Moses yʋʋm
32
1 Saŋgbana, kɛlisimi ka m na pian';Teŋgbauŋɔ, wʋmmi m nɔɔr yɛlʋg!
2 Kɛl ka m pa'ala nwɛnɛ saa niid nɛ,
ka m pian'ad nwɛnɛ mɛligim lit nɛ.
Ka pian'ad la na nwɛnɛ saa niid mɔpaala zug nɛ,
ka nwɛnɛ satita'ari niid tutuud zug nɛ.
3 M na mɔɔl Zugsɔb la yʋ'ʋr.
Zun'omi ti Wina'am la
ye, o zu'oe gat si'el wʋsa!
4 O anɛ tampiing ka o tʋʋma wʋsa an sʋ'ʋŋa, ka dɔl suor.
O anɛ onɛ an sida sɔb ka pʋ tʋm bɛ'ɛdɛ;
o anɛ pʋpiel ka o zi'esim an sʋ'ʋŋa.
5 Amaa ba tʋm bɛ'ɛdi pɔ'ɔg o,
ka pʋ nar ye ba aan o nidiba.
Ba anɛ zʋmaaŋ kanɛ an ziri dim
ka ba tʋʋma pʋ dɔl suorɛ.
6 Yanamɛ yɔɔd Zugsɔb la si'em laa?
Ya anɛ zɔn nɛ yalimnam!
Li ka' onɛ aan ya saam ka ya'abi yaa?
Ka' onɛ maali yaa?
7 Tɛnri kʋdimin yɛla,
ka tɛn'ɛs zʋmaana banɛ gaad la.
Bu'osimi fʋ saam ka o na yɛlif,
bu'osimi kpɛɛmnam ka ba na tu'asi ya li gbin.
8 Wina'am Onɛ Gaad Si'el Wʋsa la da tɔndi tis buudi wʋsa
o tisi ba, ba sʋ'ʋlim zin'is.
O maal titɔndisi tis nidib la
ka da pʋdig ka li dɔl wʋʋ Israel biis la kalli an si'em la.
9 Amaa Zugsɔb la din anɛ o nidib la,
Jakob ka o gaŋ ka o aan o faar.
10 O da nyɛ ba sian'arin la, zin'ikanɛ ma'ae sillimm ka nidib kae,
ka mɔri ba yina ka lusi ba ka gɔsidi ba.
O guri ba nwɛnɛ o mɛŋ nimbielim nɛ.
11 Ka nwɛnɛ silʋgʋ zamisidi o biis ian'ab nɛ
ka yadig kpʋkpama laannɛ bɔɔd ye o gɛ'ɛŋi ba.
12 Zugsɔb la ma'aa da dɔl o nidib la.
Win zʋŋ da pʋ pɛ'ɛsi o san'anɛ.
13 O da kɛya ka ba sʋ'ʋg tɛɛns banɛ bɛ kʋkʋna nɛ zuoya ni la,
ka diisi ba nɛ zʋʋd linɛ bɛ pɔɔdin la,
nɛ siind linɛ bɛ tampiingin la,
nɛ kpaam linɛ yit kugkpi'ema ni na.
14 Niigi nɛ bʋʋs la da mɔr bin'isim bɛdegʋ.
Ba da mɔr pɛ'ɛsʋma nɛ bʋsʋma nɛ na'asʋma.
Ki nɛ ban bɔɔd dansi'a wʋsa da bɛ.
15 Zugsɔb nidib la da mɔr kpan'am nɛ zʋʋd bɛdegʋ
ka nɔbi vɛnl la,
ba yʋ'ʋn da basi ba Wina'am onɛ maali ba la.
Ba da zan'asi ba Faangid onɛ aan ba Tampiing la.
16 Ba da kɛya ka o mɔr fufum nɛ win zʋna,
ka kɛ ka o sʋnf pɛlig nɛ bada banɛ an yɛlkisa la.
17 Ba da maan maana tisid kikiris banɛ ka' Wina'am;
wina banɛ ka ba da nan zi',
wina banɛ ka ba nyɛ ka li pʋ yuugɛ,
nɛ wina banɛ ka ba yaanam da pʋ na'asida.
