24
1 Balaam da baŋ ye li anɛ Zugsɔb la bɔɔdim ye o niŋ Israel dim zug albareka la, o da pʋ lɛm maal bʋgʋlʋm-bʋgʋlʋm wʋʋ on ɛɛnti niŋid si'em la, amaa o da fɛndigi o nindaa kpa' sian'anr la baba 2 ka ʋk o nindaa nyɛ ka Israel dim la'as dɔɔg, dɔɔgʋ zi'e. Ka Wina'am Siig la da sigi o zugin na, 3 ka o tis o labaar la ye,“Balaam onɛ an Beor biig la pian'ʋkʋ nwa,
on kanɛ nyɛt nyain la labaari nwa.
4 Onɛ wʋm Wina'am pian'ad la pian'ʋkʋ la,
onɛ ka Paŋtita'ar Sɔb la nied yɛla pa'an o,
onɛ vanbin nɛ onɛ nini yɔ'ɔg la yɛt ye,
5 ‘Jakob dima, gɔsimi ya sʋga la vɛnl si'em!
Yanam Israel nidiba, ya bɛllim zin'ig vɛnl pamm!
6 Ya nwɛnɛ bɔn'ɔfaligi yadigi yi paalʋ nɛ,
ka nwɛnɛ lɔmbɔn'ɔgʋ na bɛ kɔlʋg nɔɔrin nɛ.
Ya nwɛnɛ Zugsɔb la na sɛ tivɛnliŋ nɛ,
ka nwɛnɛ na'aziinri na bɛ bɛuŋ kpikpɛŋ nɛ.
7 Ku'om na pɛ'ɛli ba bu'ati badig;
ba bʋmbʋʋda na paam ku'om bɛdegʋ.
Ba na'ab na mɔr kpi'euŋʋ gat Na'ab Agag:
ba sʋ'ʋlim na nyɛ zun'or.
8 Wina'am mɔri ba yi Egipt teŋin na;
ba paŋ nwɛnɛ wɛnaaf paŋ nɛ.
Ba san'amid tembanɛ kisi ba
ka kɔɔdi ba kɔnba bur-bur,
ka kʋnsidi ba nɛ ba kpana.
9 Ba vanbnɛ teŋin nwɛnɛ gbigim nɛ.
Ka nwɛnɛ gbigimnya'aŋ nɛ.
Anɔ'ɔnɛ gɛɛm na daami ba?
Israel, banɛ niŋif albareka na paam albareka,
ka banɛ pɔ nɔɔri tisif paam nɔpɔɔr!’ ”
10 Ka Balak sʋnf duoe nɛ Balaam. Ka o nwɛ' nu'usi pisig ka ye, “Mam buolif ye fʋ pɔ nɔɔri tisim dataas la, amaa ka fʋ niŋi ba zug albareka nɔɔr atan' nwa wʋsa! 11 Nannanna duom kpɛla tɔ'ɔtɔ kuli fʋ yin! M daa yɛl ye m na yɔɔf bɛdegʋ, amaa Zugsɔb la kɛya ka fʋ kʋ nyɛ yɔɔd laa.” 12 Balaam daa lɛbis Balak ye, “M daa pʋ yɛl banɛ ka fʋ tʋmi m san'an la naa? M daa yɛli ba ye, 13 ‘Hali baa Balak ya'a pɛ'ɛl o na'ayir la nɛ anzurifa nɛ sanlima nɔki tisim, m kʋ nyaŋi maal si'el nɛ m mɛŋ paŋa, li ya'a an sʋ'ʋm bɛɛ bɛ'ɛdɛ; m kʋ nyaŋi keŋ gaad Zugsɔb la tis nɔsi'a la, asɛɛ ka m yɛl Zugsɔb la yɛl si'el la nɔɔ.’ 14 Nannanna m lɛbid nɛ m mɛŋ nidibin, amaa kem na ka m yɛlif nidib nwa na maali fʋ nidib la si'em dabisa banɛ kenna la.” 15 Ka o yɛl o labakaŋa ye,
“Balaam onɛ anɛ Beor biig la pian'ʋkʋ la,
nɛ onɛ nyɛt nyain la labaar.
16 Onɛ wʋm Wina'am pian'ad la pian'ʋkʋ la,
on ka Paŋtita'ar Sɔb la nied yɛla pa'an o.
Onɛ vanbin, nɛ onɛ nini yɔ'ɔg la yɛt ye,
17 ‘M nyɛɛ o, amaa ka' nannannaa.
M nyɛt o, amaa o ka' yamminɛ.
Nwadbil na yi Jakob ni na,
na'am dansaar na yi Israel na.
O na nwa'ae Moab gbɛ'og
ka nwa'as Sief yaas la wʋsa zut.
18 O na sʋ'ʋg Edom teŋ la wʋsa:
ka nyaŋi o dataas banɛ bɛ Seir teŋgbauŋʋn.
Israel mɛ na nɔbig nɛ paŋ.
19 Tuongat na yi Jakob ni na,
ka san'am linɛ kpɛlim bɛ tempʋʋgin la wʋsa.’ ”
20 Ka Balaam yʋ'ʋn fɛndigi gɔs Amalek dim la, ka yɛli ba yɛla ye,
“Amalek da dɛŋ tɛɛns wʋsa tuon,
amaa ba na ba'asi san'am saŋa linɛ ka' bɛnnɛ.”
21 Ka o yʋ'ʋn nyɛ Keen dim la ka yɛli ba ye,
“Ya bɛllim zin'ig la nwɛnɛ zin'ikpi'euŋ nɛ,
ka nwɛnɛ niis banɛ tɛɛdi ba tɛɛd tampinyɔ'ɔd pʋʋgin nɛ.
22 La'am nɛ wala, Asiria dim la ya'a ti nyaŋi gban'e ya mɔri keŋ,
yanam Keen dim na san'am.”
23 Ka o maligim yɛli ba ye,
“Aa! Wina'am ya'a ti maal nɛ'ɛnama,
anɔ'ɔnɛ na nyaŋi kpɛn vʋeya?
24 Lin nya'aŋ ka anrintitada na naam Kitim teŋinɛ
dɔl Atɛuk la suoya kena.
Ba na nyaŋ Asiria la'am nɛ Ebɛr,
amaa ban mɛ na ti paam san'auŋ.”
25 Balaam da duoe lɛbi kul, ka Balak mɛ keŋi o ken.