Balak n tʋm buol Balaam la yɛla
22
1 Israel dim la da keŋi paae Moab zin'ikanɛ an sassi ka bɛ Joodan lɔm lɛbisid Jeriko tempʋʋg la baba. 2 Saŋkan la Balak onɛ an Zippor biig la da nyɛ Israel dim la maal Amor dim la si'em la, 3 ka dabiem gban'e Moab dim bɔzugɔ ba da zu'oe nɛ hali. Ya'a an sida dabiem da gban'e Moab dim Israel nidib la yɛla. 4 Moab dim da yɛl Midian teŋ kpɛɛmnam ye, “Nimbama zu'oe si'em la, ba ye ba lɛlig nɛ si'el wʋsa linɛ giligi ti, wʋʋ niigi ɛɛn lɛlig mɔɔg si'em la.” Alazug Balak onɛ an Zippor biig, ka an Moab na'ab saŋkan la, 5 da tʋm buol Balaam onɛ an Beor biig, ka da bɛɛ o mɛŋ teŋin Petor linɛ kpi'e Efiritis kɔldaug la. Balak da yɛl o ye, “Ninsieba naam Egipt n yina pɛ'ɛl nɛ zin'ig la wʋsa, ka zin' kpi'e nɛ mam yammin-yammin. 6 Kem na pɔ nɔɔri tisi ba, bɔzugɔ ba paŋ gat mam; daasi'erɛɛ m na nyaŋi kadi ba yis teŋ kaŋa ni. Bɔzugɔ m mi' ye banɛ ka fʋ niŋi ba albareka la, sid mɔr albareka, ka banɛ ka fʋ pɔ nɔɔri tisi ba la, li sid na dɔlli ba.”7 Moab nɛ Midian kpɛɛmnam la da duoe ka nɔk ba'ad ligidi keŋ. Ban da paae Balaam san'an la, ba da yɛl o Balak n yɛl si'em. 8 Ka Balaam yɛli ba ye, “Gbɛɛmi kpɛla yʋ'ʋŋa, ka m na lɛb na yɛli ya Zugsɔb la tisim labasi'a.” 9 Wina'am da kɛn Balaam san'an na bu'os o ye, “Nimbama aan anɔ'ɔnamɛ kɛɛn fʋ san'an na la?” 10 Balaam da lɛbis Wina'am ye, “Balak onɛ an Zippor biig, ka an Moab na'ab la tʋmi ba nɛ labakaŋa na ye, 11 ‘Nimbanɛ yi Egipt na pɛ'ɛl zin'ig wʋsa kpɛla la, kem na pɔɔ niŋi ba tisim, ka daasi'erɛ li na sʋŋ ka m nyaŋi zab nɛ ba kadi ba yis kpɛla.’ ” 12 Amaa Wina'am da yɛl Balaam ye, “Da dɔlli ba keŋɛ. Mid ka fʋ pɔ nɔɔri niŋ nimbama, bɔzugɔ ba anɛ banɛ ka albareka bɛɛ ba ni.” 13 Bɛog da nieya ka Balaam duoe yɛl Balak na'ayikpɛm la ye, “Lɛmmi nɛ ya mɛŋ teŋin, ka Zugsɔb la pʋ siak ye m dɔlli ya keŋɛ.” 14 Dinzug Moab na'ayikpɛm la da lɛbi yɛl Balak ye, “Balaam pʋ siak ye o dɔlli ti kenaa.” 15 Balak da tiaki tʋm kpɛɛm sieba, banɛ zu'oe ka mɔr girima gat yiiga dim la. 16 Ba da kɛn Balaam san'an na yɛl o ye, “Balak onɛ an Zippor biig la yɛl si'eli nwa: ‘Da kɛ ka si'el gidigif ka fʋ pʋ kena, 17 bɔzugɔ m na yɔɔf sʋ'ʋŋa, ka lɛm maal fʋn bɔɔd si'el wʋsa tisif. Kem na pɔ nɔɔri niŋ nidib la tisim.’ ” 18 Amaa Balaam da lɛbisi ba ye, “Hali baa Balak ya'a nɔk o na'ayir la wʋsa pɛ'ɛl nɛ anzurifa nɛ sanlima tisim, m kʋ nyaŋi zan'asi m Zugsɔb onɛ aan m Wina'am la zi'elʋg ka maal si'ela. 19 Zina gbɛɛmi kpɛla yʋ'ʋŋa wʋʋ ya taaba la daa niŋ si'em la, ka m bu'os Zugsɔb la gɔs on na yɛlim si'em.” 20 Yʋ'ʋŋ kan la Wina'am da kɛn Balaam san'an na yɛl o ye, “Nimbama ya'a lɛn kena buolif, fʋn dɔlli ba keŋ; amaa maalim linɛ ka m yɛlif ye fʋ maal la ma'aa.”
