Zugsɔb la tɛndigi o nɔnaar
29
1 Pian'abama ka Zugsɔb la da yɛl Moses ye o yɛl Israel dim la paas nɛ nɔnaar kanɛ ka o da maal nɛ ba Horeb zuorin la.2 Moses da la'as Israel dim wʋsa yɛli ba ye:
Ya mɛŋ nini nyɛ Zugsɔb la da niŋ Na'ab Faaro Egipt teŋin si'em, on nɛ o na'ayikpɛɛmnam nɛ teŋ la wʋsa. 3 Ya mɛŋ nini da nyɛ maktitada nɛ zanbin nyalima nɛ kilima la. 4 Amaa hali din yi saŋkan la ti paae zina, Zugsɔb la pʋ tisi ya pʋtɛn'ɛr kanɛ gban'ad si'el gbin bɛɛ kɛ ka ya nini nyɛt bɛɛ ya tʋba wʋmma. 5 Yʋma pisnaasi banɛ ka m mɔri ya yi sian'arin la ya fuud bɛɛ ya ta'ada pʋ kɛndigɛ. 6 Ka ya pʋ ɔnb bodobodo bɛɛ nu daam buudi wʋsaa. M niŋ nɛ'ɛŋa nɛ ye ya baŋ ye manɛ aan ya Zugsɔb Wina'am la. 7 Ka yanamɛ paae zin'ikaŋa la, Sihon onɛ an Hesbon na'ab la, nɛ Og onɛ an Basan na'ab la, yina ye ba zab nɛ ti; amaa ka ti nyaŋi ba 8 ka faaɛn ba tɛɛns la tis Reuben nɛ Gad dim nɛ Manase dɔɔg la pʋsʋk.
9 Gu'usimi ka dɔlis nɔnaar la pian'abama, ala ka yanamɛ tʋm si'el wʋsa na an sʋ'ʋŋa tisi ya. 10 Zina nwa, ya wʋsa zi'enɛ ya Zugsɔb Wina'am la tuon, yanam nɛ ya tuongatib nɛ ya kpɛɛmnam nɛ ya zugdaannam nɛ Israel nidib wʋsa, 11 la'am nɛ ya biis nɛ ya pu'ab nɛ saam banɛ bɛ nɛ ya, ya la'asʋg zin'igin nwaadi ya daad ka wikidi ya ku'om tisidi ya la. 12 Ya zi'e kpɛla zina ye ya maal nɔnakaŋa nɛ ya Zugsɔb Wina'am la, on pɔ nɔɔri zi'eli tisi ya la. 13 Zina Zugsɔb la siakya ye ya anɛ o nidib ka o na aan ya Wina'am nwɛnɛ on zi'el nɔɔr si'em tisi ya, ka pɔ nɔɔri zi'eli ya yaanam Abraham nɛ Isaak nɛ Jakob la. 14 Ka' yanam ma'aa yɛla ka m maan nɔnaar la ka pɔɔd nɔɔr la, 15 yanam banɛ zi'e nɛ ti kpɛla zina Zugsɔb onɛ aan ti Wina'am tuon la, amaa la'am nɛ banɛ ka' kpɛla zina la.
16 Yanam mɛŋ mi' tinamɛ da bɛ Egipt si'em, nɛ tinamɛ da dɔlisi yi tɛɛnsin si'em ti paae kpɛla na. 17 Ya da nyɛ bʋnkisa banɛ da bɛɛ ba sʋʋgin nɛ bada linɛ an daad nɛ kuga nɛ linɛ an anzurifa nɛ sanlima. 18 Baŋimi ka dau bɛɛ pu'a bɛɛ dɔɔg bɛɛ tuŋ si'a da bɛ yanam banɛ zi'e nwa sʋʋgin ka o ya'am fɛndigi yi Zugsɔb onɛ aan ti Wina'am la san'an ka o keŋ pʋ'ʋsid wina banɛ ka buudbama pʋ'ʋsid la. Mid ka tuŋ si'a bɛɛ ya sʋʋgin tʋm yɛlbɛ'ɛd kaŋa buudi ka li na nwɛnɛ nya'ar kanɛ an yabid ka tɔi hali nɛ.
19 Ninkaŋa sɔb ya'a ti wʋm nɔzi'elkaŋa pian'ad la, o na mɔɔd ye o iee albareka tis o mɛŋ dinzugɔ o na tɛn'ɛs ye, “Si'el wʋsa na an sʋ'ʋŋa tisim la'am nɛ man zan'as ka nan kpɛn tʋmmi m ya'am bɔɔdim la.” Nɛ'ɛŋa na mɔr tɔɔgʋ kɛn banɛ tʋm sʋm nɛ banɛ tʋm bɛ'ɛd wʋsa zugin na. 20 Zugsɔb la kʋ kɛ ninkaŋa sɔb taali basɛ, o sʋnpɛɛn nɛ ɛndʋg na la'aŋ o wʋʋ bugum nɛ. Nɔpɔɔr linɛ sɔb gbauŋ kaŋa ni la na lii o zugin, ka Zugsɔb la na yis o yʋ'ʋr dunia kaŋa ni. 21 Zugsɔb la na fuoe on sɔb Israel buudi la wʋsa sʋʋgin, ka kɛ ka yɛltɔɔd paae o wʋʋ nɔnaar nɔpɔɔr banɛ sɔb wada gbauŋ kaŋa ni la.
22 Zʋmaana banɛ aan ya yaas nɛ saam banɛ yi teŋ lalli na ti duoe na ka nyɛ tɔɔg nɛ namisʋg nɛ ban'as banɛ ka Zugsɔb la mɔri kɛn teŋ la zugin na. 23 Teŋ la wʋsa na san'am lieb yaarim nɛ kidibir nɛ bugum, ka si'el pʋ bʋta, ka si'el mɛ pʋ yit anii. Mɔɔg bɛɛ tiig kʋ tilig anina. Li na nwɛnɛ Sodom nɛ Gomora san'auŋʋ da an si'em la, nɛ Adma nɛ Zeboim dinɛ ka Zugsɔb da san'am, o sʋnfʋ da pɛlig hali la. 24 Buudi wʋsa na bu'os ye, “Bɔ ka Zugsɔb la niŋ teŋ kaŋa wala? Bɔ ka o mɔr sʋnpɛɛn kaŋa buudi?”
25 Ka lɛbisʋg la na anɛ “Di anɛ nimbama zan'as Zugsɔb onɛ aan ba yaanam Wina'am nɔnaar linɛ ka o da tisi ba saŋa kanɛ ka o mɔri ba yi Egipt teŋin na la zug. 26 Ba da keŋɛ pʋ'ʋsid winsieba banɛ ka ba zi' ka Zugsɔb mɛ pʋ tisi ba la. 27 Alazug ka Zugsɔb sʋnf duoe ka o sʋnpɛɛn nɛ ɛndʋg la'aŋ wʋʋ bugum teŋ la zug ka o kɛ ka nɔpɔbanɛ ka ba sɔb gbauŋ kaŋa ni la paae ba. 28 Dinzug ka o da fuoe ba yisi ba teŋinɛ da'ae ba bas teŋ si'a ni, wʋʋ lin an si'em hali ti paae zina.”
29 Asida sida Zugsɔb onɛ aan ti Wina'am la kɛ yɛlsu'ada la wʋsa tis o mɛŋ, amaa linɛ ka o nie nyain pa'ali ti la, anɛ tinamɛ sʋ'oe li wʋsa, tinam nɛ ti yaas, hali ti paae saŋa kanɛ ka' bɛnnɛ, lin na kɛ ka ti na dɔlis wada nwa wʋsa.