Israel dimi da nyɔn teŋ la yɛla si'em
14
1 Yʋ'ʋŋ kan la Israel dim la wʋsa da kaasid nɛ sʋnsa'aŋ hali pamm, 2 ka pin'ili nyɔn Moses nɛ Aaron. Nidib la wʋsa da yɛti ba ye, “Ti ya'a pʋn daa kpiin Egipt bɛɛ sian'akaŋa ni sɔn'oe. 3 Bɔ ka Zugsɔb la mɔri tii kɛn teŋ kaŋa na ye ti kpi zaba ni? Ba na gban'e ti pu'ab nɛ biis la ka ba kilim yammis. Ti ya'a lɛbin Egipt li pʋ sɔn'oe nɛɛ?” 4 Ba da pin'ili yɛt taaba ye, “Ti gaŋim tuongat ka o dɔlli ti lɛb Egipt!” 5 Moses nɛ Aaron da igin Israel nimbanɛ la'as la wʋsa tuon ka ba nindaas kpa' teŋin. 6 Josua onɛ an Nun biig la nɛ Kaleb onɛ an Jefune biig banɛ da pɛ'ɛs nɛ nimbanɛ da keŋ kaae teŋ la gɔs la da aansi ba fuud sʋnsa'aŋ zug 7 ka yɛl Israel nidib la wʋsa ye, “Teŋ kanɛ ka tinam kaae giligi gɔs la anɛ teŋ sʋŋ hali. 8 Zugsɔb la sʋnf ya'a malis nɛ ti, o na mɔri ti kpɛn' teŋ kanɛ ka bin'isim nɛ siind pʋbid la, ka nɔki li tisi ti. 9 Mid ka ya ki'is Zugsɔb la nɔɔr. Ka mɛ da zɔti dabiem nɛ nimbanɛ bɛ teŋin la, bɔzugɔ ti na nyaŋi vɔli ba wʋʋ sa'ab nɛ. Linɛ guri ba la gaadya, amaa tinam Zugsɔb bɛ nɛ ti, da zɔti nɛ ba dabiem.” 10 Amaa nidib la wʋsa da gban'e nɛ ye ba lɔbi ba nɛ kuga.Ka Zugsɔb girima da kɛn La'asʋg Fuug Sʋgʋrin la na ka Israel nidib wʋsa nyɛɛ li. 11 Zugsɔb la da bu'os Moses ye, “Bʋndaar ka nimbama na tis mam girima? Bɔ ya'as ka man na tʋm ka ba niŋ mam yadda, la'am nɛ tʋʋmnyalima banɛ ka mam tʋmmi ba san'an la? 12 M na kɛ ka ban'abɛ'og luna gban'e ba ka ba kpi, ka lɛɛ kɛ ka fʋn tuŋ la zu'oe ka kpi'em hali gat ban an si'em la.”
13 Moses da lɛbisi yɛl Zugsɔb la ye, “Li ya'a niŋ ala, Egipt dim la na wʋmi li yɛla. Fʋ da nɔki fʋ paŋi yis nidib la ba san'an na. 14 Ba na yɛl teŋ kaŋa nidib la li yɛla, ba pʋn wʋm ye fʋ bɛ nɛ nidib la san'an ka lɛn ye fʋ kɛya ka ba nyɛɛf nɛ ba nini, ka fʋ girima saŋgbauŋ la sigi ba zugin na, ka fʋ gaadi ba tuon wʋʋ saŋgbauŋʋ zi'e sappi nintaŋ ka lɛɛ an bugum yʋ'ʋŋ. 15 Fʋ ya'a kʋ nimbama wʋsa vuguri, dunia dim banɛ pʋn wʋmi fʋ yɛla la na yɛl ye, 16 ‘Zugsɔb la pʋ nyaŋi mɔr nidib la keŋ teŋ kanɛ ka o kaanb ka pɔ ye o na mɔri ba keŋ la; linzug ka o gʋ'ʋŋi kʋʋ ba mɔɔgin.’ 17 Tɔ, ka nannanna, Zugsɔba, pa'alimi fʋ paŋ wʋʋ fʋn yɛl ye li an si'em la, ye 18 ‘Manɛ an Zugsɔb la, ka mɔr nimbaanlzɔɔr nɛ nyɔɔg. M anɛ baanlimm ka m sʋʋnr pʋ duod tɔ'ɔtɔ, ka m nɔŋilim nɛ sida ka' naarɛ. Ka pa'annɛ m nɔŋilim tisidi m nidib baa li ya'a anɛ yʋma tusirɛ, ka kɛti ba tʋʋmbɛ'ɛd wʋsa basid. Amaa banɛ tʋm tʋʋmbɛ'ɛd la, m kʋ kɛɛ ba tʋbir tɛɛgir baa bi'elaa. M na namisi ba, ba tʋʋmbɛ'ɛd la zug hali ti paae ba biis nɛ ba yaas.’ 19 Dinzugɔ, nwɛnɛ fʋ nɔŋilim la pʋn an si'em la, kɛl nimbama taali bas, nwɛnɛ fʋn ɛɛnti pʋn kɛti ba taal si'em lin pin'il daakanɛ ka ba yi Egipt hali ti paae zina la.”
