Maana piini banɛ pɛ'ɛs la yɛla
15
1 Zugsɔb da yɛl Moses ye, 2 “Yɛlim Israel dim la ye; ba ya'a ti kpɛn' teŋ kanɛ ka m ye m tisi ba ka ba sʋ'ʋgi li la naae 3 ba na maal maana tis man onɛ an Zugsɔb la ka li nyuug na malisi tisim. Ba ya'a maan nyu'or maan bɛɛ maan kanɛ ka ba kaanbi zi'el bɛɛ ya'amlɛog maan bɛɛ maan sieba, linɛ aan ya niigi bɛɛ kɔnbid, 4 onɛ mɔr o maan na ye o tis Zugsɔb la na mɔr o zʋʋd maan linɛ an zɔm baanlig kuriba ayi' gɛndig nɛ kpaam kɔlibir yinne pɛ'ɛs. 5 Pɛribig wʋsa linɛ na maal nyu'or maan la bɛɛ maan buudi wʋsa, on bɔɔm daam yubʋg yinne pɛ'ɛs ka li an bʋnnuuda maan. 6 Li ya'a anɛ pɛraug, on maalim zʋʋd maan nɛ zɔm kuriba anaasi gɛndig nɛ kpaam kɔlibir nɛ pʋsʋk, 7 nɛ daam yubig nɛ pʋsʋk ka li an bʋnnuuda maan. Li anɛ piinkanɛ nyu'od ka li nyuug la malisi tis Zugsɔb la. 8 O ya'a mɔr na'araug na ye o maal maan linɛ nyu'od, bɛɛ maal maan ka li anɛ kaanbʋg, bɛɛ taaba la'asʋg maan na tis Zugsɔb, 9 on mɔr na'araug nɛ zʋʋd maan linɛ an zɔm kuriba anu gɛndig nɛ kpaam kɔliba ayi'. 10 Ka mɛ mɔr daam yubis ayi' na ka li an bʋnnuuda maan. Li anɛ piinkanɛ nyu'od ka li nyuug la malisi tis Zugsɔb la. 11 Li ya'a anɛ na'araug bɛɛ pɛraug bɛɛ pɛribig bɛɛ bʋribig wʋsa, ala ka ya na maal. 12 Bʋnkɔnbid la ya'a zu'oe, yanam maalim nwɛnɛ mam pa'ali ya si'em la.13 “Onɛ ka ba du'a o ka o an Israel nid wʋsa anɛ ye o maal anwa o ya'a mɔr maan kanɛ nyu'od bugum ka li nyuug la na malisi tis Zugsɔb la. 14 Zʋmaaŋ kanɛ nan kenna la, saŋa kanɛ ka saan bɛɛ onɛ wʋsa la'am bɛ nɛ ya ya'a maal maan kanɛ nyu'od nɛ bugum ka li nyuug malisi tis Zugsɔb la, o mɛ maalim wʋʋ yanamɛ maan si'em la nɔɔ. 15 Teŋ la wʋsa dim anɛ ba niŋid ala la'am nɛ saam banɛ bɛ nɛ ya la, zi'elkaŋa anɛ li bɛ yʋma linɛ ka' bɛnnɛ hali ka banɛ na dɔlli ya nya'aŋ la ti kena. Yanam nɛ saam la na an yinne Zugsɔb la tuon. 16 Zi'ela la nɛ malima la na an yinne tis yanam nɛ saam banɛ wʋsa bɛɛ ya san'an la.” 17 Zugsɔb la da yɛl Moses ye, 18 “Yɛlim Israel dim la ye, ‘Ya ya'a kpɛn' teŋ kanɛ ka m mɔri ya wa'ae la 19 ka di teŋ la diib, yanam on gbin'e sieba ka li an maannɛ tis man onɛ an Zugsɔb la. 20 Yʋʋm wʋsa ya ya'a bʋn bʋmpaala yanam on maalim ma'asa yiiga tis wʋʋ maana la ka ya ɛɛnti tisid zieŋin si'em la. 21 Din yi nannanna hali ti paae zʋmaaŋ kanɛ nan kenna la, yʋʋm wʋsa ya ya'a maal ma'asa linɛ an yiiga la, asɛɛ ka ya yis bi'ela tis Zugsɔb la.’ ”
Atʋm tʋʋmbɛ'ɛd ka zi' la maan yɛla
22 Amaa ya ya'a pʋ dɔl zi'elbanɛ ka Zugsɔb tis Moses la, ka li anɛ zi'ilim zug, 23 zi'elbanɛ wʋsa ka Zugsɔb dɔlis Moses ni tisi ya la, lin pin'il daakanɛ ka Zugsɔb da dɛŋin tisi ti la ti paae zʋmaaŋ kanɛ na ti kena la; 24 ka nɛ' ya'a niŋ ka li ka' pitɔɔgɔ ka teŋ la dim zi' li yɛlaa, ba wʋsa na nɔk na'arapɔlli maal maan kanɛ nyu'od ka li nyuug la malisi tis Zugsɔb la, la'am nɛ li zʋʋd maan nɛ li bʋnnuuda maan, wʋʋ zi'elʋg suori an si'em la, ka nɔk bʋribigi maal tʋʋmbɛ'ɛd maan. 25 Maanmaan la anɛ o maal suguru sɔsʋg maannɛ tis Israel nidib la wʋsa, ka Zugsɔb la na kɛɛ ba taali bas, bɔzugɔ ba pʋ tʋmi li nɛ pɔn'ɔsim, ka mɛ mɔr maan linɛ nyu'od nɛ bugum nɛ tʋʋmbɛ'ɛd maan na tis Zugsɔb la. 26 O na kɛ Israel nidib la wʋsa nɛ saam banɛ la'am bɛ nɛ ba la taali bas, bɔzugɔ nidib la wʋsa pɛ'ɛs bɛ'ɛd linɛ ka ba pʋ tʋm nɛ pɔn'ɔsim la ni.
