Tudaari nyu'or Daka la yɛla
30
1 Ka Zugsɔb da lɛn yɛl Moses ye, “Nɔkim na'aziinr daadi maal maan daka kanɛ ka ba nyu'od tudaari li zug la. 2 Kɛl ka li wa'alim nɛ li yalʋŋ zem taaba ka an nɔbir makir yinne nɛ pʋsʋk, ka kɛ ka li dʋʋ gaadi li wa'alim la nɔɔr ayi'; ka li gʋʋdis duoe gɔla nwɛnɛ iila nɛ. 3 Nɔkim sanlima bʋligi li zug nɛ li lʋga anaasi la nɛ li iila la wʋsa. Ka nɔk sanlima dɔlisi gilig nɔɔr la ka li nwɛnɛ nwiig nɛ. 4-5 Maalim na'aziinr daad ka nɔk sanlima bʋligi ba. Ka maal sanlima baans anaasi tabil maan daka la lʋga la ni, ka ayi' bɛ lʋgkaŋa ka ayi' bɛ lʋgkaŋa la. Baans la sʋm ye li gɛɛl daad la, ka ba na mɔr dabanɛ ziid maan daka la. 6 Nɔkim maan daka nwa zi'el fukanɛ bɛŋ Kasi Zin'ig nɛ Kasi Wʋsa Kasi Zin'ig la nya'aŋ. Nɔnaar daka kanɛ mɔr sanlima suguru sɔsʋg liŋ la bɛ nɛ fukaŋa nya'aŋ. Anina ka m na si'anif. 7 Bɛkɛung wʋsa, Aaron ya'a kena maal fita la, o na nyu'oe tudaari linɛ nyuugʋ malis daka la zug. 8 Ka o ya'a ti nyu'od fita la zaam o na lɛn nyu'oe tudaari. Ka li na dit saŋa wʋsa tisid Zugsɔb la, ka ya na maan ala, yanam nɛ ya biis banɛ na ti duoe na, saŋa linɛ ka' naarɛ. 9 Da nɔk tudaari si'a ya'asi niŋ Zugsɔb tudaari daka la nii, bɛɛ kɔdig kɔnbsi'a nyu'oe li zugɔ, bɛɛ zʋʋd malʋŋʋn. Mɛ da bu'oe daam basi li zugɔ. 10 Aaron na zaŋ bʋnkɔnbkanɛ ka ba kʋ ye ba maal suguru sɔsʋg malʋŋ la ziim niŋ maan daka iila la ni yʋʋm wʋsa. Li anɛ tilas ye ya maan yʋʋm-yʋʋm suguru sɔsʋg nwa nɛ suguru sɔsʋg tʋʋmbɛ'ɛd maan ziim zʋmaaŋ kanɛ dɔl la wʋsa. Maan Daka kaŋa anɛ kasi tis Zugsɔb la.”Tʋʋmbɛ'ɛd suguru yɔɔb ligidi
11 Ka Zugsɔb yɛl Moses ye, 12 “Fʋ ya'a ye fʋ kaal Israel dim la sɔbi ba yʋda digil, asɛɛ sɔ' wʋsa yɔ si'eli tis Zugsɔb la o nyɔvʋr zug. Linɛ na kɛ ka yɛlbɛ'og kʋ paae sɔ' kaalʋg la saŋaa. 13 Banɛ ka ba kaal la ya'a lɔ'ɔŋi keŋ ban pʋn kaal sieba la san'an, ba na yɔ ligidi wʋʋ din nar si'em. Ligidkaŋa anɛ piini tis Zugsɔb la. 14 Banɛ ka ba kaal ka ba an yʋma pisi wa'ae la, ba nid woo na mɔr maan na tis Zugsɔb la. 15 Ya ya'a mɔr maan nwa na ye ya tisi ya Zugsɔb la ka sɔs suguru ya nyɔvʋr yɛla, arezak dim la nɛ nɔŋ dim la na yɔ ka li zem taaba. 16 Di'em suguru sɔsʋg maan la Israel dim la wʋsa ni, ka nɔki maal Fuug Sʋgʋr kanɛ ka ba la'asid nɛ taaba la. Dinɛ na kɛ ka Israel dim la na tiɛn Zugsɔb la yɛla, ban yɔɔ ba nyɔvʋr yɛla la zug.”