18 Ya bas Tampiing onɛ aan ya ba' la,
ka tam Wina'am kanɛ du'a ya la.
19 Zugsɔb la nyɛnɛ nɛ' ka zan'asi ba
bɔzugɔ, o biribis nɛ o bipumis la da kɛ ka o sʋnf pɛlig.
20 Ka Zugsɔb la yɛl ye,
“M na bidi ba kudug
ka gɔs ye ba naar na an wala.
Ba anɛ zʋmaaŋ kanɛ ka ba zut kpi'em
ka ba ka' sida dima.
21 Ba kɛya ka m mɔr fufum nɛ linɛ ka' winaa,
ka pɛligi m sʋnf nɛ ba ba'ayaalis la.
M mɛ na kɛ ka ba mɔr nyuur nɛ buudbanɛ ka' vɔɔnrɛ,
m na kɛ ka ba sʋnf duoe nɛ nidib
banɛ an yalimnam ka pʋ gban'ad yɛla gbinnɛ.
22 Bɔzugɔ m sʋnf pɛlignɛ hali dit nwɛnɛ bugum nɛ.
Li ditnɛ hali paad teŋ teŋir,
li na dii kanb teŋgbauŋ nɛ li zʋʋd wʋsa
ka zuoya gbina ni wʋsa la'aŋ bugum.
23 M na kɛ ka yɛltɔɔd lii ba zugin,
ka tɔɔn ba wʋʋ piema nɛ.
24 M na kɛ ka Apʋnya'aŋ-laal kɔ'ɔm la buudi li na kʋʋ ba.
Ban'abɛ'ɛd na gban'e ba ka ba kpi.
M na kɛ ka bʋnyuos gban'e ba,
ka wa'abɛ'ɛdnam dumi ba.
25 Ba na zabi kʋʋ ba suoya ni,
ka ba ya' pʋʋgin dabiem na bɛ.
Ba na'akim nɛ pu'asada wʋsa na kpi,
bilies nɛ bʋnkʋt kʋ kpɛlim.
26 M gban'e ye m na widigi ba
ka sɔ' kʋ lɛn tiɛn ba yɛl ya'asɛ.”
27 Amaa m zɔtnɛ ba dataas la
kʋ gban'e li gbinnɛ,
ka yɛl ye, “Tinam mɛŋ paŋ ka ti nyaŋi ba.
Li ka' Zugsɔb la tʋm nɛ' wʋsa.”
28 Ba anɛ buudkanɛ ka ba ya'am kae,
ka ba mɛ pʋ mɔr baŋirɛ.
29 Ba ya'a mɔrin nɛ ya'am, ka gban'an lina gbin,
ka tɛn'ɛsi baŋi ba naari na ti an si'em, li naan sɔn'ɔn.
30 Nid yinne na niŋ wala kad nidib tusirɛ?
Bɛɛ nidib ayi' kad tusa piiga ka ba zɔ,
ka li ya'a ka'anɛ ba Tampiing la kuosi ba?
Ya'a ka'anɛ Zugsɔb la zaŋi ba niŋi ba nu'uginɛ.
31 Ba tampiing la pʋ nwɛnɛ tinam Tampiing la.
Hali ti dataas la mɛŋ mi'.
32 Ba vain tiig la yinɛ Sodom vain tiigin la na
ka yi Gomora pɔɔdin na.
Ka ba tiis wala la an yabid,
bɛɛ yabid linɛ bɛ dunduug nɔɔrin.
34 Zugsɔb la yɛl ye,
“Mam gban'e ye m niŋ Israel dim nɛ ba dataas si'em la,
bɛ nɛ m sʋʋnrin,
ka m guri li nwɛnɛ m arezak nɛ.
35 “Manɛ na yɔ tʋʋmbɛ'ɛd sam.
Saŋa kenna ka ba na sadigi li.
Ba dabisbɛ'og daar pʋ lalla.
Ka namisʋg zɔt tɔ'ɔtɔ paadi ba.”
