<<    <     Kaalʋg     16     >    >> 
Kora nɛ Datan nɛ Abiram yɛla
16
1  Kora onɛ an Izar biig, ka yi Levi dɔɔgin nɛ Kohat tuŋʋn la, nɛ Reuben ninsieba nɛ Datan nɛ Abiram banɛ an Eliab biis la nɛ on onɛ an Pelef biig la da duoe taawai 2 ka ki'is Moses. Banɛ da pɛ'ɛsi ba zug da anɛ Israel nidib dap kɔbisyi' nɛ pisnu, banɛ ka ba mi' ba sʋ'ʋŋa nidibin la, ka mɛ lɛn gaŋi ba ka ba bɛ tu'am zin'igin la. 3 Ba da la'as taaba kena ye ba ki'is Moses nɛ Aaron ka yɛli ba ye, “Ya bʋn la yʋ'ʋn tʋʋg nɛ! Israel la'asʋg pʋʋgin sɔ' wʋsa anɛ kasi, ka Zugsɔb la bɛɛ ba ni. Bɔ ka yanam maali ya mɛŋ kpɛɛmnamɛ dʋ'ʋsi ya mɛŋ Zugsɔb nidib la wʋsa tuonnɛ?” 4 Moses n da wʋm nɛ' la o da luu avanba, 5 ka yɛl Kora nɛ o nya'andɔlib la ye, “Bɛkɛung, Zugsɔb la na pa'al banɛ aan o nidib nɛ banɛ an kasi la, ka kɛ ka ba vurigi li'eli o tuon. On gaŋ dau sɔ' la o na kɛ ka o kɛɛn o tuon na. 6-7 Fʋn Kora, nɛ fʋ nya'andɔlib la wʋsa saa na niŋ si'eli nwa: bɛog, ya na nɔk bʋnnyubisa nyu'or laas, ka nɔki bʋnnyubisa nyu'oe laasin la keŋ Zugsɔb la tuon. Dau kanɛ ka Zugsɔb gaŋ la, onɛ an kasi. Yanam Levi dɔɔg dim la fannɛ nu'ug.”
8 Ka Moses mɛ yɛl Kora ye, “Kɛlisimi, yanam Levi dɔɔg dima! 9 Li pʋ sia'ali ya nɛ Israel Wina'am la gaŋi ya yisi ya taaba banɛ an Israel buudi la sʋʋgin laa? Ka o pʋ vurigi ya li'eli o tuon ye ya tʋmi o Pʋ'ʋsʋg Fuug Sʋgʋrin tʋʋma ka zi'en nidib la tuonnɛ tʋmmi tisidi ba la? 10 O vurig yanam nɛ ya Levi dim taab la miri o mɛŋ, amaa nannanna ya lɛm bɔɔd ye ya di'enɛ maanmaannib tʋʋma la ya'as. Ayei, ala ka' suorɛ. 11 Yanamɛ la'asidi zabid sɔ' anɛ Zugsɔb la. Aaron aan anɔ'ɔn ka ya nyɔn o yɛla?”
12 Moses da tʋm buol Datan nɛ Abiram banɛ an Eliab biis la, ka ba yɛl ye, “Ti kʋ kenaa! 13 Fʋn mɔri ti yi teŋ kanɛ pʋbid bin'isim nɛ siind la ni kena ye fʋ kʋʋ ti mɔɔgin kpɛla la pʋ siakɛɛ ka lɛm bɔɔd ye fʋ mugusi tii? 14 Linɛ pɛ'ɛs la, fʋ pʋ mɔri ti keŋ paae teŋ kanɛ pʋbid bin'isim nɛ siind bɛɛ tisi ti faar linɛ an kuob bɛɛ tiwanna pɔɔgɔ. Fʋ tɛn'ɛs ye fʋ na pan'as nimbama? Ayei, ti kʋ kenaa!” 15 Moses sʋnf da duoya ka o yɛl Zugsɔb la ye, “Da lɛn di'e ba maannɛ. Bɔzugɔ mam pʋ di'e si'eli ba san'anɛ, hali baa bʋŋ yinne gba, ka mɛ pʋ maali ba sɔ' si'el linɛ an bɛ'ɛdɛ!”
16 Moses da yɛl Kora ye, “Bɛog fʋn nɛ fʋ nya'andɔlib wʋsa na kɛn Zugsɔb la tuon na, la'am nɛ Aaron. 17 Sɔ' wʋsa na nɔk o laa linɛ ka ba nyu'od bʋnnyubisa li ni tisid Zugsɔb la, ka li wʋsa na la'as nɛ kɔbisyi' nɛ pisnu, kɛn Zugsɔb la san'an na. Fʋn nɛ Aaron mɛ na la'as nɛ ba ka ya nɔki ya mɛŋ bʋnnyubisa laas la na.” 18 Sɔ' wʋsa sid da nɔk o laa niŋ bugum li pʋʋgin nɛ bʋnnyubisa ka zi'en Moses nɛ Aaron tuon La'asʋg Fuug Sʋgʋr la za'anɔɔrin. 19 Kora da la'as o nimbanɛ maan taawai la na ka ba zi'en La'asʋg Fuug sʋgʋr za'anɔɔrin la.
Ka Wina'am girima kpɛn nie na ka nidib la wʋsa nyɛ. 20 Ka Zugsɔb yɛl Moses nɛ Aaron ye, 21 “Bakimi ya mɛŋ ka kɛ nimbama, ka m kʋʋ ba vuguri.” 22 Amaa Moses nɛ Aaron da luu avanba kaas ye, “Wina'am, Wina'am, fʋn onɛ an ninsaal wʋsa vʋm, fʋ sʋʋnr na duoe nɛ nimbama wʋsa nid yinne tʋʋmbɛ'ɛd zugɔɔ?” 23 Ka Zugsɔb la yɛl Moses ye, 24 “Yɛlim nidib la ye ba yisimi ba mɛŋ paalʋ ka bas Kora nɛ Datan nɛ Abiram sʋga la.”