Laa kanɛ ka ba na piesid la maalʋg yɛla
17 Ka Zugsɔb yɛl Moses ye, 18 “Nɔkim kʋntzɛn'ugʋ maal latita'ar nɛ lin na sʋn'ʋl si'el zug, ka li na an piesʋg zin'ig. Nɔkim laa la zi'el la'asʋg Fuug Sʋgʋr nɛ maan daka la teŋsʋk ka niŋ ku'om li pʋʋgin. 19 Ka Aaron nɛ o biis la na piesidi ba nu'us nɛ ba nɔba anina. 20 Saŋa kan wʋsa ka ba kpɛn' Fuug Sʋgʋr kanɛ ka ba la'asid taaba la, ba na pie ba nu'us nɛ ba nɔba, ka li na kɛ ka ba kʋ kpii. Ba mɛ ya'a lɛn ye ba maal malʋŋʋ nyu'oe bugum tis Zugsɔb maan daka la ni, ba na pie. 21 Ba na pie ba nu'us nɛ ba nɔba ka kʋ kpii, li na aan ala saŋa wʋsa tis Aaron nɛ o yaas banɛ na ti duoe na.”
Malʋŋ kpaam nɛ tudaari zɔm yɛla
22 Ka Zugsɔb lɛn yɛl Moses ye, 23 “Nɔkim bʋnnyubisa bama maal tudaari. Makim mir ku'om galam ayi', nɛ sinamon zɔm nɛ, zaŋgbɛsuma, 24 ka nɔk kasiya mak ka li tɛbisim dɔl nɛ Fuug Sʋgʋr makir. Ka lɛn nɔk olif kpaam nwɛnɛ kɔliba yuobʋ. 25 Kɛl ka banɛ mi' bʋnnyubisa maalʋg nɔk nwa wʋsa maal malʋŋ kpasʋŋ ka ba mɔri suond ka li an Wina'am din. 26 Nɔkim malʋŋ kpaam la bu'oe siɛn Fuug Sʋgʋr kanɛ ka ba la'asid nɛ taaba anina la, nɛ Nɔnaar Daka la, 27 la'am nɛ teebul nɛ li la'ad la wʋsa, nɛ fita zi'esir nɛ li la'ad la wʋsa, nɛ daka kanɛ ka ba nyu'od tudaari la, 28 nɛ daka kanɛ ka ba maan malʋŋ kanɛ ka ba nyu'odi tisid Zugsɔb la nɛ li la'ad wʋsa, la'am nɛ laa nɛ bʋn linɛ ka li sʋn'e li zug la. 29 Maalimi ba ka ba an kasi; hali dinɛ wʋsa si'isi ba na lieb kasi. 30 Nɔkim kpaam la bu'oe niŋ Aaron nɛ o biis la, ka maali ba ka ba na an maanmaannibi tisim.” 31 Zugsɔb da lɛn yɛl Moses ye, “Yɛlim Israel dim la ye kpakaŋa anɛ malʋŋ kpaam kanɛ an mam Zugsɔb din. Li na bɛɛ ala tis Israel dim saŋa wʋsa. 32 Da nɔk kpaam nwa suoɛn ya niŋgbinaa, sɔ' mɛ da bɔɔd ye o maal kpasi'a ka li nwɛnɛ lii. Li anɛ malʋŋ kpasɔɔndim ka mam Zugsɔb sʋ'oe li ka li an m din, gu'usim ka kɛ ka li aan ala. 33 Sɔ' ya'a maal kpakan la buudi, ka sɔ' nɔki li bu'oe niŋ onɛ ka' maanmaana, ban yisim niŋkan sɔb buudi ni.” 34 Ka Zugsɔb yɛl Moses ye, “Nɔkim bʋnnyubisa kɔn'ɔb-kɔn'ɔb, nɛ frankinsense, ka maki ba wʋsa ka ba zem taaba. 35 Nɔkimi li wʋsa ka maali li wʋʋ banɛ mi' bʋnnyubisa nɛ tima tʋʋma maan tudaar zɔm si'em la. Niŋimi yaarim ka li an nyain ka aan m din. 36 Nɔkimi li bi'ela tua ka li kilim wʋʋ zɔm nɛ, ka nɔki li zi'el sʋgʋrin la Nɔnaar Daka la tuon, ka m na sia'ali fʋ anina. Li sʋm ye li an kasi tisif. 37 Da maal tudaari kaŋa buudi tisi fʋ mɛŋa, gɔsimi li ka li an kasi tis Zugsɔb la. 38 Ka sɔ' ya'a maal tudaar kan la buudi on bɔɔdi li nyuug la zug, ban yisim o sɔb buudi la ni.”