Malʋŋ dabisa yɛla
23
1 Zugsɔb la da lɛn yɛl Moses ye, 2 “Yɛlim Israel dim la ye, ‘Di'ema malimbama ka m zi'eli tisi ya. Ba anɛ mam Zugsɔb la di'ema malima ka m zi'el ye ya mɔɔli tisi ba ye ba la'asim ka maali li ka li an na'asi tis mam Zugsɔb la.’ ”Vʋ'ʋsʋm dabisir la yɛla
3 Daba ayuobʋ ka ya na tʋmmi ya mɛŋ tʋʋma, amaa daba ayɔpɔi la anɛ Vʋ'ʋsʋm Dabisir, li anɛ la'asʋg dabisir ka an mam Zugsɔb la din nyain. Yanamɛ bɛ zin'isi'a wʋsa, yanam da tʋmmi dabiskan la daarɛ, li anɛ Vʋ'ʋsʋm Dabisire tis Zugsɔb la.
Kum Maliak Gaadʋg nɛ bodobodo linɛ pʋ gɛndig danbin malʋŋ la yɛla
4 “Zugsɔb la malʋŋ dabisa nwa, la'asʋg malima banɛ an Zugsɔb la din nyain la, ka ya na mɔɔnnɛ li yɛla saŋa kanɛ ka m zi'el la wʋsa. 5 Zugsɔb Kum Maliak Gaadʋg malʋŋ la pin'inɛ nwadig kanɛ an yiiga la dabpiiga nɛ anaasi daar zaam, winnig ya'a ti kpɛn'ɛd saŋsi'a la. 6 Dabpiiga nɛ anu la daar ka Zugsɔb malʋŋ linɛ ka ba maan bodobodo ka danbin pʋ gɛndigid la pin'in, daba ayɔpɔi ka ya na ɔnbid bodobodo linɛ pʋ gɛndig danbinnɛ. 7 Dabisir kanɛ an yiiga la ya na la'as taaba ka li an man Zugsɔb la la'asʋg; ka da tʋm yanamɛ ɛɛnti tʋm si'em dabisir wʋsa laa. 8 Daba ayɔpɔi ka ya na maal nyu'or maannɛ tis Zugsɔb la. Ka daba ayɔpɔi la daar yanam on la'asim la'asʋg linɛ an kasi. Mid ka ya tʋm dabiskaŋa.”
Zʋʋd linɛ an yiiga malʋŋ la yɛla
9 Zugsɔb la da lɛn yɛl Moses ye, 10 “Yɛlim Israel dim la ye, ‘Ya ya'a ti kpɛn' teŋ kanɛ ka m ye m tisi ya la, ka buni li zʋʋd, yanam mɔr zʋʋd linɛ ka ya bʋn yiiga la na tis maanmaan la. 11 O na zi'eni ya nɔba zugʋ nyɔɔsimi li Zugsɔb la tuon ka Zugsɔb la na di'e li. Dabisir kanɛ dɔl Vʋ'ʋsʋm Dabisir la nya'aŋ ka maanmaan la na di'e li nyɔɔsim tisi ya. 12 Dabisir kanɛ ka ya nyɔɔsim zʋʋd la, asɛɛ ka ya nɔk pɛribig kanɛ nan an yʋʋm yinne ka pʋ mɔr dɛŋ la kena maal nyu'or maannɛ tis Zugsɔb la, 13 la'am nɛ zɔmbaanlig kuriba atan' ka ba gɛndig nɛ kpaam ka li an zʋʋd maan ka li anɛ maan kanɛ nyu'od ka li nyuug la malisi tis Zugsɔb la, nɛ bʋnnuuda maan daam kɔlibir yinne. 14 Mid ka ya nɔk zʋʋd linɛ an bʋndɛɛnna la maal bodobodo bɛɛ ya sɛn' li zʋʋd la di, asɛɛ yanamɛ na ti maal malimbama tisi ya Wina'am la naae. Nɛ'ɛŋa anɛ malʋŋ kanɛ ka ya na maan nɛ ya yaas banɛ na ti duoe na, yanamɛ bɛ zin'isi'a wʋsa.’ ”
Bakuainam Malʋŋ yɛla
