Zi'elʋg 30

1 Albareka nɛ nɔpɔɔr banɛ ka m tisi ya zina la ya'a ti paae ya na, ka ya di'e ba ya sʋʋnrin, zin'ikanɛ wʋsa ka Zugsɔb onɛ aan ya Wina'am la widigi ya kpɛn'ɛs buudbama sʋʋgin la, 2 ka yanam nɛ ya biis la ya'a ti lɛbi ya Zugsɔb Wina'am san'an na ka siak o nɛ ya sʋnf wʋsa nɛ ya pʋtɛn'ɛr wʋsa, nwɛnɛ mam zi'el nɔɔri tisi ya si'em zina la, 3 ya na lɛn nyɛ zusʋŋ ka Zugsɔb la na zɔɔ ya nimbaanlig ka yisi ya buudbanɛ ka o widigi ya kpɛn'ɛs la ni, ka ku'oli ya lɛbis na ya'as. 4 Hali ya ya'a widigi kpɛn' zin'ikanɛ lalli ka' bɛnnɛ, ya Zugsɔb Wina'am la na ku'oli ya mɔri lɛbis na. 5 O na mɔri ya lɛbisi ya yaanam teŋin na, ka ya na sʋ'ʋgi li. O na kɛ ka ya mɔr laafi ka wiaki zu'oe gati ya yaanam la. 6 Ya Zugsɔb Wina'am la na tiaki ya sʋnya nɛ ya yaas sʋnya ka ya na nɔŋ o nɛ ya sʋnya nɛ ya pʋtɛnda wʋsa ka na kpɛn vʋe. 7 Ya Zugsɔb Wina'am la na kɛ ka nɔpɔbama wʋsa paae ya dataas nɛ banɛ kisi ya la wʋsa. 8 Ka ya na lɛn lɛbi dɔl Zugsɔb la nɔzi'ela banɛ ka m tisi ya zina la. 9 Ala ka ya Zugsɔb Wina'am la na niŋi ya albareka, yanamɛ nɔki ya nu'ugʋ tʋm si'el wʋsa, nɛ ya biis nɛ ya bʋnkɔnbid la wʋsa. Ya pɔɔd la zʋʋd na maal sʋ'ʋŋa tisi ya. Zugsɔb la na nɔŋi ya ka o sʋnf na ma'ae ya zug, nwɛnɛ on da nɔŋi ya yaanam si'em la. 10 Ya ya'a siaki ya Zugsɔb Wina'am nɔɔr, ka dɔl o nɔzi'elʋg nɛ o gban'ar linɛ sɔb wada gbauŋʋn la, ka fɛndigi lɛbi ya Zugsɔb Wina'am la san'an nɛ ya sʋnf nɛ ya pʋtɛn'ɛr wʋsa, li sid na niŋ ala.

Vʋm nɛ kum gaŋir yɛla

11 Gɔsima! Nɔzi'elkanɛ ka m tisidi ya zina la anɛ linɛ pʋ tɔi tisi ya ka ya na ye ya kʋ nyaŋɛ. 12 Li ka' linɛ bɛɛ agɔl ka ya na bu'osid ye “Anɔ'ɔn na dʋ arezana nii mɔr na tisi ti ka ti wʋm ka tʋm?” 13 Li mɛ pʋ lɔ'ɔŋ Atɛuk la ka ya na bu'os ye, “Anɔ'ɔn na lɔ'ɔŋ Atɛuk la mɔr na tisi ti ka ti wʋm ka tʋm?” 14 Ayei, pian'ʋk la kpi'e nɛ ya ka bɛɛ ya nɔɔrin nɛ ya sʋnfʋn. Li bɛɛ ya nɔɔrin ka bɛɛ ya sʋnya ni ka ya na siaki li. 15 Gɔsima, zina nwa, m nɔknɛ vʋm nɛ bʋnsʋma la digili ya tuon, ka mɛ nɔk kum nɛ san'auŋʋ digili ya tuon. 16 M zi'el nɔɔr zina tisi ya ye ya nɔŋi ya Zugsɔb Wina'am, ka dɔl o suoya la, ka dɔlis o nɔzi'ela nɛ o gban'ar nɛ wada. Ala ka ya na vʋe ka nɔbig, ka ya Zugsɔb Wina'am la niŋi ya bareka teŋ kanɛ ka ya kpɛn'ɛd ye ya sʋ'ʋg la. 17 Amaa ya sʋnya ya'a fɛndig ka ya pʋ siakɛ ka igin teŋin wɔ'ɔg winsieba, 18 m nie pa'ali ya zina nyain ye ya na ba'asi san'am. Ya nyɔvʋr kʋ wa'am teŋ kanɛ ka ya lɔ'ɔŋid Joodan kɔldaug ye ya sʋ'ʋg la ni. 19 Zina dabisir la, m buon agɔl nɛ teŋgbauŋ ye ba di kasɛt ye m digil vʋm nɛ kum ya tuon, ka digil albareka nɛ nɔpɔɔri ya tuon. Gaŋimi vʋm ka yanam nɛ ya biis na vʋe yuug, 20 ka nɔŋi ya Zugsɔb Wina'am la. Kɛlisimini o ka gban'e o nɛ nu'us ayi', ka Zugsɔb la aan ya nyɔvʋr. Ka onɛ na kɛ ka ya yʋma zu'oe teŋ kanɛ ka o pɔɔ zi'el ye o tisi ya yaanam Abraham nɛ Isaak nɛ Jakob la.