Daar wʋsa maan la yɛla
28
1 Zugsɔb la da yɛl Moses ye 2 o yɛlim Israel dim la nɔzi'elkaŋa: “Gu'usimi ka mɔri diib maan linɛ maan nɛ bugum ka li nyuug malis la na tisim. Mɔri li na tisim saŋa kanɛ nar wʋsa.”3 Yɛlimi ba ye zʋʋd piini kanɛ ka ba na mɔri maan nyu'or maana tisid Zugsɔb la anɛ pɛribis ayi' banɛ na an yʋʋm yinne ka pʋ mɔr dɛŋŋa, ka li an daar wʋsa maan. 4 Maalimi yinne bɛogʋn ka maal yinne zaam, 5 la'am nɛ zʋʋd maan linɛ an zɔm baanlig kuribir yinne nɛ olif kpaam kɔlibir yinne. 6 Lina an daar wʋsa nyu'or maan, linɛ da pin'il Sinai zuor zug la ka li nyuug malisi tis Zugsɔb la. 7 Ka bɔ daam yubis ayi' paas pɛ'og wʋsa zug. Kpa'am bʋnnuuda maan zin'isʋŋin la tis Zugsɔb la. 8 Kɔdigim pɛrakanɛ paas ayi' la zaamnɔɔr ka maali li wʋʋ fʋn maalin zʋʋd maan nɛ bʋnnuuda maan bɛogʋn si'em la. Nɛ' anɛ nyu'or maan ka li nyuug malisi tisid Zugsɔb la. 9 Vʋ'ʋsʋm Daar la ya'a paae, yanam on maal maan nɛ pɛribis ayi' banɛ an yʋʋm yinne ka pʋ mɔr dɛŋŋa, la'am nɛ bʋnnuuda maan nɛ zʋʋd maan, linɛ an zɔmbaanlig kuriba anaasi gɛndig nɛ kpaam. 10 Nyu'or maan kaŋa ka ya na maan Vʋ'ʋsʋm Daar wʋsa paas nɛ daar wʋsa nyu'or maan nɛ li bʋnnuuda maan la.
Nwadig-nwadig maan la yɛla
11 Nwadig wʋsa pin'ilʋg daar, asɛɛ ya bɔ na'apɔla ayi', nɛ pɛraug yinne, nɛ pɛribis ayɔpɔi banɛ an yʋʋm yinne ka ka' dɛŋŋa, maal nyu'or maannɛ tis Zugsɔb la. 12 Bɔɔmi zʋʋd maan linɛ an zɔmbaanlig kuriba ayuobʋ gɛndig nɛ kpaam paas na'araug wʋsa zug; ka mɛ niŋ ala nɛ pɛraug la mɛn nɛ li zʋʋd maan linɛ an zɔmbaanlig kuriba anaasi. 13 Ka mɛ lɛn niŋ ala nɔɔ nɛ pɛribis la mɛn nɛ li zʋʋd maan linɛ an zɔmbaanlig kuriba ayi' gɛndig nɛ kpaam. Nɛ' anɛ nyu'or maan linɛ mɔr nyusʋŋ; maan linɛ maali tis Zugsɔb la nɛ bugum ka li nyuug malisi tis o. 14 Ya na paas bʋnnuuda maan, maan bama wʋsa ni: na'araug la daam na an yubis ayi', ka pɛraug la an yubig nɛ pʋsʋk, ka pɛribig wʋsa mɛ an yubig yinne. Nɛ' na an nwadig-nwadig maan linɛ ka ya na maan nwadpaalig wʋsa yʋʋm la pʋʋgin. 15 Ya ya'a yis saŋa wʋsa nyu'or maan la nɛ li bʋnnuuda maan la, li lɛn anɛ ya paas bʋraugʋ tis Zugsɔb la ka li an tʋʋmbɛ'ɛd maan.
Kum Maliak Gaadʋg malʋŋ yɛla
16 Nwadpaalig la dabpiiga nɛ anaasi daar, li anɛ ye ya tiɛn Zugsɔb Kum Maliak Gaadʋg la yɛla. 17 Li dabpiiga nɛ anu daar, ya na maal di'ema malʋŋ ka na ɔnbid bodobodo linɛ ka' danbin daba ayɔpɔi. 18 Dabisir kanɛ an yiiga la, ya na la'as taaba ka li an man Zugsɔb la la'asʋg. Da tʋmmi tʋʋma dabisbama pʋʋginɛ. 19 Ka ya na maal maannɛ tisi Zugsɔb nɛ bugum, nyu'or maan nɛ na'arapɔla ayi', nɛ pɛraug yinne nɛ pɛribis ayɔpɔi banɛ an yʋʋm yinne, ka ka' dɛŋŋa. 20 Paasimi maan linɛ an zɔm baanlig gɛndig nɛ kpaam, na'araug wʋsa zug kuriba ayuobʋ, nɛ pɛraug la zug kuriba anaasi. 21 Ka nɔk kuriba ayi' paas pɛribis ayɔpɔi la wʋsa zug. 22 Ka paas bʋraug ka li na an tʋʋmbɛ'ɛd maan. Ala ka fʋ na sɔs suguru nidib la tʋʋmbɛ'ɛd yɛla. 23 Maalimi nɛ' paas bɛogʋn wʋsa maan la. 24 Anwana ka ya na maal maan kanɛ an diib maan nɛ bugum, daar wʋsa hali ti paae daba ayɔpɔi ka li an linɛ nyuugʋ malis Zugsɔb la sʋnf: li anɛ ye li maal ala paas daar wʋsa nyu'or maan la nɛ li bʋnnuuda maan la. 25 Daba ayɔpɔi la daar yanam on la'as taaba nimmua la'asʋg kanɛ an mam Zugsɔb la din, ka da tʋmmi wʋʋ yanamɛ ɛɛnti tʋm daar wʋsa si'em laa.
Bakuainam Malʋŋ yɛla
26 Daakanɛ aan ya bʋndɛɛnna daar, ka ya tisid Zugsɔb la ya piini linɛ an zʋʋd bʋndɛɛnna ka an Bakuainam Malʋŋ saŋa la, ya na la'as la'asʋg linɛ an mam Zugsɔb la din, ka da tʋmmi ya daar wʋsa tʋʋma daakanɛ. 27 Maalimi nyu'or maan linɛ an na'araad ayi' nɛ pɛraug yinne nɛ pɛribis ayɔpɔi banɛ an yʋʋm yinne, ka li an maan linɛ nyuugʋ malisi tis Zugsɔb la. 28 Na'araug wʋsa zug, ya na maal zʋʋd maan linɛ an zɔmbaanlig kuriba ayuobʋ gɛndig nɛ kpaam, ka paas pɛraug la zug kuriba anaasi, 29 ka pɛribis ayɔpɔi la wʋsa zug na paas kuriba ayi', yi'. 30 Ka paas bʋribig ka li na an suguru sɔsʋgʋ tisi ya. 31 Maalim bama la'am nɛ li bʋnnuuda maan la wʋsa, ka paas daar wʋsa nyu'or maan nɛ li zʋʋd maan la. Baŋimi ka bʋnkɔnbid la da mɔr dɛŋŋa.