Maanmaan nɛ Levi dɔɔg la tʋʋma
18
1 Zugsɔb la da yɛl Aaron ye, “Nidib ya'a tʋm taali pɔ'ɔg Zugsɔb Fuug Sʋgʋr la, li na ziil nɛ fʋn nɛ fʋ biis nɛ fʋ saam yidim, amaa li ya'a anɛ taal kanɛ pɔ'ɔg maanmaannib tʋʋma la, li na ziil nɛ fʋn nɛ fʋ biis la ma'aa. 2 Mɔri fʋ Levi taaba la kena ka ba sʋ'ʋŋif fʋn nɛ fʋ biis la ya'a ti maan maana Nɔnaar Fuug Sʋgʋr la tuon. 3 Ba anɛ ye ba kɛlis fʋn yɛt si'el, ka tʋm tʋʋma la wʋsa Pʋ'ʋsim Sʋgʋrin la, amaa ba mid ka ba li'el Fuug Sʋgʋr la la'ad la ka ban nɛ fʋn wʋsa na kpi. 4 Ba na la'as nɛ fʋ gɔsid zin'ikanɛ an La'asʋg Fuug Sʋgʋr la nɛ tʋʋm kanɛ bɛɛ ani la wʋsa, ka sɔ'ɔsɔ da li'el yanamɛ bɛ si'el la na. 5 Ya tʋʋma anɛ ye ya gɔt Kasi Zin'ig la nɛ maan daka la ka m sʋnpɛɛn da paae Israel dim la ya'asɛ. 6 Mam mɛŋi gaŋi ya Levi taaba la Israel dim la sʋʋgin ka ba an wʋʋ piini tisi ya. M pɛsigi ba tis Zugsɔb la ye ba tʋm La'asʋg Fuug Sʋgʋrin la. 7 Amaa fʋn nɛ fʋ biis la ma'aa na tʋm maan la tʋʋma nɛ maan daka yɛla nɛ linɛ bɛ fuug linɛ bɛŋ la pʋʋgin. M tisif maan tʋʋma la nɛ ka li an piini. Ninkanɛ pʋ nar ye o li'el Fuug Sʋgʋr la ya'a li'el, yanam on kʋʋm o.”8 Zugsɔb la da lɛn yɛl Aaron ye, “Mam mɛŋi kɛ ka fʋ sʋ'oe maana linɛ ka ba maannɛ tisid mam la; maan banɛ ka Israel dim maannɛ tisid mam ka li an kasi la, manɛ nɔki tis fʋn nɛ fʋ biis ye li aan ya din saŋa wʋsa. 9 Fʋ na sʋ'oe maan kanɛ an kasi ka ba pʋ nɔki nyu'oe nɛ bugum. Maan banɛ ka ba mɔr na wʋsa ka li an kasi la, li ya'a anɛ zʋʋd maan bɛɛ tʋʋmbɛ'ɛd bɛɛ taal maana, li anɛ fʋn nɛ fʋ biis din. 10 Dimi li wʋʋ bʋn linɛ an kasi; dau wʋsa anɛ ye o dii li. Li anɛ tilas ye ya gɔsi li ka li an kasi. 11 Linɛ wʋsa ka ba yisi lii li kɔn' nyɔɔsʋŋ maan la ni mɛ na anɛ fʋ din. M nɔki li tis fʋn nɛ fʋ bipumis nɛ biribis saŋa wʋsa. Onɛ wʋsa bɛɛ fʋ yin la ka an nyain wʋʋ malʋŋ la bɔɔd si'em la tun'e dii li. 12 Ban zaŋid olif kpavɛnliŋ si'a nɛ daam linɛ an sʋm nɛ zʋʋd linɛ ka ba tisid man Zugsɔb la nɛ bʋndɛɛnna wʋsa anɛ fʋ din. 13 Bʋndɛɛŋ linɛ wʋsa yi teŋgbauŋʋn la ka ba mɔri kɛn Zugsɔb la san'an na, anɛ fʋ din. Onɛ wʋsa bɛɛ fʋ yin la ka an nyain wʋʋ malʋŋ la bɔɔd si'em la tun'e dii li. 14 Linɛ wʋsa bɛ Israel teŋin ka ba pɛsigi tis Zugsɔb la anɛ fʋ din.”
