Sanlima na'apɔl ba'ar la yɛla
32
1 Nidib la da nyɛ ka Moses yuug zuor la zug ka nam pʋ sig na la, ka ba keŋ gilig Aaron ka yɛl o ye, “Gɔsima, maalim wina tisi ti ka ba gaadi ti tuon ka ti dɔl ka ti zi' dinɛ niŋ Moses onɛ mɔri ti yi Egipt teŋin la naa!” 2 Ka Aaron yɛl ba ye, “Yɛlimini ya pu'ab, nɛ ya biribis nɛ ya bipumis ye ba nɔki ba sanlima tʋblɛma la mɔr na.” 3 Ka nidib la wʋsa siak Aaron nɔɔr ka mɔri ba sanlima tʋblɛma na. 4 Ka Aaron nɔk sanlima la nyɛligi maal na'apɔl. Ka nidib la yɛl ye, “Israel dima, wʋmmiya! Ya teŋgbana banɛ mɔri ya yi Egipt na la nwa.” 5 Ka Aaron nyɛ nidib la tʋm si'em la, ka o mɛ' maan bimbim na'apɔl la tuon ka mɔɔli yɛli ba ye, “Bɛog ti na maal malʋŋʋ tis Zugsɔb la.” 6 Ka nidib la duoe bɛkɛungʋ maal malima banɛ nyu'od bugum nɛ taaba la'asʋg maana, ka zin'ini di ka nu, ka duoe wa'a ba'amaannib wa'a. 7 Ka Zugsɔb yɛl Moses ye, “Sigim zuor la zug tɔ'ɔtɔ ka nidib la ka fʋ mɔri ba yi Egipt na la, ba tʋm tʋʋmbɛ'ɛd! 8 Ba ta'an kɛɛs mam yɛl ye ba dɔl si'em la bas, ka maal bʋn ka li nwɛnɛ na'apɔl nɛ ka ba pʋ'ʋsidi li ka maal malʋŋʋ tisi li, ka yɛt ye, ‘Israel dima, wʋmmiya! Ya wina banɛ mɔri ya yi Egipt na la nwa.’ ” 9 Ka Zugsɔb lɛn yɛl o ye, “M nyɛ nidib nwa tʋbzian'asim nɛ ba tʋʋmbɛ'ɛdi an si'em. 10 Moses! Kɛl ka m san'ami ba! Ka m na kɛ ka fʋn Moses yaas zu'oe lieb buudtita'ar.”11 Ka Moses fabili tis o Zugsɔb Wina'am ye, “M Zugsɔba, da tʋm alaa! Bɔ ka fʋ sʋʋnr duoe nɛ fʋ nimbanɛ ka fʋ mɔri ba yi Egipt na nɛ fʋ paŋ tita'ar la? 12 Egipt dim na yɛl ye fʋ mɔri pʋtɛn'ɛbɛ'ɛd ka ma'aa mɔri ba paae zuorin nwa na ye fʋ kʋʋ ba ka li' ba buudi dunia nwa ni. Ayei, da kɛ ka ba yɛl ala! Kɛl ka fʋ sʋʋnr digin ka fʋ tiaki fʋ ya'am ka yɛl kaŋa da paae ba. 13 Tɛn'ɛsim fʋn mɛŋ mɛŋi da kaanb si'em tisi fʋ tʋmtʋmnib Abraham nɛ Isaak nɛ Jakob ye, ‘M na kɛ ka ya yaas zu'oe nwɛnɛ nwadbibisi bɛ saazug si'em la, ka na tisi ba teŋ kaŋa wʋsa ka m da kaanb la ka li aan ba din saŋa wʋsa.’ ” 14 Ka Zugsɔb la sik o sʋʋnr ka pʋ san'am nidib la wʋʋ on gban'e si'em laa.
15 Ka Moses fɛndigi sigid zuorin la na, ka mɔr kuglamma ayi' banɛ ka ba sɔb nɔyɛlʋgʋ li tuon nɛ nya'aŋ la o nu'usin. 16 Wina'am mɛŋi da maal kuga la, ka mɛ sɔb pian'ad la o mɛŋ. 17 Ka Josua wʋm ka nidib la maan tʋkpiidʋg ka li nwɛnɛ zaba la, ka o yɛl Moses ye, “Zaba tʋkpiidʋg bɛɛ anina!” 18 Ka Moses lɛbis o ye,
“Ayei! Nɛ'ɛŋa ka' zaba tʋkpiidʋgɔ;
li ka' banɛ zabi nya'aŋ bɛɛ banɛ zabi gʋ'ʋŋ tʋkpiidʋgɔ;
amaa li anɛ di'ema nɛ yʋ'ʋma tʋkpiidʋg!”
