Nidib la siak Nɔnaar la yɛla
24
1 Ka Zugsɔb yɛl Moses ye, “Dʋm zuor la zugʋ m san'an na. Dɔl Aaron nɛ o biribis ayi', Nadab nɛ Abihu, nɛ Israel kpɛɛmnam pisyɔpɔi na. Asɛɛ ka ba bɛ lallisa ka pʋ'ʋsid mam, 2 amaa fʋn ma'aa kem li'el kpɛla na. Da kɛ ka nidib la sɔ' dɔlli fʋ pɛ'ɛsɛ.” 3 Ka Moses keŋ yɛl nidib la Zugsɔb la yɛl si'el la nɛ o kaanbʋg la, ka ba siak nɛ nɔɔr yinne ye, “Ti na tʋm linɛ wʋsa ka Zugsɔb yɛl ye ti tʋm la.” 4 Ka Moses sɔb Zugsɔb la yɛl si'el la.Ka bɛog nie ka Moses duoe mɛ' maan bimbim zuor la gbinnin, ka nɔk kugtitada zi'eli tis Israel dɔɔd pii nɛ ayi' la. 5 Ka o tʋm Israel dim dasam sieba ye ba nɔk na'araadi maal malʋŋ dinɛ nyu'od nɛ bugum tis Zugsɔb la, ka mɛ maal taaba la'asʋg maana la. 6 Ka Moses bu'oe ziim la pʋsʋkʋ niŋ laasin ka nɔk linɛ kpɛlim la kpa'ae siɛn maan bimbim la. 7 Ka o nɔk Zugsɔb nɔnaar gbauŋ la karim tis nidib la, ka ba siak ka ye, “Ti na siak Zugsɔb nɔɔr ka tʋm on yɛl si'el la wʋsa.” 8 Ka Moses nɔk ziim la mis nidib la, ka yɛli ba ye, “Zikaŋa ka Zugsɔb nɔk ye o maal nɔnaar nɛ ya ka li dɔl on yɛli ya si'em la.”
Moses bɛ Wina'am zuor la zug
9 Ka Moses, nɛ Aaron nɛ o biribis ayi' Nadab nɛ Abihu, nɛ Israel kpɛɛmnam pisyɔpɔi la dʋ zuor la zug, 10 ka nyɛ Israel Wina'am la, ka gɔs ka li nwɛnɛ kugkanɛ ka ba buon ye safir la digi o nɔba teŋir, ka li nie nyain wʋʋ saŋgbana nɛ. 11 La'am nɛ Israel kpɛɛmnam la da nyɛ Wina'am la, o da pʋ tɛɛgi ba tʋbirɛ, hali ka ba la'am di ka nu.
12 Ka Zugsɔb la da yɛl Moses ye, “Dum zuor zug kpɛla na bɛ dabisa bi'ela ka m tisif kuglamma ayi' din ka m sɔbi m nɔzi'ela niŋ ye nidib la dɔl la.” 13-14 Ka Moses yɛl nidib la ye, “Gu'usimi kpɛla ka ti keŋ ka lɛb na. Aaron nɛ Hur na bɛ nɛ ya, ka yɛlkanɛ bɛ wʋsa ba na nyaŋi maal, tinamɛ kae la zug.” Ka on nɛ Josua onɛ sʋŋid o la dɔl taaba keŋ, ka Moses gaadi dʋ Wina'am zuor la zug. 15 Ka Moses dʋ Sinai zuor la zug ka saŋgbana lus zin'ig la wʋsa. 16 Ka Zugsɔb girima la nie nyain bɛɛ anina. Ka saŋgbana lus zuor la daba ayuobʋ, ka daba ayɔpɔi la daar ka Zugsɔb naan saŋgbana la nii buol Moses. 17 Zugsɔb girima la da nwɛnɛ bugum nɛ zuor la zug, ka Israel dim la nini nyɛ. 18 Ka Moses kpɛn' saŋgbana la ni zuor la zugʋ, bɛɛ anina dabpisnaasi yʋ'ʋŋ nɛ nintaŋ wʋsa.