Moses gɔs teŋ la
34
1 Moses yʋ'ʋn da yi Moab teŋ kanɛ an sassi la ni keŋ dʋ Nebo zuoya la zin'ikanɛ buon Pisig Zuor ka kpa'ad Jeriko teŋ la. Ani ka Zugsɔb la da pa'al o teŋ la wʋsa: linɛ an Gilead sʋ'ʋlim paae Dan sʋ'ʋlim la, 2 nɛ Naftali sʋ'ʋlim wʋsa, nɛ Efiram nɛ Manase sʋ'ʋlim, nɛ Juda teŋ wʋsa mɔr ala paae Atɛuk linɛ bɛ ya-tuona la, 3 nɛ Negef teŋgbauŋ la, nɛ Joodan bɔn'ɔg din yi Jeriko, linɛ an Kpʋkparis Tempʋʋg la, mɔr ala paae Zoar teŋ. 4 Ani ka Zugsɔb la yɛl o ye, “Nɛ'ɛŋa an teŋ kanɛ ka m pɔ nɔɔri zi'el Abraham nɛ Isaak nɛ Jakob, man da yɛli ba ye, m na nɔki li tisi ba yaas la. Nannanna, m kɛya ka fʋ nyɛɛ li nɛ fʋ nini, amaa fʋ kʋ lɔ'ɔŋi kpɛn' ani.”Moses kum
5 Moses onɛ an Zugsɔb tʋmtʋm la da kpi Moab teŋin wʋʋ Zugsɔb la yɛl si'em la. 6 O da mum o nɛ Moab teŋin bɔn'ɔg linɛ kpi'e Bet Peor la, amaa lin keŋ paae zina sɔ' zi' o yaʋg la bɛ zin'isi'a. 7 Moses da anɛ yʋma kɔbiga nɛ pisi ka nyaan kpi, la'am nɛ wala o nini da kpɛn nyɛt nɛ nyain ka o mɛ pʋ tadigɛ. 8 Israel dim da bɛ Moab teŋ kanɛ an sassi la ni maan sʋnsa'aŋ Moses zug dabpistan' hali ti paae saŋa kanɛ ka ba kaasig nɛ kukuma dabisa ti naae.
Josua di'e Moses zin'ig
9 Josua onɛ da an Nun biig la da pɛ'ɛl nɛ siig ka paam ya'am bɔzugɔ, Moses da nɔk o nu'usi pa'al o zug. Israel dim la da kɛlisidi o pian'ad ka tʋm Zugsɔb la da yɛl Moses si'em la.
Ban dʋ'ʋs Moses yʋ'ʋr
10 Lin yi saŋkan la Wina'am nɔdi'es pʋ lɛn duoe Israel teŋin nwɛnɛ Moses ya'as ka on nɛ Zugsɔb nindaa kpa'ad taabaa. 11 Ka sɔ' mɛ pʋ lɛn tʋm tʋʋmnyalima nɛ kilima zanbina wʋʋ Zugsɔb la da tʋm o ka o tʋm Egipt Na'ab Faaro nɛ o na'ayikpɛm nɛ teŋgbauŋ la wʋsa zugin si'em la. 12 Sɔ' nan zi' pa'al paŋ tita'ar bɛɛ maal bʋnnyalima banɛ ka Moses da maal Israel teŋin la.