36 Zugsɔb na kadi o nidib saria
ka zɔɔ o yammis nimbaanlig,
o ya'a ti nyɛ ka ba paŋ naae
ka banɛ an yammis bɛɛ banɛ sʋ'oe ba mɛŋ lɛn ka' kpi'euŋɔ.
37 O yʋ'ʋn na bu'os ye, “Ba wina la bɛ yaanɛ?
Tampinkanɛ ka ba su'a ba mɛŋ la bɛ yaanɛ?
38 Wina banɛ ɔnbi ba maana ni'im linɛ mɔr kpaam
ka nuu ba maana daam la bɛ ya?
Kɛl ka bama sʋŋi ya, kɛl ka ba faaɛn ya!
39 Nannanna, gɔsimi ya,
Manɛ la,
Win si'a lɛn kae asɛɛ mam ma'aa.
Manɛ kʋʋd ka lɛn tisid vʋm.
Manɛ pu'alim ka maligim ti'ebid.
Sɔ' kae na yis linɛ bɛ man nu'uginɛ.
40 M ʋki m nu'us agɔla ka ye,
nɛ Zugsɔb onɛ vʋe saŋa wʋsa la yʋ'ʋr zug.
41 M ya'a saasi m sʋ'ʋraug kanɛ diti nyɛɛn pil-pil la,
ka m nu'ug gban'e li sariakadib zin'igin,
m na yɔ m dataas la sam
ka yɔ banɛ kisi m la sam.
42 M na kɛ ka m piema la nu ziim kʋʋl,
ka m sʋ'ʋraug la na kʋ banɛ wʋsa zan'asi m nɔɔr.
Hali ba tuongatib nɛ ban gban'e sieba la wʋsa na kpi.”
Ba pa'al nidib la yʋʋm la
43 Ka Moses yɛl nidib la ye,
“Buudi wʋsa, maalimi sumalisim la'am nɛ Zugsɔb nidib la,
Bɔzugɔ, o na yɔ sam o yammis la yɛla.
O na yɔ o bi'emnam la sam
ka sɔs suguru o nidib nɛ o teŋ la tʋʋmbɛ'ɛd zug.”
44 Moses nɛ Josua onɛ an Nun biig la da kena yʋ'ʋm yʋʋm kaŋa, ka nidib la wʋsa tʋba wʋm. 45 Moses n da yʋʋm tis Israel dimi naae la, 46 o da yɛli ba ye, “Nɔkimi mam pian' si'el wʋsa tisi ya zina la niŋi ya sʋʋnrin. Ala ka ya na nyaŋi sa'ali ya biis ka ba na gu'us ka dɔl wada kanɛ ka m tisi ya la. 47 Li ka'anɛ pian'ad linɛ an zaalim, li anɛ ya nyɔvʋr. Dɔlisiminɛ li ka lin ka ya na yuug teŋ kanɛ ka ya lɔ'ɔŋid Joodan kɔldaug ye ya sʋ'ʋg la.”
Moses na kpi Nebo Zuor zug
48 Dabiskan la daar ka Zugsɔb yɛl Moses ye, 49 “Kemi Abarim zuoya la ni, n dʋ Nebo zuor dinɛ bɛ Moab teŋin kpa'ad Jeriko tempʋʋg la. Gɔsim Keenan teŋ la, teŋ kanɛ ka m ye m tis Israel ka ba sʋ'oe la. 50 Zuokanɛ ka fʋ dʋt la zug ka fʋ na maal ka'alim, wʋʋ fʋ bier Aaron n da kpi Hor zuor zug si'em la, 51 bɔzugɔ ya babayi' la da pʋ tis man sida Israel dim la wʋsa sʋʋgin yanamɛ da bɛ Meriba ku'om linɛ pʋ lal nɛ Kades teŋ kanɛ bɛ Zin sian'arin la. Ya da pʋ kɛ ka m yʋ'ʋr an kasi Israel dim sʋʋginɛ. 52 Dinzugɔ, fʋ na nyɛ teŋ la nɛ lallisa, amaa fʋ kʋ kpɛn' teŋ kanɛ ka m zi'el nɔɔr ye m tis Israel dim la pʋʋginɛ.”