
12 Amaa Zugsɔb la da yɛl Moses nɛ Aaron ye, “Yanamɛ pʋ niŋ mam yadda bɛɛ na'as mam wʋʋ onɛ an kasi Israel nidib tuon la, ya kʋ mɔr nidib la keŋi kpɛn' teŋ kanɛ ka m tisi ba laa.”
13 Nɛ' da an Meribaa teŋ ku'om, zin'ikanɛ ka Israel dim da zabid nɛ Zugsɔb ka o pa'ali ba ye o anɛ kasi la.
Edom na'abi pʋ tis Israel dim suor la yɛla
14 Ban da nam bɛ Kades la, Moses da tʋm nidib ye ba kem yɛl Edom na'ab ye; “Israel dim banɛ aan fʋ ba'abiis la yɛl si'eli nwa: ‘Fʋ mi' tɔɔg kanɛ paae ti la, 15 ti yaanam da keŋ Egipt teŋin ka ti da bɛɛ ani yʋma bɛdegʋ. Egipt dim la da namisi ti nɛ ti yaanam la, 16 amaa ti da kaasi tis Zugsɔb la, ka o wʋmi ti kukuma ka tʋm o maliak ka o yisi ti Egipt teŋin na. 17 Ti bɛlimnɛ, kɛl ka ti dɔlli fʋ teŋin la gaad. Ti kʋ buŋi ya vain tiis pɔɔdin bɛɛ nu ku'om bulsi'a nii. Ti ye ti dɔl nɛ Na'ab Suoraug la tituaa ka kʋ buŋi lɛb datiuŋ bɛɛ dagɔbʋga hali nɛ tinamɛ na ti yii fʋ teŋ la ni fas.’ ” 18 Amaa Edom na'ab da lɛbis ye, “Mid ka ya gaad kpɛla; ya ya'a zi' ka mak, ti na yina tʋ'ʋsi ya nɛ zaba.” 19 Israel dim la da lɛbis ye, “Ti ye ti dɔl nɛ suoraug la, ka tinam bɛɛ ti bʋnkɔnbʋg ya'a nuu ya ku'osi'a wʋsa, ti na yɔɔ li sam. Ti kʋdim bɔɔd ye ti gaadnɛ nɔba; si'el pʋ lɛm paasɛ.” 20 Ka ba lɛn lɛbis ye, “Ya kʋ gaad kpɛla!” Edom na'ab da yina tʋ'ʋsi ba nɛ soogianam bɛdegʋ banɛ kpi'em. 21 Edom dimi da pʋ siak ye ba dɔlli ba san'anɛ gaad la zug, Israel dim la da fɛndigi tiak suor ka basi ba.
Aaron kum yɛla
22 Israel nidib la wʋsa da yi Kades teŋin keŋ paae zuokanɛ buon ye Hor la. 23 Ban da paae Hor zuorin linɛ kpi'e Edom titɔndig la, Zugsɔb la da yɛl Moses nɛ Aaron ye, 24 “Aaron na maal ka'alim. O kʋ kpɛn' teŋ kanɛ ka m tis Israel dim la, bɔzugɔ ya nidib ayi' la wʋsa ki'isi m nɔɔr Meriba, ku'om la zin'igin. 25 Dɔl Aaron nɛ o biig Elieza dʋ zuokanɛ buon ye Hor la zugin. 26 Yɛɛgim Aaron fuug la yɛɛli o biig Elieza, bɔzugɔ Aaron na maal ka'alim; o ye o kpinɛ ani.”
27 Moses da niŋ wʋʋ Zugsɔb la yɛl o si'em la. Ba da dʋ zuokanɛ buon Hor la zug nidib la wʋsa nini ni. 28 Moses da yɛɛg Aaron fuug la yɛɛli o biig Elieza. Aaron da kpii ani nɔɔ, zuor la zug. Ka Moses nɛ Elieza sig teŋin na. 29 Ka Israel dim la wʋsa, da baŋ ye Aaron kpiya la ba da kum o yɛla dabisa pistan'.