15 Linɛ wʋsa du'a yiiga ka an ninsaal nɛ bʋnkɔnbʋg wʋsa, ka ba pɛsigi li tis Zugsɔb la anɛ fʋ din. Amaa asɛɛ ka fʋ siak ka ba da' ninsaal bikpɛŋ bɛɛ bʋnkɔnbʋg kanɛ wʋsa ka malʋŋ la pʋʋgin ka o ka' nyain la bikpɛŋ. 16 Ba ya'a ti an wʋʋ nwadig la, asɛɛ ka fʋ kɛ ka ba da' ba wʋʋ lin nar ye ba da' ba si'em nɛ anzurifa gbila anu, ka li na an Wina'am Fuug Sʋgʋr ligidi, ka' daar wʋsa ligidi. 17 Amaa li ya'a an na'araug bɛɛ pɛ'og bɛɛ bʋʋg bikpɛŋ, yanam da siak ka ba da' baa, ban an kasi la zug. Ti'eliminɛ ba ziim misig maan daka la, ka nyu'oe kpaam la nɛ bugum ka li nyuug la na malisi tis Zugsɔb la. 18 Ba ni'im la na aan fʋ din, nwɛnɛ kugsir linɛ ka ba ɛɛn nyɔɔsim la, nɛ datiuŋ gbɛr la aan fʋ din si'em la.
19 “Linɛ wʋsa ka ba yisi li kɔn' maan linɛ an kasi ka Israel dim kenna maannɛ tisid Zugsɔb la, m nɔki li tis fʋn nɛ fʋ biribis nɛ bipumis ka li na aan ya din saŋa wʋsa. Li anɛ nɔnaar kanɛ ka' bɛn ka Zugsɔb la maal nɛ fʋn nɛ fʋ yaas wʋsa.”
20 Zugsɔb la da yɛl Aaron ye, “Fʋ kʋ mɔr faar bɛɛ pʋʋr teŋ la nii; manɛ aan fʋ pʋʋr nɛ fʋ faar Israel dim la sʋʋgin. 21 Manɛ tis Levi dɔɔg la bʋn linɛ bɛ Israel wʋsa pʋdigir piiga vaar yinne ye li aan ba faar ban tʋm tʋʋm si'a La'asʋg Fuug Sʋgʋrin la zug. 22 Lin yi nannanna ken sa, Israel dim la mid ka ba li'el La'asʋg Fuug Sʋgʋr la ka ya'a ka' ala, taal la na kpɛlimi ba zug ka ba kpi. 23 Li anɛ Levi buudi la na tʋm La'asʋg Fuug Sʋgʋr la tʋʋma ka zi taal kanɛ wʋsa tʋm tisi li. Nɛ' anɛ zi'elkanɛ na bɛ hali ti paae zʋmaaŋ kanɛ na ti kena. Ba kʋ paam faar Israel dim la san'anɛ. 24 M lɛɛ zaŋ bʋn linɛ wʋsa ka Israel dim pʋdigir yinne piiga pʋʋgin ka li an man din la tis Levi dɔɔg la ye li aan ba faar. Linɛ kɛ ka m yɛti ba yɛla ye, ba kʋ mɔr faar Israel dim san'an la.”
25 Zugsɔb la da yɛl Moses ye, 26 “Yɛlim Levi dɔɔg dim la ye ba ya'a di'e pʋdigir yinne piiga pʋʋgin Israel dim la san'an, bam mɛ yisim ayinne pʋdigir piiga pʋʋgin tis Zugsɔb la ka li an maannɛ tis o. 27 Ya maan la na an wʋʋ ki ɛɛn yi zieŋin na la bɛɛ ban nwiakid daam zin'isi'a la. 28 Ala mɛn ka ya mɛ na yis yanamɛ di'e si'el Israel dim san'an la ayinne pʋdigir piiga pʋʋgin maal piini tis Zugsɔb la. Ya na yis yinne pʋdigir piiga kaŋa ni linɛ an Zugsɔb la din la tis Aaron onɛ an maanmaan la. 29 Li anɛ tilas ye ya tis Zugsɔb la bʋn banɛ wʋsa ka ya di'e la, linɛ an sʋ'ʋm nɛ linɛ an kasi.” 30 Yɛlim Levi dɔɔg la ye, “Ya ya'a nɔk linɛ an sʋ'ʋm tis Zugsɔb la, li na nwɛnɛ ki yii ya zieŋin na, bɛɛ daam yi ban nwiakid zin'isi'a la na. 31 Yanam nɛ ya yidim na nyaŋi di linɛ kpɛlim la zin'ig wʋsa. Bɔzugɔ li anɛ yɔɔdi tisi ya, yanamɛ tʋm La'asʋg Fuug Sʋgʋrin la zug. 32 Ya ya'a tis Zugsɔb la linɛ nar la yiiga, ya kʋ kpɛn' taalin nɛ linɛ kpɛlim la; li na kɛ ka ya kʋ dian'a maana banɛ an kasi ka Israel dim maannɛ tisid Zugsɔb la; ala ka ya kʋ kpii.”