15 Ya ya'a maali ya zʋʋd maan kanɛ an nyɔɔsʋŋ la Vʋ'ʋsʋm Dabisir ka bɛog nie, yanam kaalimi dabisa hali ti paae bakuainama ayɔpɔi. 16 Kaalimi dabisa pisnu ken paae Vʋ'ʋsʋm dabisir kanɛ paas ayɔpɔi la, ka maali zʋʋd kanɛ ka ya bʋn paalim la maannɛ tis Zugsɔb la. 17 Yanamɛ bɛ zin'isi'a wʋsa ya na yisi li nɛɛm zɔmbaanlig kuriba atan' gɛndig nɛ dabinnɛ maali sɛn' bodobodo gbila ayi' mɔri kena tis Zugsɔb la, ka li an nyɔɔsʋŋ maan kanɛ an zʋʋd kanɛ ka ya dɛŋi bʋn la maannɛ tis Zugsɔb la. 18 Nɔkim bodobodo kaŋa paas nɛ pɛribis ayɔpɔi banɛ nan an yʋʋm yinne ka pʋ mɔr dɛŋŋa n maal maan la, nɛ na'arapɔl nɛ pɛraad ayi'. Li na anɛ nyu'or maannɛ tis Zugsɔb la, la'am nɛ ba zʋʋd piini nɛ daam piini; li anɛ maan kanɛ nyu'od bugum ka li nyuug la malisi tis Zugsɔb la. 19 Ka nɔk bʋraugʋ maal maan ka li an tʋʋmbɛ'ɛd maan, nɛ pɛbibis ayi' ka ba wʋsa an yʋʋm yinne-yinne ka li an taaba la'asʋg maan. 20 Maanmaan la na nɔk pɛbibis ayi' la nyɔɔsim Zugsɔb la tuon ka li an nyɔɔsʋŋ maan, la'am nɛ bodobodo linɛ ka ba nɔk zʋʋd kanɛ ka ba bʋn yiiga maal la. Maan bama anɛ linɛ ka ba pɛsigi tis Zugsɔb la ka li an nyain ka an maanmaan la din. 21 Daakan la nɔɔ li anɛ ye ya mɔɔl ye nidib la la'as taaba la'asʋg kanɛ an Zugsɔb la din nyain la, ka da tʋm daakan la wʋʋ yanamɛ ɛɛnti tʋm si'em laa. Nɛ' anɛ zi'elʋg linɛ ka ya na dɔl saŋa wʋsa yanamɛ bɛ zin'isi'a wʋsa, yanam nɛ ya yaas bɛɛ zʋmaaŋ kanɛ na ti duoe na.
22 Fʋ ya'a buni fʋ pɔɔg zʋʋd, fʋn da buni paae titɔndiginɛ bɛɛ fʋ buni naae ka lɛn wi'isɛ. Basim tis nɔŋ dim bɛɛ banɛ an saam la. Manɛ aan ya Zugsɔb Wina'am la.
Na'atana di'ema
23 Ka Zugsɔb la da lɛn yɛl Moses ye, 24 “Yɛlim Israel dim la ye, ‘Li sʋm ye nwadkanɛ paasid ayɔpɔi la dabisir yinne daar an vʋ'ʋsʋm daar. Nidib la na la'as taaba la'asʋg kanɛ an Zugsɔb la din nyain la ka pieb na'atana tiɛn dabisir la. 25 Da tʋm tʋʋma daakan la, amaa maalimi nyu'or maannɛ tis Zugsɔb la.’ ”
Suguru sɔsʋg maan dabisir
26 Ka Zugsɔb la da lɛn yɛl Moses ye, 27 “Nwadis ayɔpɔi nwa dabpiiga daare na an Suguru Sɔsʋg Maan dabisir. Nidib la na la'as taaba la'asʋg kanɛ an Zugsɔb la din nyain la, ka sigisi ba mɛŋ ka lɔ nɔɔr, ka maal nyu'or maannɛ tis Zugsɔb la. 28 Sɔ' kʋ tʋm si'el daakan la bɔzugɔ li anɛ Suguru Sɔsʋg Maan dabisir, ka ya na maal Suguru Sɔsʋg Maannɛ tisi ya Zugsɔb onɛ aan ya Wina'am la. 29 Onɛ mɛkama pʋ siak ye o sigis o mɛŋ ka lɔ nɔɔr daakan la, asɛɛ ka ba yis o, o buudi ni. 30 M na san'am onɛ wʋsa tʋm tʋʋm si'a wʋsa dabiskan daar. 31 Da tʋmi si'el baa bi'elaa. Nɛ' anɛ zi'elʋg kanɛ na bɛ saŋa wʋsa hali nɛ zʋmaana banɛ na ti duoe na, yanamɛ kʋdim bɛ zin'isi'a wʋsa. 32 Li anɛ Vʋ'ʋsʋm Daare tisi ya, ka ya na sigisi ya mɛŋ ka lɔ nɔɔr. Lin yi nwadig la daba awai la daar zaam, asɛɛ ka ya tiɛn vʋ'ʋsʋm dabisir la yɛla ti paae li yimbɛog zaam.”
