Josua na di'e Moses zin'ig
31
1 Moses da yina pian' naar pian'abama tis Israel dim ye, 2 “Man anɛ yʋma kɔbiga nɛ pisi, ka kʋ lɛn nyaŋi gaadi ya tuonnɛ. Zugsɔb la yɛlim ye, ‘Fʋ kʋ lɔ'ɔŋ Joodan kɔldaug laa.’ 3 Ya Zugsɔb Wina'am la na gaadi ya tuon ka san'am buudbanɛ bɛ teŋin la. Josua na gaadi ya tuonnɛ lɔ'ɔŋ wʋʋ Zugsɔb la yɛl si'em la. 4 Zugsɔb la na niŋi ba wʋʋ on niŋ Amor dim na'anam, Sihon nɛ Og, ka san'ami ba la'am nɛ ba teŋ la. 5 Zugsɔb la na zaŋi ba niŋi ya nu'usin, ka na niŋi ba wʋʋ mam tisi ya nɔɔr si'em la. 6 Zi'enimi sʋ'ʋŋa, ka kpɛ'ɛŋi ya sʋnf. Da zɔti dabiem bɛɛ kɛ ka dabiem kpɛn' ya ba yɛlaa. Ya Zugsɔb Wina'am na bɛ nɛ ya la zug, o kʋdim kʋ basi ya bɛɛ tami ya yɛlaa.” 7 Moses da buol Josua ka o yi Israel dim wʋsa tuon na ka o yɛl o ye, “Zi'enim sʋ'ʋŋa ka kpɛ'ɛŋi fʋ sʋnf. Asɛɛ ka fʋ dɔl nidib nwa keŋ teŋ kanɛ ka Zugsɔb la da pɔ ye o na tisi ba yaanam la, ka na pʋdigi tisi ba ka li aan ba faar. 8 Zugsɔb la mɛŋ na gaadi fʋ tuon ka na bɛ nɛf. O kʋdim kʋ basif bɛɛ o tami fʋ yɛlaa. Da zɔt dabiem, da kɛ ka fʋ giinla siɛn.”9 Alazug Moses da sɔb wadkaŋa tis maanmaannib banɛ an Levi biis ka an banɛ da ziid Zugsɔb Nɔnaar Daka la, nɛ Israel kpɛɛmnam la wʋsa. 10 Ani ka Moses zi'el nɔɔri tisi ba ye, “Yʋma ayɔpɔi wʋsa naarin linɛ an saŋkanɛ ka ya basid taaba sama la, ka mɛ di'emid Sʋga Gbɛɛnb Malʋŋ la, 11 saŋkanɛ ka yanam Israel dim wʋsa la'asidi ya Zugsɔb Wina'am tuon na zin'ikanɛ ka o na gaŋ la, fʋnɛ na karim wada nwa ba tuon ka ba wʋm. 12 La'asim nidib la, dap nɛ pu'ab nɛ biis nɛ saam banɛ bɛɛ ya tempʋʋdin la, ka ba kɛlis ka zamis ka zɔɔ ya Zugsɔb Wina'am la, ka dɔl wada kaŋa sʋ'ʋŋa. 13 Ba biis banɛ nam zi' wada kaŋa yɛla la, asɛɛ ka ba wʋmi li ka zamisi li, din ka ba na zɔti ya Zugsɔb Wina'am, ya ya'a lɔ'ɔŋ Joodan kɔldaug la sʋ'ʋg teŋ kanɛ ka ya kpɛn'ɛd la.”
