Aaron balaari bus ka wal la yɛla
17
1 Zugsɔb la da yɛl Moses ye, 2 “Yɛlim Israel dim la ka ba bɔ dansaya piiga nɛ ayi' na, dɔɔg wʋsa tuongat nɛ o dansaar. Ka sɔb tuongat wʋsa yʋ'ʋri tabili o dansaar la ni. 3 Levi dɔɔg dansaar la zug sɔm Aaron yʋ'ʋri tabil, bɔzugɔ dɔɔg wʋsa tuongat anɛ ye o mɔr o dansaar na. 4 Ti'ilimi ba La'asʋg Fuug Sʋgʋrin Nɔnaar Daka la tuon, zin'ikanɛ ka m ɛɛn kena sia'ali ya la. 5 Man gaŋ sɔ' la dansaar na bus vaand, ala ka m na kɛ ka nyɔnyɔlis linɛ ka Israel dim la nyɔnnif daar wʋsa la kpi.”6 Moses da yɛl Israel dim la ka ba tuongatib la tis o dansaya piiga nɛ ayi', dɔɔg tuongat wʋsa nɛ o dansaar ka Aaron dansaar mɛ pɛ'ɛs. 7 Moses da ti'il dansaya la Zugsɔb la tuon Nɔnaar Fuud Sʋgʋrin la. 8 Bɛogʋ da nie ka Moses kpɛn' Sʋgʋrin la ka nyɛ ka Aaron dansaar, linɛ zi'e Levi dɔɔg yɛla la bus vanpɔla hali ka pu puum ka wal wala. 9 Moses da vaae dansaya la wʋsa Zugsɔb Fuug Sʋgʋrin la yina. Ba da gɔsi ba, ka sɔ' wʋsa nɔk o dansaar. 10 Zugsɔb la da yɛl Moses ye, “Lɛbisim Aaron dansaar la ti'il Nɔnaar Daka la tuon ka li an zanbinnɛ tis banɛ nyɔn la. Nɛ' na kɛ ka ba bas man nyɔnyɔlʋg, ka da kpii.” 11 Moses da niŋ wʋʋ Zugsɔb la pa'al o si'em la.