Ban na kɛ ka sɔ' lieb Maanmaan si'em
29
1 Ka Zugsɔb lɛn yɛl Moses ye, “Fʋn na maali ba si'em ka ba an nyain ka nyaŋi tʋm maanmaannib tʋʋma tis mam nwa: Nɔkim na'arapɔl nɛ pɛraad ayi' banɛ pʋ mɔr dɛŋŋa, 2 ka nɔk zɔmbaanlig dinɛ pʋ gɛndig dabinnɛ sɛn' bodobodo, ka maal ma'asa gɛndig nɛ kpaam, ka maal si'el ka li nwɛnɛ sa'akɔnt kpi'emis ka nɔk kpaam niŋ. 3 Nɔkim bama atan' nwa niŋ pɛogʋn, ka mɛ nɔk na'arapɔl nɛ pɛraad ayi' la mɔr na. 4 Ka yʋ'ʋn mɔr Aaron nɛ o biis la keŋ Fuug Sʋgʋr kan ka ba la'asid taaba za'anɔɔrin la, ka nɔk ku'om sʋʋ ba. 5 Nɔkim fuud la yɛɛl Aaron. Nɔkim fuwɔk la yɛɛl o, ka pa'al yinne kanɛ pʋ paae ala la, ka yʋ'ʋn zaŋ dansik la pa'al zugin, nɛ linɛ lɔɔd nyɔ'ɔgin la, ka mɛ nɔk sɛnbidiŋ linɛ vɛnl la lɔ o. 6 Ka nɔk zupibigi pid o zug, ka nɔk sanlima baŋ kanɛ pa'al ye o an Wina'am nid la paas. 7 Ka nɔk malʋŋ kpaam kanɛ ka ba bu'odi niŋid nidib zug la bu'oe niŋ o zug. 8 Ka mɛ mɔr o biis la na ka maali ba ala. 9 Ka nɔk sɛnbidis la lɔɔ ba sies, ka nɔk zupibis la pili ba. Aaron nɛ o biis la wʋsa na sʋ'oe malʋŋ tʋʋma saŋa wʋsa. Ala ka fʋ na maali ba ka ba na an maanmaannib.”10 “Mɔr na'araug la kɛn Fuug Sʋgʋr la tuon na, ka Aaron nɛ o biis la na nɔki ba nu'usi pa'al o zugin. 11 Kʋʋmi naaf la Fuug Sʋgʋr la za'anɔɔrin Zugsɔb la tuon. 12 Ka nɔki fʋ nu'ubili tin'e ziim la keŋ niŋ iila banɛ bɛ maan daka la ni, ka nɔk dinɛ kpɛlim la kpa'ae sɛɛnr maan daka la teŋir. 13 Nɔkim naaf la pʋʋgin la'ad wʋsa ka yis kpaam linɛ bɛɛ li ni la, ka nwaae sɔɔnr la yis bi'ela, ka nɔk siyaanini la nɛ li kpaam la wʋsa pa'al maan daka la zugi nyu'oe. 14 Amaa ni'im dinɛ kpɛlim la wʋsa nɛ gbauŋ nɛ pʋt la, asɛɛ ka ba mɔri yi yanamɛ gbɛɛnd zin'isi'a la yiŋi nyu'oe, ka li na an tʋʋmbɛ'ɛd malʋŋ.
15 “Nɔkim pɛraad la yinne ka kɛ ka Aaron nɛ o biis la nɔki ba nu'usi pa'al o zug, 16 ka kɔdig o ka nɔk ziim la kpa'asi sɛɛnr maan daka la gilig. 17 Waansim ni'im la ka nɔk ku'om pie pʋʋgin la'ad nɛ nɔba la wʋsa ka nɔk zug nɛ ni'imbaanlʋg la wʋsa pɛ'ɛsi 18 nyu'oe li wʋsa maan daka la zug tis mam Zugsɔb. Li anɛ malʋŋ kanɛ ka ba nyu'oe bugum tis mam Zugsɔb la, ka li nyuug na malisi tisim ka li na an linɛ ma'adi m sʋʋnr.
19 “Nɔkim pɛrakanɛ kpɛlim la ka kɛ ka Aaron nɛ o biribis la na pa'ali ba nu'usi o zug 20 ka kɔdig o ka ti'el ziim la bi'ela niŋ Aaron nɛ o biis la datiuŋ tʋba, nɛ ba datiuŋ nu'uraad nɛ ba datiuŋ nɔbraad, ka nɔk ziim la kpa'asi sɛɛnri gilig maan daka la. 21 Nɔkim ziim linɛ bɛ maan daka zugin la nɛ malʋŋ kpaam bi'ela zu'as Aaron nɛ o biis la nɛ ba fuud la wʋsa, ka ba na an nyain tis Wina'am. 22 Yisim pɛraug la kpaam bi'ela, nɛ o zʋgan'ar nɛ li kpaam la wʋsa, ka nwaae sɔɔnr la bi'ela, ka nɔk siyaanini la nɛ li kpaam la wʋsa, nɛ o datiuŋ gbɛr la. Bɔzugɔ ba nɔkidnɛ pɛraug nwa maan banɛ na an maanmaannib la malʋŋ. 23 Yisim bodobodo kanɛ ka' danbinnɛ ka zi'e Zugsɔb tuon la yinne, nɛ ma'asir yinne nɛ linɛ nwɛnɛ sa'akɔnt kpi'emis la yinne 24 niŋ Aaron nɛ o biribis la nu'usin ka nyɔɔsimi li wʋʋ ban niŋid nyɔɔsʋŋ malʋŋ si'em tisid Zugsɔb la. 25 Di'emi li ba nu'usin keŋ nyu'oe maan daka la zugin ka li nyɔ'ɔs la nyuug na malisi tis Zugsɔb la. Li anɛ bugum malʋŋʋ tis Zugsɔb la. 26 Fʋ ya'a kɔdig pɛrakanɛ ka fʋ na nɔki maal malʋŋ kanɛ na kɛ ka Aaron lieb maanmaan la, nɔkim kugsir la Zugsɔb la tuon ka nyɔɔsimi li wʋʋ ban nyɔɔsim maannɛ tisid Zugsɔb si'em la, ka li na aan fʋ din. 27 Fʋ na nɔk pɛraug la kugsir kanɛ ka fʋ nyɔɔsim la nɛ gbɛr kanɛ ka fʋ pɛsig ka li an maanmaan liebʋg maan ka li an man din. Amaa Aaron nɛ o biribis la na sʋ'oe li. Nɛ'ɛŋa an zi'elʋg kanɛ na bɛ saŋa wʋsa. 28 Saŋa kanɛ wʋsa ka Israel dim maal taaba la'asʋg malʋŋʋ tis Zugsɔb la, ni'im nwa na an Aaron nɛ o biis la din.”