19 Ka ba duoe ken paae ban bɛ zin'isi'a la nyɛ ka ba maal na'apɔlli zi'el, ka wa'adi tisidi li. Ka Moses sʋʋnr duoe ka o nɔk kuga la lɔbi bas zuor la teŋir ka li nwa'ae. 20 Ka Moses nɔk na'apɔl la bas bugumin ka li nyɛligi ga'aŋ ka o nɛɛmi li baanlig ka nɔki yugus ku'omin tisi ba ye ba num, ka ba nu.
21 Ka Moses bu'os Aaron ye, “Nidib la maal bɔ ka fʋ mɔr tʋʋmbɛ'ɛd kaŋa na tisi ba?” 22 Ka Aaron lɛbis ye, “M zugdaana, m bɛlimnɛ, da kɛ ka nɛ' daami fɔ. Fʋ mɛŋ mi' nidib la an bɛ'ɛd si'em. 23 Ba yɛlim ye, ‘Gɔsima, maalim wina tisi ti banɛ na gaadi ti tuon ka ti dɔl. Ka ti zi' dinɛ niŋ Moses onɛ mɔri ti yi Egipt teŋin la naa!’ 24 Ka m yɛli ba ye, ‘Mɔri ya sanlima tʋblɛma la na.’ Ka ba mɔri ba na ka m di'e nɔki bas bugumin la, ka na'apɔl nwa yina.” 25 Moses daa nyɛ ka nidib la tʋm yɔɔg-yɔɔg, ka li anɛ Aaron n kɛ ka ba niŋid ala, ka ba dataas yʋ'ʋn la'adi ba. 26 Ka o zi'e za'anɔɔrin la ka yɛl ye, “Yanam banɛ wʋsa dɔl Zugsɔb la, kemini m san'an na.” Ka banɛ an Levi dɔɔg dim la wʋsa la'as o san'an na. 27 Ka o yɛli ba ye, “Ala ka Zugsɔb Israel Wina'am yɛt ye, ‘Sɔ' woo yisimi o sʋ'ʋraug ka gilig nidib la ni kʋʋ ya pitib nɛ ya bieya, nɛ ya zuanam, nɛ ya kpi'es wʋsa!’ ” 28 Ka Levi dɔɔg dim la siak Moses nɔɔr ka kʋ nidib tusa atan' daakan. 29 Ka Moses yɛl Levi dim la ye, “Zina ya anɛ banɛ na tʋm Zugsɔb la tʋʋma bɔzugɔ ya siaki kʋʋ ya pitib nɛ ya biis, ka nwa zug Zugsɔb na niŋi ya zug bareka zina.”
30 Ka li yimbɛog ka Moses yɛl nidib la ye, “Ya tʋm tʋʋmbɛ'ɛd hali, amaa m na lɛn lɛbi dʋ Zugsɔb san'an zuor la zugʋ, sɔs suguru ya tʋʋmbɛ'ɛd la zug ka daasi'erɛɛ o kɛɛ ya taali bas.” 31 Ka Moses lɛb Zugsɔb san'an ka yɛl o ye, “Nimbama tʋm tʋʋmbɛ'ɛd, ba nɔk sanlima maal wina tisi ba mɛŋ. 32 Amaa nannanna m bɛlimnɛ, kɛl nidib la tʋʋmbɛ'ɛd la bas, ya'a ka' ala fʋn yis mam yʋ'ʋri fʋ gbauŋ la ni!” 33 Ka Zugsɔb yɛl Moses ye, “Ayei, amaa li anɛ onɛ wʋsa tʋm tʋʋmbɛ'ɛd ka m na yis o bas. 34 Lɛm mɔr nidib la keŋ mam ye fʋ mɔri ba keŋ si'el la. Gɔsima, m maliak na gaad tuon ka ba dɔl. Amaa m ya'a ti ye m buol nidib la gɔs banɛ tʋm tʋʋmbɛ'ɛd la wʋsa, m na tɛɛgi ba tʋbir.”
35 Ka Zugsɔb kɛ ka tɔɔg paae ba, ban kɛ ka Aaron maal na'apɔl la zug.