Zelofehad pu'ayuos la yɛla
27
1 Pu'asada da bɛ, ka an Zelofehad pu'ayuos. Zelofehad da anɛ Hifa biig, ka Hifa mɛ an Gilead biig, ka Gilead mɛ an Makir biig, ka Makir mɛ an Manase biig. Ba da yinɛ Manase onɛ an Josef biig la dɔɔgin na. Pu'asada la yʋda da anɛ Mahla nɛ Noa nɛ Hogila nɛ Milika nɛ Tiza. 2 Ba da keŋ li'el La'asʋg Fuug Sʋgʋr la, ka zi'en Moses, nɛ Elieza onɛ an maanmaan la nɛ nidib la wʋsa tuongatib la tuon ka yɛl ye, 3 “Ti saam da kpinɛ mɔɔgin la. O da pʋ pɛ'ɛs Kora nya'andɔlib banɛ da la'as taaba ki'is Zugsɔb la, amaa on da kpinɛ o mɛŋ tʋʋmbɛ'ɛd yɛla ka pʋ bas baa biribiŋ yinne nya'aŋa. 4 Bɔ ka li an ye ti saam yʋ'ʋr bɔdig o tuŋ la ni, on pʋ mɔr biribiŋ la zugɔ? Tisim tinam faari ti saam nidib la sʋʋgin.”5 Alazug, Moses da nɔki ba sɔsʋg la keŋ Zugsɔb la tuon, 6 ka Zugsɔb la yɛl o ye, 7 “Zelofehad biis la yɛt si'el la anɛ sida. Li anɛ tilas ye fʋ tisi ba faari ba saam nidib la san'an ka nɔki ba saam faar la lɛbisi tisi ba. 8 Yɛlim Israel dim la ye, sɔ' ya'a kpi ka pʋ bas biribiŋ nya'aŋa yanam on nɔkimi o faari tis o bipumis. 9 O ya'a pʋ mɔr bipumisɛ, yanam nɔkim tis o pitib bɛɛ o bieya. 10 O ya'a lɛn ka' bier bɛɛ pitʋ, yanam on nɔkim tis o saam pitib nɛ o bieya. 11 O saam ya'a ka' bieya bɛɛ pitiba yanam nɔkim faar la tisi onɛ kpin o tuŋ la ni ka o sʋ'oe li. Nɛ' anɛ linɛ dɔl suori tis Israel dim wʋsa, wʋʋ Zugsɔb la tis Moses nɔɔr si'em la.”
Josua di'e Moses kpi'euŋ la yɛla
12 Ka Zugsɔb la yɛl Moses ye, “Dʋm Abarim zuor la zugʋ gɔs teŋ kanɛ ka m nɔki tis Israel dim la. 13 Fʋ ya'a nyɛɛ naae fʋ na maal ka'alim, wʋʋ fʋ bier Aaron, 14 bɔzugɔ nidib la da ki'isim kɔlʋg linɛ bɛ Zin mɔɔgin la, ya babayi' la da zan'asi m nɔɔr ka pʋ tis man onɛ an kasi la girima nidib la tuonnɛ.” (Nɛ' da anɛ ku'obanɛ da bɛ Meriba Kades teŋin, Zin mɔɔgin la.) 15 Moses da yɛl Zugsɔb la ye, 16 “M Zugsɔb Wina'am onɛ an ninsaal wʋsa vʋm, gaŋim sɔ' ka o an nidib nwa tuongat 17 ka gati ba tuon tanpin. Onɛ na dɔlli ba yit ka dɔlli ba lɛbid na, linɛ na kɛ ka ba kʋ nwɛnɛ kɔnbid banɛ ka' kɔnbkemma.” 18 Dinzug Zugsɔb la da yɛl Moses ye, “Tɔ, gaŋim Josua onɛ an Nun biig ka m siig la bɛɛ o zug la, ka nɔki fʋ nu'ugʋ pa'al o zug. 19 Kɛl ka o zi'en Elieza onɛ an maanmaan la nɛ nidib la wʋsa tuon, ka tis o kpi'euŋ la ba nini ni. 20 Tisim o fʋ kpi'euŋ la buudi linɛ na kɛ ka Israel nidib la wʋsa di'e o nɔɔr. 21 Li anɛ ye o zi'en Elieza onɛ an maanmaan la tuon, ka Elieza na nɔk Urim baŋ Zugsɔb la bɔɔdim ka pa'al o linɛ nar ye o tʋm. Nɔɔr tisib kaŋa na kɛ ka Josua nɛ Israel dim la wʋsa yit ka lɛbid.” 22 Moses da niŋ ka li dɔl wʋʋ Zugsɔb la yɛl o si'em la. O da nɔk Josua zi'el Elieza onɛ an maanmaan la nɛ nidib la wʋsa tuon, 23 ka nɔk o nu'ugʋ pa'ali o zugʋ maal o tuongat, wʋʋ Zugsɔb la pa'al Moses si'em la.