Sʋga Gbɛɛnb Malʋŋ
33 Zugsɔb la da lɛn yɛl Moses ye, 34 “Yɛlim Israel dim la ye, ‘Nwadis ayɔpɔi la dabpiiga nɛ anu la daar ka Sʋga Gbɛɛnb Malʋŋ la na pin'ili mɔr ala paae daba ayɔpɔi. 35 Dabisir kanɛ an yiiga la, nidib la na la'as taaba la'asʋg kanɛ an Zugsɔb la din nyain la, ka kʋ tʋm ban ɛɛnti tʋm si'em dabisir wʋsa laa. 36 Daba ayɔpɔi ka ya na maal nyu'or maannɛ tis Zugsɔb la, ka daba anii la daar ka ya na la'as taaba la'asʋg kanɛ an Zugsɔb la din nyain la, ka maal nyu'or maannɛ tis Zugsɔb la. Li anɛ malʋŋ la naar la'asʋg, da tʋmi tʋʋma daakan la.
37 “ ‘Malimbama ka Zugsɔb la da zi'el, ka ya na mɔɔl ka nidib la la'as taaba la'asʋg kanɛ an kasi tis Zugsɔb la, ka maal maan banɛ ka ba nyu'od bugum tisid Zugsɔb la. Maana la anɛ nyu'or maan nɛ zʋʋd maan nɛ taaba la'asʋg maan nɛ daam piini malima linɛ nar ye ya maan dabisir wʋsa la. 38 Malimbama ka ya na maali paas Zugsɔb Vʋ'ʋsʋm Dabisa la ka mɛ paas piini banɛ ka ya tisid saŋa wʋsa la, nɛ linɛ wʋsa ka ya pʋ'ʋlʋm zi'el, nɛ ya ya'amlɛog piini linɛ ka ya tisid Zugsɔb la.
39 “ ‘Lin yi nwadis ayɔpɔi la dabpiiga nɛ anu la daar, saŋkanɛ ka ya buni ya zʋʋdi naae la nya'aŋ, yanam on maal malʋŋ kaŋa di'ema daba ayɔpɔi. Dabisir kanɛ an yiiga la anɛ Vʋ'ʋsʋm dabisir, daba anii la mɛ lɛn anɛ Vʋ'ʋsʋm Daar. 40 Dabisir kanɛ an yiiga la, zaŋimi tiis wala banɛ an sʋ'ʋŋa la, nɛ kpʋkparis wila, nɛ tiis banɛ wila mɔr vaandi maal sumalisim Zugsɔb la tuon daba ayɔpɔi. 41 Maalimi di'ema malʋŋ kaŋa tis Zugsɔb la daba ayɔpɔi yʋʋm wʋsa pʋʋgin. Nɛ'ɛŋa anɛ zi'elkanɛ na bɛ saŋa wʋsa hali nɛ zʋmaana banɛ na ti duoe na la, maalimi di'ema la nwadis ayɔpɔi la ni. 42 Bɛɛi sʋga ni daba ayɔpɔi; onɛ mɛkama ka ba du'a o ka o an Israel nid na bɛnɛ sʋga la ni. 43 Ala ka ya yaas na baŋ ye, man da yis Israel dim Egipt teŋin na la, ba da bɛnɛ sʋga ni. Manɛ aan ya Zugsɔb Wina'am la.’ ”
44 Ka Moses mɔɔl malima banɛ ka Zugsɔb la zi'el la yɛla tis Israel dim la.