Nyu'or Maan Daka la yɛla
27
1 Ka Zugsɔb da lɛn yɛl Moses ye, “Nɔkim na'aziinr daadi maal maan daka ka li wa'alim nɛ li yalʋŋ na zem taaba ka an nɔba makir ayɔpɔi nɛ pʋsʋk, ka li dʋʋb mɛ an nɔba makir anu nɛ pʋsʋk. 2 Ka maal gʋʋdiŋ ka li duoe gɔla nwɛnɛ iila nɛ maan daka la kpikpɛmis anaasi la ni ka iila la nɛ maan daka la na an yinne. Ka nɔk kʋntzɛn'ugʋ bʋligi li wʋsa. 3 Nɔkim kʋntzɛn'ugʋ maali li la'ad la wʋsa. Maalim dʋgid banɛ ka ba mɔri vaad tampɛligim nɛ soobulnam nɛ labanɛ ka ba mɔri misid nɛ linɛ ka ba mɔri lɛbigid ni'im nɛ ban mɔr si'eli vaad bugum saanna la. 4 Nɔkim kʋntzɛn'ugʋ maal wʋʋ ni'im ɔɔnliŋ nɛ, ka kʋnt baansi tabili li lɔdis anaasi la wʋsa. 5 Nɔkimi li sa'al maan daka la pʋʋgin, ka li sigi paae li pʋsʋk. 6 Maalim na'aziinr daad, ka nɔk kʋntzɛn'ugʋ bʋligi ba. 7 Nɔkim daad la tʋ baans la pʋʋgin ka ba na bɛ maan daka la lʋga ayi' ni. Dinɛ na kɛ ka ba nyaŋi gban'e daad la ʋk maan daka la mɔri ken. 8 Nɔkim dalamma maal maan daka la ka li pʋʋgin an vɔɔsim. Maalim wʋʋ mam pa'alif zuor la zug si'em la yim.”Zak nɛ li fuud la yɛla
9 “Maalim zaki gilig Fuug Sʋgʋr la. Ka dagɔbʋg baba la wa'alim na an wʋʋ nɔba makir kɔbiga nɛ pisnu nɛ, ka maal fupielsʋma bɛŋi li. 10 Ka nɔk kʋntzɛn'ugʋ maal kʋnt daad pisi, ka maal zi'esa tʋʋ ba ka ba zi'e sappi. Amaa kɛl ka li kpa'as nɛ baans la an anzurifa. 11 Li datiuŋ baba la wa'alim sʋm ye li an nɔba makir kɔbiga nɛ pisnu, ka li mɛ mɔr fupielsʋma linɛ bɛŋidi li, nɛ kʋntzɛn'ug daad pisi nɛ zi'esa banɛ ka ba na tʋʋ ba. Ka li kpa'as nɛ baans la na an anzurifa. 12 Ka li tuon la wa'alim na an nɔba makir pisyɔpɔi nɛ anu mɛn, ka mɔr fupielsʋma banɛ bɛŋid nɛ kʋntzɛn'ug daad banɛ an sappi piiga nɛ ba zi'esa piiga. 13 Zak la zin'ikanɛ kpa' winnigi tansid zin'isi'a la yalʋŋ mɛ na an nɔba makir pisyɔpɔi nɛ anu. 14-15 Ba na nɔk fupielsʋŋ linɛ yalʋŋʋ an nɔba makir pisi nɛ ayi' nɛ pʋsʋkʋ yul daad atan' la nɛ ba zi'esa la bɛ zin'ikanɛ ka ba dɔlli kpɛn'ɛd zakin la luaa yinne ka mɛ niŋ ala lɔ zin'ikaŋa la mɛn. 16 Li ya'a anɛ Fuug Sʋgʋr la za'anɔɔr la, nɔkim fuud linɛ an sʋ'ʋŋa ka an bʋlʋ nɛ pipɛl-zɛn'ug nɛ bʋnzɛn'is nɛ pien pielig, ka onɛ mi' sɛɛnb sɛn fuug ka li wa'alim an nɔba makir pistan'. Nɔkimi li ya'al kʋntzɛn'ug daad anaasi nɛ ba zi'esa anaasi la ni. 17 Li sʋm ye dabanɛ zi'e sappi gilig zak la wʋsa mɔr anzurifa baans nɛ anzurifa datʋʋda, ka ba zi'esa an kʋntzɛn'ug. 18 Zak la pʋʋgin wa'alim na an nɔba makir kɔbiga nɛ pisnu, ka li yalʋŋ na an pisyɔpɔi nɛ anu ka li dʋʋb an nɔba makir ayɔpɔi nɛ pʋdigir, ka li fukanɛ bɛŋ la an fusʋŋ ka li kʋntzɛn'ug daad linɛ an sappi la zi'esa mɛ an kʋntzɛn'ug. 19 Nɔkim kʋntzɛn'ugʋ maal linɛ wʋsa ka ya mɔri tʋm Fuug Sʋgʋr la tʋʋma, la'am nɛ Fuug Sʋgʋr la nɛ zak la kpada wʋsa.”
Fita la kpaam yɛla
20 Ka Wina'am da lɛn yɛl Moses ye, “Yɛlim Israel dim la ye asɛɛ ka ba mɔr olif kpaam linɛ an nyain na ka ba nyu'oe fita la ka li dit saŋa wʋsa. 21 Kɛl ka fita zi'e Fuug Sʋgʋr kanɛ ka ba la'asida anina la pʋʋgin, fukanɛ ka ba bɛŋ la tuon, ka Aaron nɛ o biribis na gɔsid ka bugum la dit zaam hali ti nie bɛogʋ tis Zugsɔb la. Li anɛ zi'elʋg kanɛ bɛ saŋa wʋsa tis Israel dim ka ba na la'asid taaba maan hali nɛ zʋmaaŋ kanɛ na ti kenna.”