Balaam yiiga labaar la yɛla
23
1 Balaam da yɛl Na'ab Balak ye, “Mɛɛmi maan bimbima ayɔpɔi kpɛla, ka mɔri na'araad ayɔpɔi nɛ pɛraad ayɔpɔi na tisim.” 2 Balak da maal wʋʋ Balaam yɛl o si'em la, ka babayi' la kɔdig na'araug nɛ pɛraug bimbim wʋsa zugin. 3 Ka Balaam yɛl Balak ye, “Zi'enim kpi'enɛ fʋ maan la, ka m yi kpikpɛŋ ka daasi'erɛɛ Zugsɔb la na kɛɛn m san'an na. On nie si'el wʋsa pa'alim, m na yɛlif.” Ka yii dʋ zuor zug.4 Wina'am da sia'al o ani, ka Balaam yɛl ye, “Mam maal nɛ bimbima ayɔpɔi, ka kɔdig na'araug nɛ pɛraug bimbim wʋsa zugin.” 5 Ka Zugsɔb la nɔk labaari niŋ Balaam nɔɔrin ka yɛl o ye, “Lɛm Balak san'an yɛl o labakaŋa.” 6 O da lɛbi nyɛ ka Balak nam zi'e kpi'e o maan la, on nɛ Moab na'ayikpɛm la wʋsa. 7 Ka Balaam yɛl labakaŋa ye,
“Balak mɔrimi yi Aram teŋin na,
Moab na'ab mɔrimi yi ya-nya'aŋ zuoya la ni na ka yɛlim ye,
‘Kem na pɔ nɔɔri niŋ Jakob zugin tisim;
kem na, ka zan'as Israel dim.’
8 Man ye m niŋ wala pɔ nɔɔri tis banɛ ka Wina'am pʋ pɔ nɔɔri tisɛ?
Man ye m niŋ wala zan'as banɛ ka Zugsɔb la pʋ zan'asɛ?
9 M naam tampiing la zugʋ nyɛɛ ba,
zuor la zug, m bɛɛ ani ka nyɛti ba.
M nyɛ nimbanɛ baki ba mɛŋ
ka bɛɛ ba kɔn' nɛ buudsi'a wʋsa.
10 Anɔ'ɔnɛ na nyaŋi kaal Jakob yaasɛ?
Ba anɛ wʋʋ titanbin'isʋg nɛ!
Bɛɛ anɔ'ɔn na gi'el Israel nidiba,
hali baa ba pʋdigir anaasi?
Kɛl ka m kpi pʋpiel kum,
ka m naar nwɛnɛ pʋpiel nɛ!”
11 Balak da yɛl Balaam ye, “Fʋ maal bɔɔ la tis mam? M mɔrif na ye fʋ pɔ nɔɔri tisim dataas, amaa ka fʋ lɛɛ niŋidi ba zug albareka ma'aa!” 12 Ka o lɛbis ye, “M da pian' Zugsɔb la nɔk pian'asi'a niŋi m nɔɔrinɛ?”
13 Ka Balak yɛl o ye, “Dɔllim ka ti keŋ zin'isi'a ya'as ka fʋ na nyɛɛ ba: fʋ na nyɛ nɛ ban bi'ela ka ka' ba wʋsaa. Ka ani ka fʋ na pɔ nɔɔri niŋi ba tisim.” 14 O da dɔl o keŋ Zofim paalʋ ni, Pisig zuor la zug, ka o lɛm mɛ' maan bimbima ayɔpɔi ani ka kɔdig na'araug nɛ pɛraug bimbim wʋsa zug. 15 Balaam da yɛl Balak ye, “Kpɛlim kpɛla zi'enɛ kpi'en nɛ fʋ maan la, ka m tʋ'ʋs o kpɛ'ɛsa.” 16 Zugsɔb la da tʋ'ʋs Balaam ka nɔk labaari niŋ o nɔɔrin, ka yɛl o ye, “Lɛm Balak san'anɛ tis o labakaŋa.” 17 O da lɛbi keŋ nyɛɛ o ka o zi'e kpi'e o maan la, nɛ Moab na'ayikpɛm la wʋsa. Balak da bu'os o ye, “Zugsɔb la yɛl ye bɔ?” 18 O da tis o labaar ye,
“Duom, Balak, ka kɛlis:
wʋm man yɛt si'el la, fʋn Zippor biiga.
19 Wina'am ka' ninsaal ka na ma' ziri,
bɛɛ ninsaal biig ka na tiaki o pʋtɛn'ɛrɛ.
O nan mi' yɛl si'el ka pʋ tʋmi lii?
Bɛɛ kaanb si'el ka pʋ niŋi li bunnɛ?
20 Gɔsima, ba tisim nɛ zi'elʋg ye m niŋ albareka niŋi ba zug.
O pʋn niŋ albareka niŋi ba ka m kʋ nyaŋi tiaki li.
21 Zutɔɔg kae Jakob san'anɛ,
sʋnsa'aŋ kae Israel dim san'anɛ.
Zugsɔb onɛ aan ba Wina'am la bɛ nɛ ba;
ba tansid nɛ kʋkɔtita'ar ye o anɛ na'ab ba teŋsʋk.
22 Wina'am mɔri ba yi Egipt teŋin na;
ba paŋ nwɛnɛ wɛnaaf paŋ nɛ.
23 Ba'akɔlʋg sɔb kae na nyaŋi duoe zi'enɛ ba yɛlaa,
sɔnpʋt kae na tun'e san'ami ba.
Nidib yʋ'ʋn na gɔt Jakob nɛ Israel dim ka yɛt ye,
‘Gɔsim Zugsɔb la maal si'el!’
24 Nidib la duonɛ wʋʋ gbigimnya'as nɛ:
ba duoe ba mɛŋ wʋʋ gbigimi na nyɛ bʋnkɔnbʋg
ka mɔ hali ti kʋʋ o ka nuu o ziim.”
25 Ka Balak yɛl Balaam ye, “Tɔ! Fʋ ya'a kʋ pɔ nɔɔri niŋi ba, fʋn mɛ da niŋi ba zug bareka baa bi'elaa!” 26 Ka Balaam lɛbis ye, “M pʋn pʋ yɛlif ye li anɛ tilas ye m maal Zugsɔb la yɛl ye m maal si'elaa?”
27 Ka Balak yɛl Balaam ye, “Kem na, ka m nɔki fʋ keŋ zin'isi'a ya'as. Ka daasi'erɛɛ li na malis Wina'am sʋnf ka o kɛ ka fʋ naam ani pɔ nɔɔri niŋi ba.” 28 Ka Balak nɔk Balaam dʋ zuokanɛ buon Peor la ka linɛ kpa' Jesimon pipirig la. 29 Balaam da yɛl ye, “Mɛɛm maan bimbima ayɔpɔi kpɛla, ka lɔ na'araad ayɔpɔi nɛ pɛraad ayɔpɔi tisim.” 30 Balak da niŋ wʋʋ Balaam yɛl si'em la, ka o kʋ naaf nɛ pɛ'og bimbim wʋsa zugin.