Ban na maal Fuug Sʋgʋr la si'em
26
1 “Maalim Wina'am Fuug Sʋgʋr la nɛ pien pielig fuud piiga banɛ an sʋ'ʋŋa nɛ gum kanɛ an bʋlʋ nɛ gum sʋma banɛ an pipɛl-zɛn'ug nɛ bʋnzɛn'is, ka kɛ ka onɛ mi' ʋgʋb ʋg linɛ ka ba buon ye Kerubnam la niŋ fuudin la. 2 Fuud la sʋm ye ba zem taaba ka ba wa'alim na an nɔba makir pisnaasi nɛ ayi' ka ba yalʋŋ na an nɔba makir ayuobʋ. 3 Nɔkim fuud anu sɛɛn tɔ'ɔŋ taaba ka mɛ nɔk fuud anu banɛ kpɛlim la sɛɛn tɔ'ɔŋ taaba. 4-5 Nɔkim pien linɛ an bʋlʋ sɛɛn maal ga'adiŋvɔnya pisnu niŋi li fuud ayi' la nɔɔrin, dinɛ na kɛ ka ba na nyaŋi tɔ'ɔŋ taaba. 6 Maalim sanlima ga'adiŋgɔnlima pisnu ka li na ga'al fuud la nɛ taaba, ka li kɛ ka Fuug Sʋgʋr la la'asi an mummi. 7 Nɔkim bʋʋs kɔnbidi maal fuud pii nɛ yinne linɛ ka ba na ti zaŋi pili bʋʋl Fuug Sʋgʋr la. 8 Fuud pii nɛ yinne la na zem taaba ka ba wa'alim na an nɔba makir pisnaasi nɛ anu ka ba yalʋŋ na an nɔba makir ayuobʋ. 9 Nɔkim fuud anu tɔ'ɔŋ taaba ka mɛ nɔk fuud ayuobʋ banɛ kpɛlim la tɔ'ɔŋ taaba. Fʋ kanɛ paas ayuobʋ la, ya na pɔnbili li nɔɔra ayi' lɛbisi pa'al za'anɔɔr la zug. 10 Nɔkim pien linɛ an bʋlʋ sɛɛn maal ga'adiŋvɔnya pisnu niŋi li fuud ayi' la nɔya ni. 11 Nɔkim kʋntzɛn'ugʋ maal ga'adiŋgɔnlima pisnu ka li na ga'al fuud la ka di vɛ'ɛg Sʋgʋr la naal taaba. 12 Ka kɛ ka fuug pʋsʋk linɛ kpɛlim la sigi lus Fuug Sʋgʋr la nya'aŋ. 13 Fuug la nɔbir makir ayinne nɛ pʋsʋk na yul Fuug Sʋgʋr zin'ig ayinne ka nɔbir makir ayinne nɛ pʋsʋk mɛ yul zin'ikaŋa la bʋʋli li wʋsa. 14 Ka nɔk pɛraad gbana dinɛ ka ba mɔ'ɔnsi li ka di mu'oe la sɛɛn tɔ'ɔŋ taaba pili paas. Ka nɔk gbansʋma linɛ vɛnli pili tak.”Kʋlis nɛ li dazi'eda yɛla
15 “Nɔkim na'aziinr daad la maal dalamma kpɛn'ɛs Fuug Sʋgʋr la. 16 Ka dalammir wʋsa wa'alim na an nɔba makir pii nɛ anu ka li yalʋŋ la an nɔbir makir ayi' nɛ bi'ela. 17 Ka dalammir mɛkama mɔr nyina ayi' linɛ na kɛ ka ba gban'e taaba. Maalim Fuug Sʋgʋr la dalamma la wʋsa ka ba nwɛn taaba. 18 Maalim dalamma pisi kpɛn'ɛs Fuug Sʋgʋr la dagɔbʋg baba, 19 ka nɔk anzurifa maal zi'esa pisnaasi, ka dalammir wʋsa mɔr zi'esa ayi'. 20 Ka mɛ maal dalamma pisi Fuug Sʋgʋr la datiuŋ 21 ka nɔk anzurifa maal zi'esa pisnaasi ka dalammir wʋsa na tʋ zi'esa ayi' la ni. 22 Maalim dalamma ayuobʋ Fuug Sʋgʋr la nya'aŋ linɛ bɛ ya-tuona la. 23 Ka maal dalamma ayi' ka ba na gban'e lɔdig wʋsa. 24 Asɛɛ ka lɔdis dalamma la ta'al taab teŋiri dʋ zugin, ka baŋ yinne mɛ na mɔri ba wʋsa, ka ayi' la wʋsa na nwɛn taaba, 25 ka li na paae dalamma anii nɛ li anzurifa zi'esa pii nɛ ayuobʋ, ka dalammir wʋsa na mɔr zi'esa ayi'. 26 Maalim na'aziinr dapuuda anu ka li gu' dalamma linɛ bɛ Fuug Sʋgʋr la lʋgir yinne ni, 27 ka anu mɛ bɛ lʋgkaŋa la ni, ka anu mɛ bɛ dalamma linɛ bɛ Fuug sʋgʋr nya'aŋ ya-tuona baba 28 Ka dapuudir kanɛ bɛ teŋsʋk la na wa'ami paae dalamma la wʋsa. 29 Bʋligim dalamma la nɛ sanlima ka maal sanlima baans linɛ na nyaŋi mɔr dapuuda la, ka mɛ bulig daad la nɛ sanlima. 30 Maalim Fuug Sʋgʋr la wʋʋ mam pa'alif zuor la zug si'em la tituaa.”
Fugɔbʋg nɛ Fuug Sʋgʋr la la'ad yɛla
31 Ka Zugsɔb lɛn yɛl Moses ye, “Nɔkim fuud linɛ an sʋ'ʋŋa ka an bʋlʋ nɛ pipɛl-zɛn'ug nɛ bʋnzɛn'isi sɛɛn tɔ'ɔŋ taaba maal fugɔbʋg. Ka kɛ ka banɛ mi' ʋgʋb sʋ'ʋŋa ʋg Kerubnamɛ niŋ anina. 32 Nɔkim fugɔbʋg la ya'al na'aziinr daad anaasi banɛ ka ba bʋligi ba nɛ sanlima ka ba mɔr kpa'as ka zi'e anzurifa zi'esa anaasi zug. 33 Ya'alim fuug la kpa'as la ni ka li sig teŋin, ka nɔk Nɔnaar Daka la niŋ fuug la nya'aŋ; ka fuug la na pʋdig Fuug Sʋgʋr la zin'is ayi'. Fuug la na pʋdig zin'ikanɛ an Kasi la nɛ an Kasi Wʋsa Kasi la. 34 Nɔkim suguru sɔsʋg liŋ la pibil Nɔnaar Daka dinɛ bɛ Wina'am zin'ikanɛ an Kasi wʋsa Kasi la pʋʋgin. 35 Ka nɔk teebul la zi'el Fuug Sʋgʋr la pʋʋg datiuŋ ka mɛ nɔk fita zi'esir la zi'el dagɔbʋg ka ba kpa' taaba. 36 Nɔkim fuug linɛ an sʋ'ʋŋa ka an bʋlʋ nɛ pipɛl-zɛn'ug nɛ bʋnzɛn'isi sɛɛn, sɛn ka li vɛnl, ka zaŋi ligil Fuug Sʋgʋr la za'anɔɔr la. 37 Maalim sanlima baansi niŋ fukaŋa, ka nɔk sanlima bʋlig na'aziinr daad anu ka nɔk kʋntzɛn'ugʋ maali ba zi'esa.”