Bezalel nɛ Oholiyab yɛla
31
1 Ka Zugsɔb yɛl Moses ye, 2 “Gɔsima! M gaŋnɛ Uri biig Bezalel onɛ an Hur yaaŋ, ka an Juda dɔɔg nid la. 3 M tis o Wina'am Siig la, ka tis o ya'am nɛ mi'ilim nɛ baŋir hali bɛdegʋ ye o mɔri tʋm tʋʋma buudi wʋsa. 4 O na baŋ on na niŋ si'em nɔk sanlima nɛ anzurifa nɛ kʋntzɛn'ugʋ maal si'el wʋsa. 5 O mɛ na nyaŋi kpi'e kugvɛnla maal duorim la'ad, ka mi' daad kpi'eb nɛ tʋʋma buudi wʋsa. 6 M mɛ gaŋnɛ Akisamak biig Oholiyab onɛ yi Dan dɔɔgin na la ye o sʋŋ o, ka nɔk baŋiri tis banɛ mi' tʋʋma kɔn'ɔb-kɔn'ɔb la, hali ka ba na nyaŋi tʋm tʋʋm kanɛ ka m yɛlif ye fʋ tʋm la wʋsa. 7 Ba na nyaŋi maal Fuug Sʋgʋr la, nɛ Nɔnaar Daka la ka suguru sɔsʋg liŋ la bɛɛ li zug nɛ li la'ad la wʋsa, 8 nɛ teebul la nɛ li la'ad la wʋsa, nɛ sanlima fita zi'esir nɛ li la'ad la, nɛ tudaari nyu'or daka la, 9 nɛ daka kanɛ ka ba nyu'od malʋŋʋ tisid Zugsɔb la nɛ li la'ad wʋsa, nɛ lakanɛ ka ba mɔri piesid la, 10 nɛ maanmaannib fubanɛ vɛnl hali ka ba na maali tis Aaron la, nɛ fubanɛ ka ba na maali tis o biis la ka ba na yɛ ka nyaŋi tʋm wʋʋ maanmaannib la, 11 nɛ malʋŋ kpaam nɛ bʋnnyubisa dinɛ ka ba nɔkidi tʋm zin'ikanɛ an Kasi tʋʋma la. Ba maalim nwa wʋsa wʋʋ mam yɛlif si'em la.”Vʋ'ʋsʋm dabisir la yɛla
12 Ka Zugsɔb lɛn yɛl Moses ye, 13 “Yɛlim Israel dim la ye ba tɛnr Vʋ'ʋsʋm dabisir la yɛla. Vʋ'ʋsʋm dabisir la anɛ zanbin linɛ na pa'al ye mam nɛ yanam nɛ ya zʋmaan kanɛ na ti duoe na wʋsa anɛ yinne. Li na kɛ ka ya baŋ ye manɛ an Zugsɔb la, ka kɛ ka ya an kasi. 14 Ɛɛn, tɛnri Vʋ'ʋsʋm dabisir la yɛla. Vʋ'ʋsʋm dabisir la anɛ kasi ka li an sʋm ye ya gu'us ka kɛ ka li aan ala saŋa wʋsa. Ka onɛ san'am dabisir nwa kisʋg la, asɛɛ ka on sɔb kpi, ka onɛ mɛ tʋm tʋʋma daakan la yanam yisim on sɔb buudi ni. 15 Tʋmmi daba ayuobʋ ma'aa, amaa daba ayɔpɔi la anɛ Vʋ'ʋsʋm daar linɛ an kasi tis Zugsɔb la. Onɛ wʋsa tʋm Vʋ'ʋsʋm daar la ba na kʋʋ o. 16 Alazug, li sʋm ye Israel dim tɛnr ka di'em Vʋ'ʋsʋm dabisir la wʋʋ din nar si'em, hali nɛ ba biis banɛ na ti duoe na wʋsa ka li pa'ali ti nɔnaar linɛ ka' naarɛ. 17 Li anɛ zanbin linɛ na pa'al ye mam nɛ yanam nɛ ya zʋmaan banɛ na ti duoe na wʋsa anɛ yinne. Li pa'al ye daba ayuobʋ ka Zugsɔb maal agɔl nɛ teŋ ka vʋ'ʋs daba ayɔpɔi la daar.”
Wina'am sɔb o nɔzi'ela la yɛla
18 Ka Zugsɔb la pian' tis Moses Sinai zuor zugʋ naae la, ka yʋ'ʋn nɔk kuglamma ayi' tis o, banɛ ka on Wina'am mɛŋ sɔb o nɔnaar la nɔzi'ela la.