Moab pu'ab kɛ ka Israel dim tʋm tʋʋmbɛ'ɛd
25
1 Israel dimi da nam bɛ Sittim teŋin la, ba dap la da pin'ili dig nɛ Moab buudi pu'ab la, 2 alazug, pu'ab la da ɛɛnti buonnɛ banɛ saŋa kanɛ ka ba maannɛ ba bada la. Nidib la da pin'ili dit ka iginidi pʋ'ʋsid bada la. 3 Alazug Israel dim da la'asi wɔ'ɔgid Baal Peor. Ka Zugsɔb sʋnf duoe nɛ ba hali.4 Zugsɔb da yɛl Moses ye, “Yisim bama tuongatib la wʋsa kʋʋ ba dɛlig nintaŋ pieligin, ka li kɛ ka Zugsɔb sʋnpɛɛn yi Israel dim la zugin.” 5 Alazug Moses da buol Israel sariakatib la yɛli ba ye, “Sɔ' wʋsa kʋʋmi o nid onɛ wʋsa la'asi wɔ'ɔgid Baal Peor la.”
6 Moses nɛ Israel nidib la wʋsa da zin' La'asʋg Fuug Sʋgʋr la za'anɔɔrini kaasidi li yɛla, ka Israel dau yinne mɔr Midian pu'a kena kpɛn' o yinne ba nini ni. 7 Ka Finehas onɛ da an Elieza biig ka an Aaron, onɛ da an maanmaan kpɛɛm yaaŋ la nyɛ la, o sʋnf da duoe nɛ hali, ka o duoe nidib la sʋʋgin la nɔk kpan 8 ka kad o hali ti kpɛn' dɔɔgin, ka ʋk kpan la kʋns dau la tɔlig pu'a la niŋgbiŋin. Alazug ban'akanɛ ka Zugsɔb sʋnpɛɛn da kɛ ka li gban'e Israel dim la da gu'oya. 9 Amaa banɛ da pʋn kpi ban'as la zug da anɛ tusa pisi nɛ anaasi. 10 Zugsɔb la da yɛl Moses ye, 11 “Finehas onɛ an Aaron yaaŋ la kɛ ka m sʋnpɛɛn la yuk ka bas Israel dim la; bɔzugɔ o nini mu'oe nɛ wʋʋ mam bɔɔd ye m girima bɛ nidibin la si'em la, ka li kɛ ka m pʋ li' ba wʋʋ man gban'e si'em la. 12 Alazugɔ yɛlim o ye mam ye m maal nɛ sumalisim nɔnaar nɛ o. 13 On nɛ o yaas na aan m maanmaannib saŋa linɛ ka' bɛnnɛ, bɔzugɔ o nini mu'oe nɛ Wina'am girima linɛ aan o Wina'am din la, ka sɔs suguru tis Israel nidib wʋsa.”
14 Israel ninkanɛ ka ba da kʋ nɛ Midian pu'a la yʋ'ʋri buon Zimiri onɛ an Salu biig. Salu da anɛ Simeon dɔɔg la tuŋ si'a tuongat. 15 Ka Midian pu'a kanɛ ka ba da kʋ la yʋ'ʋr buon Kosbi onɛ an Zur pu'ayua, ka on mɛ da an Midian buudi tuŋ si'a tuongat.