29 Ka Zugsɔb lɛn yɛl Moses ye, “Aaron maanmaan fuud nwa na aan o yaas din. Ba na ye fuud nwa saŋkanɛ wʋsa ka maanmaan kpɛɛm la maali ba ka ba lieb maanmaannib, ka nɔk malʋŋ kpaam bu'oe niŋi ba zut. 30 Ka o bikanɛ na ti di'e o lieb maanmaan kpɛɛm, ka na kpɛn' Fuug Sʋgʋr zin'ikanɛ ka ba La'asid ka li an Kasi la ni maal maan, asɛɛ ka o yɛ fuud nwa daba ayɔpɔi.
31 “Nɔkim pɛrakanɛ ka ba kɔdigi maal maan ka ba lieb maanmaannib la ni'imi dʋg zin'isʋŋin la. 32 Ka Aaron nɛ o biis la na ɔnb pɛraug la ni'im Fuug Sʋgʋr la za'anɔɔrin, nɛ bodobodo dinɛ bɛ pɛogʋn la. 33 Ban ma'aa na di dikanɛ ka ba zaŋi maal suguru sɔsʋg maan ka ba lieb maanmaannib la. Da kɛ ka sɔ' dii pɛ'ɛsi ba zugɔ, bɔzugɔ li anɛ kasi tis Wina'am. 34 Ka ya ya'a di ka li kpɛlim ka bɛog nie, yanam nɔkim ni'im la nɛ bodobodo la wʋsa nyu'oe bugum ka li anɛ kasi.
35 “Maalim Aaron nɛ o biis la wʋʋ mam yɛlif si'em la. Nɔkim daba ayɔpɔi maali ba malʋŋ la.
36 “Daar wʋsa fʋn kʋʋm na'araug ka li an tʋʋmbɛ'ɛd maan, ka lɛm maal malʋŋ kanɛ an suguru sɔsʋg maannɛ pie maan daka la ka li an kasi, ka nɔk malʋŋ kpaam bu'oe niŋi li, ka li an Wina'am din. 37 Nɔkim daba ayɔpɔi maal suguru sɔsʋg daka la zug ka li kɛ ka li an Wina'am din. Ala ka maan daka la na an kasi ka bʋn linɛ si'is maan daka la mɛ na an kasi.”
Daar wʋsa malʋŋ yɛla
38 Ka Zugsɔb lɛn yɛl Moses ye, “Daar wʋsa ya na mɔr pɛraad ayi' banɛ an yʋʋm yinne na maal maan daka la zug. 39 Zaŋimi yinne maal maan bɛogʋn ka maal yinne la zaam. 40 Ka bɔ zɔm kuribir yinne paas yiiga pɛraug la zugʋ gɛndig nɛ olif kpaam kɔlibir yinne ka li na an zʋʋd maan, ka bɔ daam yubis ayi' ka li an bʋnnuuda maan. 41 Kɔdigim pɛraug kaŋa zaam, ka maal wʋʋ fʋn maal oŋa la si'em bɛogʋn la, nɛ li zʋʋd malʋŋ nɛ daam la, ka li na an malʋŋ kanɛ ka li nyuug malisi tis Zugsɔb la ka an malʋŋ kanɛ an nyu'or maan. 42 Ka biis banɛ na ti duoe na, na kpɛn maan ala, ka li sʋm ye ba maal Fuug Sʋgʋr la za'anɔɔrin tis mam Zugsɔb la. Anina ka man Zugsɔb la na sia'ali m nidib la ka pian' tisif. 43 Anina mɛn ka m na sia'al Israel dim la ka m na'am pipilim na kɛ ka zin'ig la an kasi. 44 Ka m na kɛ ka la'asʋg Fuug Sʋgʋr la nɛ maan daka la an kasi, ka mɛ kɛ ka Aaron nɛ o biis la lieb maanmaannibi tisim. 45 M na bɛ nɛ Israel dim la, ka na aan ba Wina'am. 46 Ka ba na baŋ ye manɛ aan ba Zugsɔb Wina'am onɛ mɔri ba yi Egipt na ka na bɛ nɛ ba. Sida manɛ aan ba Zugsɔb Wina'am la.”