27 Amaa nid yinne ya'a tʋm bɛ'ɛd ka li ka' pɔn'ɔsim, o na mɔr bʋsa'a onɛ an yʋʋm yinne na maal tʋʋmbɛ'ɛd maan. 28 Maanmaan la na maal suguru sɔsʋg maan Zugsɔb la tuonnɛ tis onɛ tʋm taal ka li ka' pɔn'ɔsim, ka suguru sɔsʋg maan la ya'a maali tis o, Zugsɔb la na kɛɛ o taali bas. 29 Zi'elkan bɛnɛ tis sɔ' wʋsa, o sɔb ya'a anɛ Israel nid bɛɛ saan.
30 Amaa onɛ tʋm tʋʋmbɛ'ɛd pɔn'ɔsim-pɔn'ɔsim, o sɔb ya'a anɛ teŋin nid bɛɛ saan, o sɔb ki'is nɛ Zugsɔb la nɔɔr, ka ba na yis o, o nidibin, 31 bɔzugɔ o zan'as Zugsɔb nɔɔr ka san'ami o zi'elʋg, ka li an tilas ye ba yis o, o nidibin; ka o tʋʋmbɛ'ɛd la na kpɛlim o mɛŋ zugin.
Dau kanɛ san'am Vʋ'ʋsʋm Dabisir la yɛla
32 Israel nidib la da nam bɛ mɔɔgin la, Vʋ'ʋsʋm Daar yinne ka ba da nyɛ dau sɔ' pi'isid daad. 33 Banɛ da nyɛɛ o la da mɔr o kɛn Moses nɛ Aaron nɛ nidib la wʋsa tuon na, 34 ka ba nɔk o kpar dɔɔgin, bɔzugɔ ba da zi' ban na tɛɛg o tʋbir si'em. 35 Ka Zugsɔb la yɛl Moses, ye, “Dau la anɛ o kpi. Li anɛ tilas ye nidib la wʋsa yis o yiŋ ka lɔb o nɛ kuga ka o kpi.” 36 Ka nidib la sid nɔk o yis yiŋ ka lɔb o nɛ kuga kʋ wʋʋ Zugsɔb la yɛl Moses si'em la.
Linɛ na sɛɛn tabili ba fuud zug la yɛla
37 Zugsɔb la da yɛl Moses ye, 38 “Pian'am tis Israel nidib la ye, ‘Lin yi zina ken sa ya na sɛn futusa tabili ya fuud nɔɔr, ka nɔk nwiig linɛ an bʋlʋ niŋi li wʋsa. 39 Ya na tabil bʋmbama ka ya ya'a gɔti li, li na kɛ ka ya tɛnr Zugsɔb la zi'ela la, linɛ na kɛ ka ya siaki dɔlli ba ka da dɔlli ya sʋnf nɛ ya nini ya'amlɛogʋ kɛ ka ya yi Zugsɔb la nya'aŋa. 40 Ka ya na tiɛn ka siaki m zi'ela la ka pɛsigi ya mɛŋi tisi ya Wina'am ka an kasi. 41 Man anɛ Zugsɔb onɛ aan ya Wina'am ka da yisi ya Egipt teŋin na ye m lɛbigi ya Wina'am. M anɛ Zugsɔb onɛ aan ya Wina'am la.’ ”