Ku'okanɛ na kɛ ka ba an nyain la yɛla
19
1 Zugsɔb da yɛl Moses nɛ Aaron ye 2 Zugsɔb la zi'el zi'elsi'a nwa: Yɛlim Israel dim la ye ba mɔr na'asa'azin'a kanɛ pʋ mɔr dɛŋŋa ka ba mɛ nan zi' nɔk o kuaa. 3 Nɔkimi li tis Elieza onɛ an maanmaan la ka o kɛ ka ba zaŋi yii ya la'asʋg zin'ig la yiŋi kɔdig o, o nini ni. 4 Elieza onɛ an maanmaan la na nɔk o nu'ubili tin'e ziim la misig nɔɔra ayɔpɔi kpa' La'asʋg Fuug Sʋgʋr la tuon. 5 O na zi'e gɔt ka ba nyu'oe naaf la gbauŋ nɛ ni'im nɛ ziim nɛ pʋt nɛ o pʋʋgin la'ad wʋsa ka li kanb. 6 Maanmaan la anɛ ye o nɔk na'aziinr dibir nɛ nyulinnyu'us nɛ pien zɛn'ugʋ lɔs bugum kanɛ dit naaf la ni. 7 Lin nya'aŋ maanmaan la na pie o fuug ka sʋ ka yʋ'ʋn na tun'e lɛb la'asʋg la zin'igin, amaa o kʋ an nyainnɛ asɛɛ li ti paae zaam. 8 Dau kanɛ nyu'oe naaf la bugum la anɛ o pie o fuud ka sʋ, ka kʋ an nyainnɛ, asɛɛ li ti paae zaam. 9 Dau kanɛ an nyain na ku'ol tampɛligim la nɔki niŋ zin'ikanɛ an nyain ka bɛ la'asʋg zin'ig la yiŋ. Israel dim la na nɔki li digil ka lin an linɛ na niŋid ku'okanɛ ka sɔ' na pie o mɛŋ ka lieb nyain la ni; li anɛ linɛ piedi yisid tʋʋmbɛ'ɛd. 10 Onɛ mɛ ku'ol naaf la tampɛligim la mɛ anɛ ye o pie o fuug, on mɛ kʋ an nyainnɛ asɛɛ li ti paae zaam. Nɛ' na an zi'elʋg linɛ na bɛ saŋa wʋsa tis Israel dim nɛ saam banɛ bɛ nɛ ba la.11 Onɛ wʋsa si'is kum na lieb dian'ad sɔb daba ayɔpɔi. 12 Li anɛ tilas ye o pie o mɛŋ nɛ ku'om la daba atan' nɛ daba ayɔpɔi daar, ka nyaan lieb nyain. Amaa o ya'a pʋ pie o mɛŋ daba atan' nɛ daba ayɔpɔi la daare, o kʋ lieb nyainnɛ. 13 Onɛ wʋsa si'is kum ka pʋ pie o mɛŋa, o sɔb dian'anɛ Fuug Sʋgʋr la. Ba yisim on daana Israel buudi ni. Bɔzugɔ ba pʋ misig o ku'okanɛ kɛt ka nid liebid nyain la, o anɛ dian'ad sɔb; ka o dian'ad la na kpɛlim o mɛŋ zug.
14 Sɔ' ya'a kpi sʋgʋrin li zi'elʋgʋ nwa: Onɛ kpɛn' dɔɔgin la bɛɛ onɛ bɛ dɔɔg la pʋʋgin na kilim dian'ad sɔb daba ayɔpɔi; 15 lauk kanɛ wʋsa mɛ bɛ ani ka liŋ pʋ pibili li na lieb dian'ad lauk. 16 Sɔ' ya'a bɛ paalʋ ka si'is onɛ ka ba kʋʋ o nɛ sʋ'ʋg bɛɛ onɛ kpii a-daar-paaeya kum bɛɛ onɛ si'is ninsaal kɔnbir bɛɛ yaʋg, on sɔb na lieb dian'ad sɔb daba ayɔpɔi.
17 Onɛ lieb dian'ad sɔb, yanam nɔkim na'asa'abil kanɛ ka ya kanbis ka li an pier maan la tampɛligim la niŋ gan'ar pʋʋgin ka su ku'okanɛ an nyain. 18 Dau kanɛ an nyain malʋŋ pʋʋgin na nɔk nyulinnyu'usi tʋm ku'omin la misig dɔɔg la, nɛ di la'ad wʋsa, nɛ nimbanɛ pʋn dɛŋi bɛɛ ani la wʋsa. O mɛ na misig onɛ wʋsa si'is ninsaal kɔnbir bɛɛ kum bɛɛ yaʋg la. 19 Onɛ an nyain la na misig onɛ ka' nyain la daba atan' nɛ ayɔpɔi la daar. Onɛ ka ba pie o ka o lieb nyain la na pie o fuug ka sʋ nɛ ku'om ka lieb nyain zakan nɔɔ. 20 Amaa onɛ lieb dian'ad sɔb ya'a pʋ siak ye o maal o mɛŋ nyainnɛ, li anɛ tilas ye ba yis o nidibin la, bɔzugɔ o dian'a Zugsɔb Fuug Sʋgʋr la. Ka ku'okanɛ kɛt ka ba liebid nyain la mɛ pʋ misig oo, ka o an dian'ad sɔb. 21 Lina na aan ba zi'elʋg saŋa wʋsa. “Onɛ nɔk ku'okanɛ na kɛ ka ba lieb nyain la misig, asɛɛ ka o mɛ pie o fuud, ka onɛ si'is ku'om la na kilim dian'ad sɔb asɛɛ li ti paae zaam. 22 Bʋn linɛ wʋsa ka onɛ ka' nyain la si'is na lieb dian'ad, ka onɛ mɛ si'isi li na lieb dian'ad sɔb asɛɛ li ti paae zaam.”