<<    <     Kaalʋg     26     >    >> 
Kaalʋg linɛ paas ayi' la yɛla
26
1  Tɔɔg la da gaad la, Zugsɔb la da yɛl Moses nɛ Elieza onɛ an Aaron biig la ye, 2 “Kaalim Israel nidib wʋsa yir-yir banɛ an yʋma pisi bɛɛ gaad ala ka na nyaŋi yi tanp.” 3 Alazug Moses nɛ Elieza da pian' tis nidib la Moab zin'ikanɛ an sassi ka fʋ lɔ'ɔŋid Jeriko tʋ'ʋsid la ni, ka yɛli ba ye, 4 “Kaalimi dap banɛ wʋsa ka ba yʋma paae pisi bɛɛ gaad ala la, wʋʋ Zugsɔb la da yɛl Moses nɛ banɛ ka o da dɔlli yi Egipt teŋin na si'em la.”
5-6 Reuben onɛ an Israel bikpɛŋ la yaas da anɛ Hanok nɛ Pallu nɛ Heziron nɛ Karmi. Hanok tuŋ da anɛ Hanok dim ka Pallu dɔɔg an Pallu dim ka Heziron tuŋ an Heziron dim ka Karmi tuŋ an Karmi dim. 7 Reuben dɔɔdi la, ka ba kal da an tusa pisnaasi nɛ atan' nɛ kɔbisyɔpɔi nɛ pistan' (43,730). 8 Pallu biigi da an Eliab, 9 ka Eliab biis an Nemuel nɛ Datan nɛ Abiram. Datan nɛ Abiram da an nidib la tuongatib ka da zɛrig Moses nɛ Aaron, ka mɛ pɛ'ɛs Kora nya'andɔlib banɛ da ki'is Zugsɔb la. 10 Teŋ da ya'ae li nɔɔri vɔli ba nɛ Kora ka bugum da kanbi o nya'andɔlib kɔbisyi' nɛ pisnu, ka li an nimmua zanbinnɛ tis nidib la. 11 La'am nɛ wala Kora tuŋ da pʋ kpi'ilim.
12 Simeon yaas da yinɛ o biis Nemuel nɛ Jamin nɛ Jakin nɛ Zera nɛ Sauul ni na. Ba wʋsa da mɔri ba dɔɔd, ka banɛ an: Nemuel dim nɛ Jamin dim nɛ Jakin dim 13 nɛ Zera dim nɛ Sauul dim. 14 Simeon dɔɔg la, banɛ ka ba da kaal da anɛ tusa pisi nɛ ayi' nɛ kɔbisyi' (22,200).
15-17 Gad yaas da yinɛ o biis Zefon nɛ Hagi nɛ Seuni nɛ Ozini nɛ Eri nɛ Arodi nɛ Areli ni. Ba wʋsa da mɔri ba tuŋ ka ba an Zefon dim nɛ Hagi dim nɛ Seuni dim nɛ Ozini dim nɛ Eri dim nɛ Arodi dim nɛ Areli dim. 18 Gad dɔɔg la, banɛ ka ba da kaal da anɛ tusa pisnaasi nɛ kɔbisnu (40,500).
19 Juda biis da anɛ Er nɛ Onan, amaa ba da kpi nɛ Keenan teŋin. 20 Juda yaas da yinɛ o biis Sela nɛ Perez nɛ Zera ni. Ba wʋsa mɔri ba tuŋ ka ba an Sela dim nɛ Perez dim nɛ Zera dim. 21 Perez tuŋ la da dɔlis o biis Heziron nɛ Hamul ni; ba anɛ Heziron dim nɛ Hamul dim. 22 Juda dɔɔg banɛ ka ba da kaal da anɛ tusa pisyɔpɔi nɛ ayuobʋ, nɛ kɔbisnu (76,500).
23-24 Isaka yaas da yinɛ o biis Tola nɛ Pua nɛ Jasub nɛ Simiron ni. Ba wʋsa da mɔri ba tuŋ ka ba an Tola dim nɛ Pua dim nɛ Jasub dim nɛ Simiron dim. 25 Isaka dɔɔg la, banɛ ka ba da kaal da anɛ tusa pisyuobʋ nɛ anaasi, nɛ kɔbistan' (64,300).
26 Zebulun yaas da yinɛ o biis Sered nɛ Elon nɛ Jaalee ni. Ba wʋsa da mɔri ba tuŋ ka ba an Sered dim nɛ Elon dim nɛ Jaalee dim. 27 Zebulun dɔɔg la, banɛ ka ba da kaal da anɛ tusa pisyuobʋ nɛ kɔbisnu (60,500).
28 Josef yaas banɛ da yii o biis Manase nɛ Efiram la da an si'em nwa.
29 Manase yaas da yinɛ o biig Makir ni, ka Makir biig da an Gilead. Gilead ni ka Gilead tuŋ la yina. 30-32 Gilead yaas da yinɛ o biis Ieza nɛ Helek nɛ Asiriel nɛ Sekɛm nɛ Hifa nɛ Siamida ni. Ba wʋsa da mɔri ba tuŋ ka ba an Iiza dim nɛ Helek dim nɛ Asiriel dim nɛ Sekɛm dim nɛ Siamida dim nɛ Hifa dim. 33 (Zelofehad onɛ da an Hifa biig la da pʋ mɔr biribisɛ, o da mɔri bipumis ma'aa; ba yʋda da buon Mahla nɛ Noa nɛ Hogila nɛ Milika nɛ Tiza.) 34 Manase dɔɔg la, banɛ ka ba da kaal da anɛ tusa pisnu nɛ ayi' nɛ kɔbisyɔpɔi (52,700).