25 Moses da dɔl Israel kpɛɛmnam la keŋ Datan nɛ Abiram san'an 26 ka yɛl nidib la ye, “Da li'eli nimbɛ'ɛd bama sʋga laa, bɛɛ si'isi linɛ wʋsa aan ba laukɔ ka ya na kpi nɛ ba, ba tʋʋmbɛ'ɛd la zug.” 27 Alazug ba da vurig ka bas Kora nɛ Datan nɛ Abiram dɔɔd la. Ka ba yina zi'enɛ ba dɔɔd la za'anɔɔrin nɛ ba pu'ab nɛ ba biis wʋsa. 28 Moses da yɛl nidib la ye, “Anwana ka ya na baŋ ye Zugsɔb la tʋm mam na ye m maal nɛ'ɛnam wʋsa, ka ka' mam mɛŋ ya'am. 29 Nimbama ya'a kpi a-daar-paaeya kum, alaa Zugsɔb la pʋ tʋm mam naa. 30 Amaa Zugsɔb la ya'a kɛ ka yɛl saaŋ niŋ, ka teŋ la buaki vɔli ba vʋt nɛ ba la'ad wʋsa, lin ka ya na baŋ ye nimbama sid tʋm Zugsɔb la linɛ kae.” 31 Moses n pian' naae la nɔɔ, ka ban zi'e zin'isi'a la buak zin'is ayi' 32 ka teŋgbauŋ la ya'ae o nɔɔri vɔli ba nɛ ba yidim wʋsa nɛ Kora nidib la nɛ ba la'ad wʋsa. 33 Ba da sig bʋmbɔk la pʋʋg la'am nɛ ba la'ad wʋsa, ka teŋ la lɛbi mubil ka ba kpɛlim ani. 34 Ban da kaasid kuŋ la ka Israel dim banɛ bɛɛ ani la da zɔt ka tansid ye, “Teŋ la mɛ bɔɔdi vɔli ti nɛ!” 35 Bugum daa naam Zugsɔb la san'an kena kanb nidib kɔbisyi' nɛ pisnu banɛ kɛn Zugsɔb la tuon na ye ba maal bʋnnyubisa nyu'or maan la wʋsa.
36 Zugsɔb la da yɛl Moses ye, 37 “Yɛlim Elieza onɛ an Aaron biig ka an maanmaan la ye o yisim laas banɛ ka bugum la di nɛ nidib la, ka ba anɛ kasi. Ka kɛ ka ba mɔri ba keŋ lallisa kpa'as bugumsaana nɛ bʋnnyubisa la bas. 38 Nimbanɛ kpi ba tʋʋmbɛ'ɛd zug la laasi la. Ya nɔkimi lii zan' lammiri ligil maan daka la, bɔzugɔ ba daa nɔki li tis Zugsɔb la ka li lieb kasi tis o. Kɛl ka li an zanbinnɛ tis Israel buudi la.”
39 Eleazar sid da vaae kʋntzɛn'ug laas banɛ ka bugum la da dii ba la mɔr na zan' ligil maan daka la, 40 nwɛnɛ Zugsɔb la pa'al o si'em yi Moses san'an la. Nɛ' da anɛ ye li tiɛn Israel dim ye ya'a ka' Aaron tuŋ la ma'aanɛ, sɔ' ka' suori na kɛn Zugsɔb la tuon na maal maannɛ. Onɛ mak, li na niŋ o wʋʋ Kora nɛ o nya'andɔlib la nɛ.
41 Bɛogʋ da nie la, Israel dim la wʋsa da nyɔnnɛ Moses nɛ Aaron ye, “Yanamɛ kʋ Zugsɔb nidib la!” 42 Amaa ban da pian' Moses nɛ Aaron n naae ka fɛndigi kpa' La'asʋg Fuug Sʋgʋr la, tɔ'ɔtɔ ka saŋgbauŋ sigi li zugin na ka Zugsɔb girima nie na. 43 Ka Moses nɛ Aaron keŋ La'asʋg Fuug Sʋgʋr la tuon, 44 ka Zugsɔb la yɛl Moses ye, 45 “Yim nimbama sʋʋgin ka m san'ami ba vuguri.” Ka babayi' la wʋsa vanbin teŋin. 46 Ka Moses yɛl Aaron ye, “Nɔkimi fʋ laa la ka niŋ bʋnnyubisa li pʋʋgin, nɛ bugum linɛ bɛ maan daka la zug, ka keŋ nidib la bɛ si'el la tɔ'ɔtɔɔ maal maannɛ sɔs suguru tisi ba. Zugsɔb la sʋnf pʋn duoe nɛ nidib la nɛ ka tɔɔg pʋn pin'il.” 47 Aaron da niŋ wʋʋ Moses n yɛl o si'em la ka zɔɔ keŋ kpɛn' nidib la sʋʋgin. Tɔɔg la daa pʋn pin'il nidib la ni, amaa Aaron da nyu'oe bʋnnyubisa linɛ an suguru sɔsʋg maan la nidib la yɛla. 48 O da zi'en banɛ kpi nɛ banɛ vʋe la teŋsʋk, ka tɔɔg la gu'oe. 49 Amaa tɔɔg la da kʋ nidib tusa piiga nɛ anaasi nɛ kɔbisyɔpɔi, paas banɛ kpi ka li anɛ Kora yɛla la. 50 Aaron da lɛb Moses san'an La'asʋg Fuug Sʋgʋr za'anɔɔrin, bɔzugɔ tɔɔg la da gu'oya.