Maanmaannib fuud yɛla
28
1 Ka Zugsɔb da lɛn yɛl ye, “Kɛl ka fʋ bier Aaron nɛ o biribis Nadab nɛ Abihu nɛ Eleazar nɛ Itamar li'eli fʋ san'an na ka na an maanmaannibi tis mam. 2 Maalim fubanɛ an sʋm ka vɛnl hali tis Aaron ka li pa'al ye o zi'enɛ tis Wina'am ka li an girima tis o tʋʋma la. 3 Yɛlim banɛ ka m tisi ba ya'am ka ba mi' sɛɛnb sʋŋa la ka ba sɛn fuud la ka Aaron bɛɛ o kɔn' nɛ nidib la ka na an maanmaanni tis mam. 4 Fubanɛ ka ba na maal anɛ linɛ lɔɔdi tabin nyɔ'ɔgin, nɛ dansik nɛ fuwɔk linɛ an bʋlʋ, nɛ fuwɔk pielig linɛ nu'usi wa'am la, ka ba sɛɛn maal ka li vɛnl nɛ zupibig nɛ sɛnbidiŋ. Ba na sɛn fubama tisi fʋ bier Aaron nɛ o biribis la, ka ba an maanmaannib banɛ na tʋmmi tisid mam. 5 Ba na nɔk sanlima gum nɛ gum linɛ an bʋlʋ nɛ pipɛl-zɛn'ug nɛ bʋnzɛn'is nɛ fupiel sʋŋʋ sɛn fuud la.”Dansik la yɛla
6 “Di sʋm ye ba nɔk sanlima gum nɛ gum linɛ an bʋlʋ nɛ gum sʋma banɛ mu'oe zim-zim nɛ bʋnzɛn'is nɛ gum pielig linɛ an sʋm kɛ ka banɛ mi' sɛɛnb sɛn dansik la ka li vɛnl. 7 Li sʋm ye li mɔr lɔɔdis ayi' ka ba tabili li ban'ad ayi' la zug, ka ba na tun'e lɔɔd. 8 Nɔkim sanlima nɛ gum dinɛ an bʋlʋ nɛ gum pipɛl-zɛn'ug nɛ bʋnzɛn'isi ʋk sɛnbidiŋ ka din nɛ dansik la an yinne. 9 Nɔkim kugsʋma ayi' kpi'e ba ka sɔb Israel biribis la yʋda anina. 10 Sɔm wʋʋ ban du'a ba si'em, nidiba ayuobʋ yʋda kugir yinne zug, ka sɔb ayuobʋ banɛ kpɛlim la yʋda kugir yinne la ni. 11 Sɔm Israel biribis yʋda la wʋʋ banɛ mi' kuga kpi'ebi maan si'em la niŋ kuglamma la ni, ka nɔk sanlima dɔlis kuga la nɔya ka li gban'e nwɛnɛ nu'ubibis nɛ. 12 Lɔɔmi ba tabil dansik la ban'ad la zug, ka ba na an kugbanɛ na tɛɛnsid Israel biribis la. Ka yʋda la na bɛ Aaron ban'ad zug ka tiɛnd o ba yɛla, saŋa kanɛ wʋsa ka o kpɛn'ɛd Zugsɔb la tuon. 13 Maalim sanlima bʋnkanɛ na nyaŋi gban'e kuga la nɔya, 14 ka maal sanlima baans ka ba nwɛnɛ nwiis nɛ, ka fʋ nɔk baans la lɔɔ tɔ'ɔŋ nwiis la.”
Linɛ lɔɔd maanmaan nyɔ'ɔgin la yɛla
15 “Kɛl ka banɛ mi' li tʋʋma maal linɛ lɔɔdi tabin maanmaan fuug nyɔ'ɔgin la, ka li pa'an ban na gban'ad antu'a gbin si'em. Maalimi li ka li nwɛnɛ dansik la, ka nɔk sanlima, nɛ gum dinɛ an bʋlʋ nɛ gum pipɛl-zɛn'ug nɛ gum zɛn'ug nɛ gum pieligi sɛɛn li sʋ'ʋŋa ka di vɛnl. 16 Kɛl ka li kpilima abʋyi' ka li an makʋ, ka li wa'alim an hakir ka li yalʋŋ mɛ an hakir. 17 Nɔkim kugvɛnla pii nɛ ayi' kpɛn'ɛsi ba gʋʋdis anaasi la, ka gʋʋdiŋ yinne wʋsa mɔr kuga atan'. Atan' banɛ bɛ agɔl la na an kanelian nɛ kirisolat nɛ emeral, 18 ka kugbanɛ tia'al la mɛ an takuos nɛ safir nɛ bʋmpielig, 19 ka banɛ paas atan' la an yasin nɛ agat nɛ ametis, 20 ka banɛ paas anaasi la an bɛril nɛ onik nɛ jaspa; ka kɛ ka ba maal sanlima dɔlis kuga la nɔya la. 21 Kuga pii nɛ ayi' nwa na zi'e Israel biis pii nɛ ayi' la zi'esim. Ya na sɔb yʋda la niŋ kuga la yinne-yinne ni ka li pa'an Israel dɔɔd pii nɛ ayi' la wʋsa yʋda. 22 Maalim sanlima