35 Efiram yaas da yinɛ o biis Seufila nɛ Bekɛr nɛ Tahan ni. Ba wʋsa da mɔri ba tuŋ ka ba an Seufila dim nɛ Bekɛr dim nɛ Tahan dim. 36 Seufila tuŋ la da yinɛ o biig Eran ni ka banɛ an Eran dim. 37 Efiram dɔɔg la, banɛ ka ba da kaal da anɛ tusa pistan' nɛ ayi' nɛ kɔbisnu (32,500).
38-39 Benjamin yaas da yinɛ o biis Bela nɛ Asibɛl nɛ Ahiram nɛ Seufam nɛ Hufam ni. Ba wʋsa da mɔri ba tuŋ ka ba an Bela dim nɛ Asibɛl dim nɛ Ahiram dim nɛ Seufam dim nɛ Hufam dim. 40 Bela yaas mɛ da anɛ Arid nɛ Naaman; banɛ da an Arid dim nɛ Naaman dim. 41 Benjamin dɔɔg la, banɛ ka ba da kaal da anɛ tusa pisnaasi nɛ anu nɛ kɔbisyuobʋ (45,600).
42 Dan yaas da yinɛ o biig Suham ni na ka o tuŋ da an Suham dim. Dan dɔɔd dim la wʋsa 43 da yinɛ Suham tuŋʋn na, banɛ ka ba da kaal da anɛ tusa pisyuobʋ nɛ anaasi nɛ kɔbisnaasi (64,400).
44 Aser yaas da yinɛ o biis Imnah nɛ Isivi nɛ Beria ni. Ba wʋsa mɔri ba tuŋ ka banɛ an; Imnah dim nɛ Isivi dim nɛ Beria dim. 45 Beria yaas mɛ da anɛ: Heber nɛ Malkiel ka ba wʋsa mɔri ba tuŋ ka banɛ an; Heber dim nɛ Malkiel dim. 46 (Aser da mɔr bipuŋi pɛ'ɛs ka o yʋ'ʋr buon Sera.) 47 Aser dɔɔg la, banɛ ka ba da kaal da anɛ tusa pisnu nɛ atan' nɛ kɔbisnaasi (53,400).
48-49 Naftali yaas da yinɛ o biis Jazeel nɛ Guni nɛ Jezer nɛ Sillem ni. Ba wʋsa da mɔri ba tuŋ ka banɛ an; Jazeel dim nɛ Guni dim nɛ Jezer dim nɛ Sillem dim. 50 Naftali dɔɔg la, banɛ ka ba da kaal da anɛ tusa pisnaasi nɛ anu nɛ kɔbisnaasi (45,400).
51 Israel dap la kal wʋsa da la'as nɛ tusa pisyuobʋ nɛ yinne nɛ kɔbisyɔpɔi nɛ pistan' (601,730).
52  Zugsɔb la da yɛl Moses ye, 53 “Li anɛ ye fʋ pʋdig teŋ la tisi ba wʋʋ nidib la kalli zem si'em la. 54 Tisim banɛ zu'oe la bɛdegʋ, ka tis banɛ pɔɔd la bi'ela. Sɔ' wʋsa na di'e ka li zemis nɛ o nidib kal bɛnnɛ an si'em. 55 Kɛl ka pʋʋr la wʋsa zin'ig dɔl nɛ bʋgʋlʋm-bʋgʋlʋm. Dɔɔg wʋsa na di'e fasi'a la na dɔl wʋʋ ba dɔɔg la kalli zem si'em. 56 Asɛɛ ka ya maal bʋgʋlʋm-bʋgʋlʋm pʋ pʋʋr la zin'is wʋsa tis dɔɔd banɛ zu'oe nɛ banɛ pʋ zu'oe la.”
57 Levi yaas da yinɛ o biis Gerson nɛ Kohat nɛ Merari ni. Ba wʋsa mɔri ba tuŋ, ka banɛ an; Gerson dim nɛ Kohat dim nɛ Merari dim. 58 Bama mɛ da an Levi tuŋ: Libni dim nɛ Hebron dim nɛ Mahli dim nɛ Musi dim nɛ Kora dim. (Kohat da anɛ Amram yaab. 59 Amram pu'a yʋ'ʋri da buon Jokɛbɛd ka o yi Levi dɔɔgin la na. Levi da du'a o nɛ Egipt teŋin. On da kul Amram la o da du'anɛ Aaron nɛ Moses nɛ ba taʋn Miriam. 60  Aaron biisi da an Nadab nɛ Abihu nɛ Elieza nɛ Itamar. 61  Amaa Nadab nɛ Abihu da nyu'oe bugum maal tudaar maannɛ tis Zugsɔb la ka li pʋ dɔl suorɛ ka linzug ka ba da kpi.) 62 Levi dɔɔg biribis banɛ da an wʋʋ nwadig bɛɛ gaad ala la kal da anɛ tusa pisi nɛ atan' (23,000). Ba da pʋ kaali ba paas Israel dim la nii bɔzugɔ, ba da pʋ di'e pʋʋr si'a Israel dim sʋʋginɛ.
63 Bama ka Moses nɛ Aaron onɛ an maanmaan la da kaal saŋa kanɛ ka ba da kaal Israel dim Moab teŋ kanɛ an sassi ka kpi'e Joodan kɔldaug zin'ikanɛ lɔ'ɔŋidi ken Jeriko la. 64 Baa ba nid yinne da pʋ paas banɛ ka Moses nɛ Aaron, onɛ an maanmaan la da kaal Israel dim la Sinai mɔɔgin la, 65  bɔzugɔ Zugsɔb da yɛl nidib nwa ye ba na kpi mɔɔgin la, baa ba nid yinne kʋ kpɛlim asɛɛ Kaleb onɛ an Jefune biig la nɛ Josua onɛ an Nun biig la ma'aa.