Israel tʋbzian'asim la yɛla
14 Zugsɔb la yɛl Moses ye, “Nannanna fʋ kum dabisir li'el ya. Buolim Josua ka ya keŋ La'asʋg Fuug Sʋgʋrin la, ka m na bas o suor ka o pin'il tʋʋma.” Ka Moses nɛ Josua dɔl taaba keŋ La'asʋg Fuug Sʋgʋrin la. 15 Ka Zugsɔb la nie o mɛŋ Sʋgʋrin la nwɛnɛ saŋgbauŋ nɛ, zi'en Fuug Sʋgʋr la za'anɔɔrin. 16 Ani ka Zugsɔb la yɛl Moses ye, “Fʋ yʋ'ʋn na maal ka'alim. Li kʋ yuugɛ ka nidib la na maali ba mɛŋ wʋʋ pu'agɔɔnda nɛ, dɔl teŋ zʋŋ wina teŋ kanɛ ka ba kpɛn'ɛd la ni. Ba na bas mam, ka san'am nɔnaar kanɛ ka m maal nɛ ba la. 17 Dabiskan la daar m sʋnf na pɛlig ka m basi ba. M na su'a m nindaa ka kɛɛ ba ka ba san'am. Tɔɔg nɛ yɛlmugusa na lii ba zugin. Daakan ka ba na bu'osid taaba ye, ‘Yɛlpakir kanɛ yʋ'ʋn bɛɛ ti zugin nwa ka'anɛ ti Wina'am la pʋ lɛm bɛ nɛ ti laa?’ 18 M sid na su'a m nindaa daakan la, ba tʋʋmbɛ'ɛd kanɛ ka ba tʋm ka fɛndigi dɔl winsieba la zug. 19 Nannanna sɔm yʋʋm kaŋa, ka pa'al Israel dim, ka ba na yʋ'ʋmmi li ka li na di kasɛti tisim ka li dii ba. 20 M ya'a ti mɔri ba kpɛn' teŋ kanɛ pʋbid bin'isim nɛ siind ka m da yɛl nɔɔri zi'eli ba yaanam la, ka ba ya'a ti dii tig ka li an sʋ'ʋŋa tisi ba, ba na fɛndigi dɔl winsieba wɔ'ɔgidi ba, ka zan'as man ka san'am m nɔnaar la. 21 Ka tɔɔg nɛ mugusʋg bɛdegʋ ya'a ti paae ba, yʋʋm kaŋa na an kasɛti dii ba bɔzugɔ ba yaas kʋ tam. M pʋn mi' ba pʋtɛn'ɛr nɛ ban an ninsieba hali ka m nam pʋ mɔri ba kpɛn' teŋ kanɛ ka m pɔɔ zi'el ye m tisi ba la.” 22 Ka Moses sɔb yʋʋm kaŋa pa'al Israel dim la daakan la.
23 Zugsɔb la da zi'el nɔkaŋa tis Josua onɛ an Nun biig la ye, “Zi'enim sʋ'ʋŋa ka kpɛ'ɛŋi fʋ sʋnf, ka fʋnɛ na mɔr Israel dimi keŋ teŋ kanɛ ka m pɔ nɔɔri zi'el la, ka mam mɛŋ na bɛ nɛf.” 24 Moses n da sɔb wada la niŋ gbauŋʋn la yii li pin'ilʋgʋn keŋ paae li naarin nya'aŋ la, 25 o da zi'el nɔkaŋa tis Levi dim banɛ ziid Zugsɔb Nɔnaar Daka la, 26 ka yɛli ba ye, “Nɔkimi wada gbauŋ kaŋa digili kpi'eli ya Zugsɔb Wina'am Nɔnaar Daka la bɛ si'el la. Ka li na bɛɛ ani ka an kasɛti dii ya. 27 M mi' ya zuti kpi'em ka pʋ siakid na'ana si'em. Mam ya'a nan vʋe ka bɛ nɛ ya, ka ya zan'as Zugsɔb la nɔɔr, ka m ya'a ti kpi? 28 La'asimini ya buudi kpɛɛmnam wʋsa nɛ ya tuongatib, ka m pian' pian'abama ka ba wʋm ka buol agɔl nɛ teŋgbauŋ ka ba di kasɛt. 29 M mi' ye m kum nya'aŋ, ya na kpɛn' filʋŋ ka fɛndig suokanɛ ka m pa'ali ya la ni. Dabisa kenna ka tɔɔg nɛ yɛlpakir na paae ya, bɔzugɔ, ya na tʋm bɛ'ɛd Zugsɔb la san'an ka o sʋnf na pɛlig nɛ ya nu'usi tʋm si'el la zug.” 30 Ka Moses pin'ili karim yʋʋma gbauŋ la pin'ilʋgʋn ti paae li naar bɛn, ka Israel dim la wʋsa wʋm.