zɔnt banɛ nwɛnɛ nwiis nɛ niŋ linɛ lɔɔd nyɔ'ɔgin la. 23 Ka maal sanlima baans ayi' ka nɔki niŋ li nɔya ayi' la ni. 24 Ka nɔk sanlima nwiis ayi' la lɔ baans banɛ bɛ dinɛ lɔɔd nyɔ'ɔgin nɔya ni la, 25 ka ba gaadi paae lɔ baans banɛ bɛ dansikin la, ka li kɛ ka li tabil dansik la kpʋkpama tuon. 26 Ka maal sanlima baans ayi' niŋ fukanɛ lɔɔd nyɔ'ɔgin la lʋga ayi' la ka li gban'e li teŋir nɔɔr la tabil dansik la. 27 Ka mɛ maal sanlima baans ayi' ya'asi sɛɛn tabil dansik la biankimpiiung teŋir ka li kpi'e dansik la sɛnbidiŋ lɛbisid zugin. 28 Ba na nɔk gum kanɛ an bʋlʋ lɔ baans banɛ bɛ nyɔ'ɔgin la ken tabil nɛ baans banɛ bɛ dansik la nii tɔ'ɔŋ nɛ sɛnbidiŋ la, ka li kɛ ka nyɔ'ɔgin pien la kʋ yi ka bas dansik la. 29 Saŋkanɛ wʋsa ka Aaron kpɛn'ɛd zin'ikanɛ an Kasi la, o na yɛ fuug linɛ lɔɔd nyɔ'ɔgin ka Israel biribis pii nɛ ayi' la yʋda sɔbi li ni la, ka li an tiɛnri tisid o Zugsɔb Wina'am tuon. 30 Nɔkim ban buon si'el ye Urim nɛ Tummima la su nyɔ'ɔgin fuug la gɛfa ni, ka Aaron ya'a ɛɛn kpɛn' Zugsɔb la san'an li na bɛɛ o sʋnfʋn. Ala ka linɛ ka ba mɔr ka li kɛt ka ba gban'ad antu'a gbin la pa'ae Aaron nyɔ'ɔg zug saŋkanɛ wʋsa ka o kpɛn'ɛd Zugsɔb la san'an.
Maanmaannib Fuud banɛ kpɛlim la yɛla
31 “Nɔkim pien kanɛ an bʋlʋ sɛn dansik. 32 Maalim vɔɔnr fuug la teŋsʋk ka zug na nyaŋi kpɛn'; ka nɔk gumme kpamisi giligi li, dinɛ na kɛ ka li kʋ aaɛn. 33 Nɔkim gum banɛ an bʋlʋ nɛ pipɛl-zɛn'ug nɛ bʋnzɛn'isi maal tiwal kanɛ ka ba buon pomanganɛt yuli ba fuug la teŋir. Ka nɔk sanlima lʋmma lɔɔ ba sʋʋgin. 34 Sanlima lʋmma nɛ pomanganɛt la na lʋʋm taaba fuug la nɔɔr teŋir. 35 Ka li sʋm ye Aaron ya'a tʋmmi o maanmaan tʋʋma la on yɛɛ li. O ya'a kpɛn'ɛd zin'ikanɛ Kasi la, lʋmma la na nwɛ'ɛd, ka o ya'a yit na ba na nwɛ'ɛd ka o kʋ kpii.
36 “Nɔkim sanlima zan' lammiri bi'ela ka sɔbi pa'ali li zug ye li an, ‘KASI TIS ZUGSƆB’ la, 37 ka nɔk nwiig dinɛ an bʋlʋ lɔɔ tabil maanmaan zupibig la tuon. 38 Saŋkan wʋsa ka Aaron maan maannɛ tisid man Zugsɔb la, li na bɛɛ o gbɛ'ogʋn ka li pa'al ye o ziid Israel taal wʋsa. Li na bɛ Aaron gbɛ'ogʋn la saŋa wʋsa, ka di na kɛ ka man Zugsɔb na di'e Israel dim.
39 “Kɛl ka ba nɔk pien piel sʋma maal fuwɔk pielig linɛ nu'usi wa'am nɛ zupibis. Di sʋm ye onɛ mi' sɛɛnb sʋ'ʋŋa sɛn sɛnbidiŋ la.
40 “Ka sɛn fuwɔk piela banɛ nu'usi wa'am nɛ sɛnbidis nɛ zupibisi tis Aaron biis la mɛn ka ba na mɔr girima nɛ na'asi nidib la tuon. 41 Nɔkim fuud la yɛɛl Aaron nɛ o biis la, ka nɔk malʋŋ kpaam la bu'oe niŋi ba ka tisi ba suor ka ba liebi m maanmaannib. 42 Maalim pien pielig kurgimis ka li wa'alim paae duma ka li lusi ba nyan. 43 Aaron nɛ o biribis la na sɔɔnd kurigimbama saŋkanɛ wʋsa ka ba kpɛn'ɛd Fuug Sʋgʋr kan ka ba la'asid taaba la, bɛɛ ba ya'a li'el maan daka la ye ba maal maan zin'ikanɛ an Kasi la ni. Dinɛ na kɛ ka ba kʋ maal taal ka kpii.
“Nwa na an Aaron nɛ o yaas tʋʋma saŋa wʋsa.”