20 Zugsɔb la da lɛbis ye, “Man kɛɛ ba taali bas wʋʋ fʋn bɛllim si'em la. 21 Amaa asida ka m yɛtif ye mam onɛ vʋe ka m girima pɛ'ɛl teŋgbauŋ la yʋ'ʋr zug, 22 nimbanɛ mi' nyɛ man girima nɛ m tʋʋmnyalima linɛ ka m tʋm Egipt teŋin nɛ mɔɔgin la, ka ki'is mam ka makimi gɔs nɔɔr piiga la, 23 ba nid baa yinne kʋ nyɛ teŋ kanɛ ka m pɔ ka kaanbi tisi ba yaanam la. Onɛ wʋsa ki'is mam kʋ maligim nyɛ teŋ la. 24 Amaa m sankpan'as Kaleb bɛɛ o kɔn' ka dɔl man nɛ o sʋnf wʋsa la zug, m na kɛ ka o kpɛn' teŋ kanɛ ka o daa keŋ kaae la ka o yaas na sʋ'ʋgi li. 25 Tɔ, Amalek nɛ Keenan buudi la sadigim bɛ bɔn'ɔg la baba la, bɛog, asɛɛ ka ya saa lɛb nya'aŋi lɛbisid sian'anr la baba, suokanɛ ken Atɛuk Zɛn'ugʋn la.”
26 Zugsɔb la da yɛl Moses nɛ Aaron ye, 27 “Bʋndaar ka nimbama mɛ na bas mam nyɔnyɔligɔ? M yʋ'ʋn gɛɛn ba nyɔnyɔlʋg la nɛ! 28 Alazug yɛlimi ba ye, ‘Man Zugsɔb onɛ vʋe la yʋ'ʋr zug m yɛti ye, m na maali ya nwɛnɛ man wʋm ka ya pian'ad si'em la. 29 Sian'akaŋa ni ya niŋgbiŋ ye li yadig nɛ zin'ig wʋsa. Onɛ wʋsa an wʋʋ yʋʋm pisi bɛɛ gaad ala ka ya daa kaal kaalʋg la saŋa la, ka o nyɔn mam la, 30 ya nid baa yinne kʋ kpɛn' teŋ kanɛ ka m da pɔ nɛ nimmua ye li na lɛbigi ya teŋ la, ya'a ka' Kaleb onɛ an Jefune biig la nɛ Josua onɛ an Nun biig la ma'aanɛ. 31 Ya'a kpɛlimi ya biis banɛ ka ya fabin ye ba na gban'e ba keŋ ka ba kilim yammis la, m na mɔri ba na ka ba na di malisim teŋ kanɛ ka ya zan'asi li la ni. 32 Amaa yanam niŋgbiŋ ye li yadig nɛ sian'akaŋa ni. 33 Ya biis la na gɔɔnd wʋʋ kɔnbkemnib kpɛla yʋma pisnaasi namisidi ya zam la zug, hali ka ya wʋsa ti kpii naae sian'akaŋa ni. 34 Ya na namisi ya tʋʋmbɛ'ɛd la yɛla yʋma pisnaasi. Yʋma la kal na zem nɛ dabisbanɛ ka ya daa nɔki labisi gɔs teŋ la. Lina na kɛ ka ya baŋ man na zan'asi ya ka li an si'em.’ 35 Man onɛ an Zugsɔb la, manɛ pian' ka mɛ sid na niŋ nɛ' wʋsa tis tʋʋmbɛ'ɛd dim banɛ la'as taaba zan'as man la; sian'akaŋa pʋʋgin ka ba na kpii naae.”
36-37 Alazug banɛ ka Moses da tʋm ye ba keŋ gɔs teŋ la, Zugsɔb da kɛ ka ban'a luna gban'e ba ka ba kpi, ban da zi lababɛ'ɛd teŋ la yɛla lɛb na ka kɛ ka nidib la ki'is Zugsɔb la zug. 38 Dap banɛ da keŋ gɔs teŋ la wʋsa, Josua onɛ an Nun biig la nɛ Kaleb onɛ an Jefune biig la ma'aa da kpɛlim vʋ'ʋg.
Ban mak yiiga ye ba sʋ'ʋg teŋ la
39 Moses n da yɛl Israel dim labaar kanɛ ka Zugsɔb la tis o la, ba da kaas nɛ hali. 40 Ba da duoe bɛkɛung asuba kennɛ kpa'ad teŋ kanɛ ka kʋkʋna bɛ la, ka yɛl ye, “Ti tʋm bɛ'ɛd. Ti na keŋ zin'ikanɛ ka Zugsɔb kaanb la.”
41 Amaa Moses da yɛl ye, “Bɔ ka ya zan'as Zugsɔb nɔɔr zi'elʋgɔ? Nɛ' kʋ nyaŋi sʋŋi yaa! 42 Da keŋi ani, bɔzugɔ Zugsɔb la ka' ya san'anɛ. Ya dataas la na nyaŋi ya. 43 Amalek nɛ Keenan dim la na tʋ'ʋsi ya ani. Yanamɛ fɛndig ka bas Zugsɔb la zug, o kʋ bɛ nɛ yaa, ba na kʋʋ ya zaba la ni!”