Moses niŋ Israel dɔɔd albareka
“Zugsɔb la da sig Israel dim san'an Sinai zuorin la,
ka nie o mɛŋ Seir teŋin,
ka mɛ pa'ali o mɛŋ Paran zuoya la zug.
O da kena nɛ maliaknam banɛ an kasi la tusa-tusa,
yi nya'aŋ zuor la sisɛrim.
3 Sida fʋnɛ sid nɔŋ nidib la.
Fʋ mɛŋ nidib banɛ an kasi la wʋsa bɛnɛ fʋ nu'usin.
Ba wʋsa da pɔndi ba nɔba zin'ini fʋ tuon
ka di'e fʋ pa'alʋg
4 linɛ an wada kanɛ ka Moses tisi ti
ka li anɛ Jakob nidib faar la.
5 Nidib la tuongatib da la'as nɛ Israel buudi la,
Zugsɔb la da anɛ Israel na'ab.”
6 Ka Moses yɛl Reuben yɛla ye,
“Reuben na vʋe ka kʋ kpii,
ka o nidibi mɛ kʋ an fiin nɛ.”
7 Ka yɛl Juda yɛla ye,
“Zugsɔba, kɛlisim Juda kaasig,
mɔr o lɛbi o mɛŋ nidibin na.
Kɛl ka o zab nɛ o mɛŋ nu'usi faaɛn o mɛŋ.
Sʋŋim o ka nyaŋ o dataas.”
8 Levi buudi la o yɛli ba ye,
“Onɛ aan fʋ mɛŋ nid kasi la,
ka Urim nɛ Tummim na bɛɛ o san'an
Fʋ da kpans o Masa teŋin,
ka nyɛ ka o paae fʋ ya'am Meriba ku'om bɛ zin'isi'a la.
9 O yɛl o saam nɛ o ma ye, ‘Mam ba'a kae nɛ ba.’
O pʋ gɔsi nyɛɛ o bieya nɛ o pitiba
bɛɛ o tiɛn o mɛŋ biis yɛllɛ,
amaa ka guri fʋ pian'ad la nɛ fʋ nɔnaar la ma'aa.
10 O pa'an Jakob fʋ suoya la
ka kɛt ka Israel dim baŋi fʋ wada la.
O maan maana linɛ an bʋnnyubisa,
nɛ maana linɛ nyu'od, fʋ maan daka la zug.
11 Zugsɔba, niŋim tʋʋm kanɛ ka o mi' la bareka
ka kɛ ka fʋ sʋnf malis nɛ o nu'ug tʋʋma.
Nwɛ'ɛm banɛ duoe zi'e o yɛla la siesi kɔ'
nɛ banɛ kis o la wʋsa,
ka ba kʋ lɛn duoe ya'asɛ.”
12 O yɛl Benjamin yɛla ye,
“Kɛl ka Zugsɔb nɔŋilim la bɛɛ o san'an nɛ laafi,
on gur o daar wʋsa la zug.
Zugsɔb la nɔŋ o la zug,
ka kɛ ka o bɛɛ o san'an.”
13 Ka mɛ yɛl Josef yɛla ye,
“Zugsɔb na niŋ o pɔɔd bareka
ka kɛ ka saa nɛ mɛligim naan agɔla niidi li zug
ka ku'om naan teŋin bunna.
14 Nintaŋ na kɛ ka ba tiis wal sʋ'ʋŋa
ka nwadig mɛ na nie sʋ'ʋŋa tis o,
ka li kɛ ka o zʋʋd zu'oe hali.
15 Fʋ na nyɛ zʋʋd bɛdegʋ ka li zu'oe gaad yʋʋmpʋkʋda zuoya la din,
nɛ bareka linɛ yit kʋkʋna ni na la.
16 Teŋ la na tis o piinsʋŋ ka li pɛ'ɛl
ka onɛ da nie o mɛŋ tutukanɛ ka bugum da dit la,
albareka na bɛ nɛf.
Lina wʋsa na bɛ Josef zugin,
ka kɛ ka o dit na'am o ba'abiis wʋsa sʋʋgin.
17 O yikʋ na nwɛnɛ na'araug kanɛ aan o ma bikpɛŋ nɛ.
O iila mɛ na nwɛnɛ wɛnaaf iila.
O na nɔki li zɛ buudi wʋsa hali,
la'am nɛ banɛ bɛ dunia kpikpɛmis la wʋsa.
Efiram dim banɛ an tusa piig-piig la na aan ala,
Manase banɛ an tusa-tusa la mɛ na aan ala.”
18 O yɛl Zebulun yɛla ye,
“Zebulun dima, ya ya'a yit ya na mɔr sumalisim:
Isaka nidib mɛ na mɔr sumalisim ba yin.
19 Ba na buol nidibi la'as zuoya ni,
ka maal pʋpielim maana.
Ba na di diib linɛ bɛɛ atɛukʋn bɛdegʋ la,
nɛ kpan'am linɛ su'a titanbin'isʋgin la.”
20 Gad yɛla o yɛl ye,
“Albareka bɛ nɛ onɛ yalig Gad sʋ'ʋlim.
Gad na bɛɛ anina wʋʋ gbigim nɛ
ka na aansid kpʋkpama bɛɛ zut.
21 O gaŋ paalʋ linɛ an sʋm hali la tis o mɛŋ;
tuongatib pʋʋr ka o tis o mɛŋ.
Nidib la zugdaannamɛ la'as la,
o tʋm Zugsɔb pʋpielim tʋʋma
nɛ o sariakadib Israel dim yɛla.”
22 Ka pian' Dan yɛla ye,
“Dan anɛ wʋʋ gbigimbili
naam Basan zuoya ni iank na.”
23 O yɛl Naftali yɛla ye,
“Naftali ka Zugsɔb la nimbaanlig bɛ nɛ o,
ka o albareka bɛɛ o san'an bɛdegʋ.
O na sʋ'oe bɛuŋ tita'ar teŋ la mɔri
keŋ paae li dagɔbʋg baba.”
24 O mɛ yɛl Aser yɛla ye,
“O na nyɛ zugsʋŋʋ gaad biis wʋsa.
O ba'abiis la na nɔŋ o hali.
O na mɔr kpaam piesidi o nɔba.
25 Fʋ gam tabidis la na anɛ kʋnt
ka fʋ na mɔr paŋi paae fʋ nyɔvʋr bɛn.”
Wina'am zun'or
26 “Sɔ' lɛn kae nwɛnɛ Israel Wina'am.
Onɛ bɛ arezana ni ka sʋŋidif la,
ka an kpi'euŋ sɔb saŋgbana ni.
27 Wina'am kanɛ pʋ mɔr naar la aan fʋ gu'ud,
ka o nu'us banɛ bɛ saŋa wʋsa la lusif.
O na kadi fʋ dataa la yisi fʋ tuon,
ka na yɛl ye, ‘San'am o!’
28 Israel na bɛɛ o gʋllim ka daamʋg kae.
Jakob nidib na bɛ teŋ kanɛ mɔr zʋʋd nɛ danpaalig,
Ka mɛligim na lit zin'ig kan la.
29 Israel, fʋ na mɔr albareka.
Anɔ'ɔnɛ bɛɛ nwɛnɛ fʋ ka Zugsɔb la faaɛn ba?
O anɛ fʋ gbanti'edʋg ka sʋŋidif,
ka aan fʋ zaba sʋ'ʋg kanɛ mɔr kpi'euŋ.
Fʋ dataas wʋsa na vanbini fʋ tuon
ka fʋ nɔɔdi ba nya'aŋi gat.”