Balaam bʋŋ pian' tis o
21 Balaam da duoe bɛogʋn lɔɔ o bʋŋʋ dɔl Moab na'ayikpɛm la keŋ. 22 Amaa Wina'am sʋnf da duoe nɛ on keŋ la, ka Zugsɔb maliak kidigi zi'en suor la zug ye o geŋ o. Balaam da ban'adnɛ o bʋŋ, ka o yammis ayi' dɔl o. 23 Bʋŋ la da nyɛ Zugsɔb maliak la ka o zi'e suor la zug ka fuoe sʋ'ʋgʋ zanl o nu'ugin, ka o buŋi kpɛn' mɔɔgi gaad. Ka Balaam pin'ili bʋ'ʋd bʋŋ la ye o lɛb suor pʋʋg.
24 Zugsɔb maliak la da tɔlisi zi'en lɔmbɔn'ɔd ayi' banɛ ka ba mɛ' zaŋguoma ayi' bɛŋ, ka suobaanlig bɛɛ li teŋsʋk la. 25 Bʋŋ la n da nyɛ Zugsɔb maliak la, o da miee labin zaŋguom la urig Balaam nɔbir. Ka o lɛm bʋ' o ya'as.
26 Zugsɔb maliak la da lɛn vurigi tɔlis zi'en tuon zin'ikanɛ ka sɔ' kʋ nyaŋi fɛndig datiuŋ bɛɛ dagɔbʋga. 27 Bʋŋ la da lɛn nyɛ Zugsɔb maliak la, o da digin nɛ Balaam wʋsa teŋin, ka Balaam sʋnf duoe hali ka o vɔb bʋŋ la nɛ o dansaar. 28 Ka Zugsɔb kɛ ka bʋŋ la ya'ae o nɔɔri pian' Balaam ye, “Bɔ kimm ka m maalif ka li kɛ ka fʋ bʋ'ʋm nɔɔr atan' sa?” 29 Balaam da lɛbis o ye, “Fʋ mɔrim nɛ maan galim! M ya'a mɔrin sʋ'ʋgʋ m nu'ugin m naan kʋʋnif nannanna.” 30 Bʋŋ la da lɛbis Balaam ye, “Man ka'anɛ fʋ mɛŋ bʋŋ onɛ ka fʋ ban'ad saŋa wʋsa ti paae zinaa? Fʋ nam mi' nyɛ ka m maal anwa tisi fɔɔ?” Ka o lɛbis ye, “Ayei!”
31 Ka Zugsɔb yɔ'ɔg Balaam nini ka o nyɛ maliak la zi'e suor la teŋsʋk ka fuoe sʋ'ʋgʋ zanl. Ka o igin ka vanbin teŋin. 32 Zugsɔb maliak la da bu'os o ye, “Bɔ ka fʋ bʋ' bʋŋ la nɔɔr atan' sa? M kena ye m giŋif bɔzugɔ ken la ka' sʋ'ʋm m nini nii. 33 Nɔɔr atan' ka bʋŋ la nyɛɛm ka yuk. Bʋŋ la ya'a pʋ yukinɛ, anwaa m kʋʋnif ka basin bʋŋ la.” 34 Balaam da lɛbisi yɛl Zugsɔb maliak la ye, “M tʋm taal, m pa'a pʋ baŋ ye fʋ zi'enɛ suorin la ye fʋ geŋi ma. Nannanna li ya'a pʋ malisi fɔ m na lɛbi kul.” 35 Ka maliak la lɛbisi yɛl Balaam ye, “Dɔl nidib la keŋ, amaa yɛlim nɛ man ye fʋ yɛl si'el ma'aa.” Ka Balaam dɔl Balak na'ayikpɛm la keŋ.
36 Balak n da wʋm ye Balaam kenna la, o da yi ye o tʋ'ʋs o Moab teŋ si'a linɛ bɛ Aanon bɔn'ɔgin, o teŋ titɔndig bɛn la. 37 Balak da bu'os Balaam ye, “Mam pʋ tʋm ye ba kena buolif nɛ nimmua? Ka bɔ ka fʋ pʋ kɛn tʋʋlig-tʋʋlig na? Fʋ tɛn'ɛs ye m kʋ nyaŋi yɔɔf bɛɛ?” 38 Ka Balaam lɛbis o ye, “M paae na, manɛ nwa m kʋ nyaŋi yɛl si'el nɛ m mɛŋ ya'am? Ayei! Asɛɛ ka m yɛl pian'akanɛ wʋsa ka Zugsɔb la nɔki niŋi m nɔɔrin.” 39 Ka Balaam dɔl Balak n keŋ Kiriaf Huzof teŋin. 40 Balak da kʋ niigi nɛ pɛ'ɛsi tɔnd ni'imi tis Balaam nɛ kpɛɛmnam banɛ bɛɛ o san'an la. 41 Bɛogʋ da nie la Balak da dɔl Balaam keŋ Bamof Baal, ani ka o nyɛ Israel dim la sieba.