Fuug Sʋgʋr la piini tisib yɛla
25
1 Ka Zugsɔb yɛl Moses ye, 2 “Yɛlim Israel dim la ye ba mɔr piini na tisim. Onɛ mɛkama tis nɛ o sʋʋnr wʋsa fʋn di'em o piini la. 3 Piinbanɛ ka fʋ na di'e ba san'an anɛ sanlima nɛ anzurifa nɛ kʋntzɛn'ug; 4 nɛ gum dinɛ an bʋlʋ nɛ gum sʋma dinɛ mu'oe zim-zim, nɛ gumzɛn'is; nɛ pien piela, nɛ bʋʋs kɔnbid linɛ ka ba na nɔki maal fuud, 5 nɛ pɛraad gbana dinɛ ka ba mɔ'ɔnsi li ka li mu'oe sʋee, nɛ gbansʋma, nɛ na'aziinr daad; 6 nɛ olif kpaam dinɛ na nyu'od bugum, nɛ malʋŋ kpaam dinɛ ka ba nɔkidi suond maanmaannib, nɛ bʋnnyubisa dinɛ ka ba mɔri maan pʋ'ʋsim tudaari la. 7 Kugvɛnla banɛ ka ba na nɔki sɛɛn niŋ maanmaan dansikin la nɛ dinɛ lɔɔd nyɔ'ɔgin la. 8 M bɔɔd ye ya ti' Fuug Sʋgʋr ka m na bɛɛ m nidib la sʋʋgin. 9 Maalim ka li nwɛnɛ man na pa'alif si'em la, nɛ li la'ad la wʋsa.”Nɔnaar daka la yɛla
10 “Yɛlim nidib la ye ba nɔk na'aziinr daadi maal daka ka li wa'alim an wʋʋ nɔba makir anaasi ka li yalʋŋ na an nɔba makir ayi' nɛ bi'ela ka li dʋʋb an nɔba makir ayi' nɛ bi'ela mɛn. 11 Nɔkim sanlima bʋligi li pʋʋgin nɛ li nya'aŋ la wʋsa ka dɔlisi li nɔya la wʋsa. 12 Kudim sanlima baans anaasi ka lɔɔ ba yinne-yinne tabil daka la nɔba anaasi la. 13 Nɔkim na'aziinr daad ayi' ka nɔk sanlima bʋligi ba. 14 Nɔkim daad la tʋ baans ayi' banɛ bɛ daka la lʋga la ni. Ala ka ba na nyaŋi gban'e daad la ʋk daka la mɔri keŋ. 15 Da lɛn yis daad la baans la nii. 16 Ka nɔk nɔzi'ela piiga banɛ ka m ye m sɔbi niŋ kuglamma zugʋ tisif la, niŋ daka la pʋʋgin.
17 “Nɔkim sanlima maal suguru sɔsʋg liŋ. Li wa'alim na an wʋʋ nɔba makir anaasi, ka li yalʋŋ na an nɔba makir ayi' nɛ bi'ela. 18 Nɔkim sanlima zan' maal Kerubnama ayi' niŋ liŋ la nɔya ayi' la ni. 19 Kɛl ka yinne zi'e daka la liŋ la datiuŋ, ka yinne mɛ zi'e li dagɔbʋg, ka ban nɛ liŋ la wʋsa an sanlim yinne. 20 Maalim Kerubnam la ka ba kpʋkpama yadiga agɔla ka li ma'asim pil liŋ la. Li sʋ'ʋm ye ba kpa' taaba ka sʋnri gɔt liŋ la. 21 Nɔkim liŋ la pibil daka la zug. M ya'a tisif nɔzi'ela kuglamma la, fʋ na di'e niŋ daka la pʋʋgin. 22 M na kɛɛn fʋ san'an zin'ikanɛ ka Kerubnam ayi' la bɛ daka liŋ teŋsʋk la; anina ka m na tisi fʋ m nɔzi'ela la wʋsa ka fʋ di'e tis Israel dim la.”
Sanlima teebul la yɛla
23 Ka Zugsɔb da lɛn yɛl ye, “Nɔkim na'aziinr daugʋ maal teebul ka li wa'alim an wʋʋ nɔba makir atan' ka li yalʋŋ na an nɔbir makir yinne nɛ pʋsʋk ka li dʋʋb na an wʋʋ nɔba makir ayi' nɛ bi'ela. 24 Nɔkim sanlima dɔlis nɔya la wʋsa, ka bʋligi li pʋʋgin nɛ li nya'aŋ la wʋsa nɛ sanlima. 25 Nɔkim dabibisi tabili gilig teebul la ka ba wa'alim an wʋʋ nu'ug yalʋŋ nɛ, ka nɔk sanlima bʋligi ba wʋsa. 26 Maalim sanlima baans anaasi ka lɔɔ ba yinne-yinne tabil teebul la nɔba anaasi la ni. 27 Li sʋm ye baans la kpi'e dabibis banɛ gilig daka la, linɛ na kɛ ka ba na nyaŋi tʋʋdi ʋkid teebul la mɔri ken. 28 Nɔkim na'aziinr daad ka bʋligi ba nɛ sanlima ka ba na mɔri ʋgisid teebul la ken. 29 Maalim laas nɛ dʋgid nɛ bʋtiis la wʋsa ka ba an sanlima ka ba mɔri maan bʋnnuuda maana. 30 Kɛl ka bodobodo bɛ teebul la zugʋ m tuon saŋa wʋsa.”
Fita zi'esir la yɛla
31 Ka Zugsɔb da lɛn yɛl ye, “Nɔkim sanlima kʋnt fita zi'esir, ka nwɛ'-nwɛ' li ka li gbin an lammiri, ka li teŋsʋk daug la an sappi. Fita la zi'esir nɛ li daug nɛ li bʋnvɛnla banɛ nwɛnɛ tipuum la wʋsa na an yinne. 32 Fita zi'esir la teŋsʋk daug la na mɔr wila ayuobʋ. Atan' na bɛ lʋgir yinne ka atan' mɛ bɛ lʋgir yinne. 33 Ka wila ayuobʋ la, wil wʋsa na mɔr bʋnam ka li nwɛnɛ tipuum nɛ bɛɛ li vaandin la. Wil wʋsa na mɔr atan'. 34 Ka fita zi'esir teŋsʋk daug la mɛ na mɔr puum nɛ vaand anaasi, ka li nwɛnɛ bama la. 35 Dutir na bɛ zin'ikanɛ ka wila ayi' wɛligid. Ayinne na bɛ yiiga din la ni ka yinne bɛ linɛ paas ayi' la ni ka yinne bɛ linɛ paas atan' la ni. 36 Nɔkim sanlim yinne maal fita zi'esir la, nɛ li wila nɛ li puum nɛ vaand la wʋsa. 37 Maalim kpaam fita ayɔpɔi sʋn'ʋl fita zi'esir la zug, ka nyu'oe ba ka ba na nie zin'ig la tuon. 38 Ka nɔk sanlima maal ma'adiŋ kanɛ ka ba na mɔri zin'ed lauŋʋ la nɛ tampɛligim laas. 39 Nɔkim sanlimgbil sʋma pisyuobʋ nɛ anii maal fita zi'esir la nɛ li la'ad la wʋsa. 40 Asɛɛ ka fʋ maali li ka li nwɛnɛ mam pa'alif si'em zuor zug la dede.”