Malʋŋ fita la yɛla
24
1 Zugsɔb la da yɛl Moses ye, 2 “Yɛlim Israel dim la ye asɛɛ ka ba mɔr olif kpaam linɛ an nyain na ka ba nyu'oe fita la ka li dit saŋa wʋsa ka kʋ kpiigɛ. 3 Aaron na kpɛn'ɛd Fuug Sʋgʋr kanɛ ka fʋ naanida ani kpɛn'ɛd Kasi Zin'igin la gɔsid fita la, ka li dit fukanɛ bɛŋ la yiŋ lin yi zaam ti paae bɛogʋn. Nɛ'ɛŋa an zi'elkanɛ na bɛ saŋa wʋsa hali nɛ zʋmaana banɛ na ti duoe na. 4 Li anɛ tilas ye o gɔsid fita banɛ sʋn'e zi'esa banɛ ka ba maal nɛ sanlima ma'aa ka li zi'e Zugsɔb tuonnɛ kpɛn dit saŋa wʋsa la.”Malʋŋ bodobodo la yɛla
5 “Nɔkim zɔmbaanlig kuriba ayi' maal bodobodo gbila piiga nɛ ayi'. 6 Zi'elimi ba kuurig kuurigi tuunl taaba zin'is ayi' teebul kanɛ ka ba nɔk sanlima ma'aa maal ka li zi'e Zugsɔb tuon la, ka kuurig yinne wʋsa mɔr bodobodo gbila ayuobʋ. 7 Nɔkim bʋnnyubisa niŋ kuurig wʋsa ni ka li an tiɛnr bʋn linɛ zi'e bodobodo la zi'esim ka na an nyu'or maannɛ tis Zugsɔb la. 8 Bodobodo kaŋa ba na zi'el Zugsɔb la tuon Vʋ'ʋsʋm Dabisir wʋsa, ka li yinɛ Israel dim san'an, ka an nɔnaar linɛ na bɛ saŋa wʋsa. 9 Bodobodo kaŋa na anɛ Aaron nɛ o biribis din, ka ba na diti li zin'ikanɛ an kasi la, bɔzugɔ li anɛ kasi tis Zugsɔb la, ka aan ba pʋʋr linɛ ka ba na di'esid saŋa wʋsa yit piini linɛ an nyu'or maannɛ tis Zugsɔb la ni.”
Ban da lɔb onɛ san'am Zugsɔb yʋ'ʋr nɛ kuga la
10 “Dau sɔ' da bɛ ka o ma an Israel nid ka o saam mɛ an Egipt nid, ka o yii keŋ Israel dim la'asʋg zin'igin la. Ka zaba kɔ' on nɛ Israel dau sɔ' sʋʋgin. 11 Ka onɛ maa an Israel nid la pɔ nɔɔri san'am Zugsɔb la yʋ'ʋr, ka ba mɔr o kɛn Moses san'an na. (O ma yʋ'ʋri da buon Sielomif, o da anɛ Dibir biig ka an Dan dɔɔg nid.) 12 Ka ba yɔɔ o gur Zugsɔb la na ti nie pa'ali ba ban na niŋ si'em.”
13 Ani ka Zugsɔb la da yɛl Moses ye; 14 “Mɔri onɛ san'am Zugsɔb yʋ'ʋr la yii ya la'asʋg zin'ig la yiŋ. Banɛ wʋsa wʋm ka o pian'ad ala la na nɔki ba nu'usi pa'ali o zugin, ka banɛ kpɛlim la wʋsa lɔb o nɛ kuga. 15 Yɛlim Israel dim la ye, ‘Onɛ pɔ nɔɔri tis o Wina'am, asɛɛ o taal dɔlli o ka o na namisi li yɛla. 16 Onɛ san'am Zugsɔb la yʋ'ʋr, asɛɛ ba kʋ o sɔb. Nidib la wʋsa na lɔb o nɛ kuga. Onɛ an saan bɛɛ onɛ ka ba du'a o teŋin la wʋsa, o sɔb ya'a san'am Zugsɔb la yʋ'ʋr, asɛɛ ba kʋʋ o.
17 “ ‘Sɔ' ya'a kʋʋ o tiraan, asɛɛ ka ba mɛ kʋʋ o. 18 Sɔ' ya'a kʋʋ o tiraan bʋnkɔnbʋg, asɛɛ ka o yɔɔ li sam nɛ bʋnkɔnbʋg kanɛ zem ala. Nyɔvʋri yɔɔd nyɔvʋr sam. 19 Sɔ' ya'a pu'alimi o tiraan, on pu'alim o zin'isi'a la wʋsa asɛɛ ka ba mɛ pu'alim o sɔb zin'ikan la yɔ sam. 20 Onɛ kɔ'ɔg sɔ' kɔnbir ba mɛ na kɔ'ɔgi o kɔnbir; nif yɔɔdi nif sam ka nyin mɛ yɔɔd nyin sam. On pu'alim sɔ' la, li anɛ ba pu'alim o mɛn. 21 Onɛ wʋsa kʋ bʋnkɔnbʋg asɛɛ ka o yɔɔ li sam, amaa onɛ kʋ ninsaal, asɛɛ ba kʋʋ o mɛn. 22 Ya na mɔri wada yinne tis onɛ an saan nɛ onɛ an teŋin biig wʋsa. Manɛ an Zugsɔb, onɛ aan ya Wina'am la.’ ”
23 Moses da pian' tis Israel dim la, ye ba yisim onɛ san'amid Zugsɔb yʋ'ʋr la ba la'asʋg zin'ig la yiŋi lɔb o nɛ kuga. Ka Israel dim la sid da niŋ wʋʋ Zugsɔb la zi'eli tis Moses si'em la.