Israel dim yi Sinai zuorin la
33
1 Ka Zugsɔb yɛl Moses ye, “Mɔri fʋ nimbanɛ ka fʋ mɔri yi Egipt la duoe yi zin'ikanɛ ka ya bɛ nwa la. Mɔri ba keŋ teŋ kan ka m kaanbi tis Abraham nɛ Isaak nɛ Jakob ye m na nɔki tisi ba yaas la. 2 Ka m na kɛ ka m maliak gaad tuonnɛ kad buudbanɛ an Keenan dim nɛ Amor dim nɛ Hitti dim nɛ Perizi dim nɛ Hivi dim nɛ Jebus dim la. 3 Kemi teŋ kanɛ ka bin'isim nɛ siind pʋbid wʋʋ ku'om la, amaa man kʋ dɔlli ya keŋɛ. Bɔzugɔ ya anɛ nimbanɛ ki'isidi m nɔɔr ka m ya'a dɔlli ya m na kʋʋ ya suor zug.” 4 Ka nidib la wʋm nwa la, ka ba sʋnf san'am ka ba kaasid ka pʋ zaŋi ba sanlima la'adi yɛ bɛɛ suoɛn kpaam. 5 Ka Zugsɔb la yɛl Moses ye o yɛlimi ba ye, “Ya anɛ nimbɛ'ɛdnam nɛ banɛ tʋbaa ziank. M ya'a ye m dɔl yanam hali saŋa bi'ela, m na san'ami ya tɔ'ɔtɔ. Yisiminɛ ya niŋgɔnkɔris nɛ ya bʋnvɛnla wʋsa ka m gɔsi baŋ man na maali ya si'em.” 6 Dinzug saŋkanɛ ka ba da yit Sinai zuorin la, Israel dim la da pʋ lɛn kɔr niŋgɔnkɔrisɛ.La'asʋg fuug sʋgʋr la
7 Moses da ɛɛnti ti'inɛ la'asʋg fuug sʋgʋr nidib la bɛ si'el la yiŋ sa ka li wa'am bi'ela. Ba da buonnɛ li yʋ'ʋr ye, “La'asʋg Fuug Sʋgʋr.” Ka onɛ bɔɔd ye o paae Zugsɔb la da ɛɛnti keŋnɛ anina. 8 Saŋkanɛ wʋsa ka Moses ti keŋ La'asʋg Sʋgʋrin la, nidib la duodnɛ zi'e ba sʋga za'anɔya ni gɔsid Moses hali ka o ti kpɛn' naae. 9 Ka o ya'a ti kpɛn' pʋʋgin la naae, saŋgbauŋ la sigidnɛ na lusid za'anɔɔr la, ka Zugsɔb nyaan pian' tis Moses. 10 Ka nidib la wʋsa ya'a ti nyɛ ka saŋgbauŋ la lus Fuug Sʋgʋr za'anɔɔr la, ba wʋsa duodnɛ zi'en ka sʋ'ʋnnɛ ba zuti ba fuud sʋga za'anɔya ni. 11 Ka La'asʋg Sʋgʋrin la ka Zugsɔb pian'adi tisid Moses wʋʋ nid nɛ o tiraanɛ na sɔnsid si'em. Ka li nya'aŋ ka Moses da lɛb nidib la san'an na, ka Josua onɛ an Nun biig la, onɛ sʋŋid o la, nam bɛ Fuug Sʋgʋr la ni.
Moses nyɛ Zugsɔb la girima
12 Ka Moses yɛl Zugsɔb la ye, “Fʋ yɛtim ye m mɔr nidib la keŋi ba ken zin'ig la, amaa fʋ pʋ yɛl onɛ ka fʋ na tʋm ka o na sʋŋi ma. Fʋ da buol mam nɛ ka yɛlim ye, ‘M mi' fʋ yʋ'ʋr, ka m nini mɛ tigif.’ 13 Tɔ, li ya'a sid aan ala, pa'alim fʋn gban'e si'em ka m baŋ, ka na tʋm wʋʋ fʋn bɔɔd ye m tʋm si'em la. Da tam ye nimbama anɛ fʋ mɛŋ nidiba.” 14 Ka Zugsɔb la lɛbis ye, “Mam mɛŋ na dɔllif ka ti keŋ ka m na tisif vʋ'ʋsʋm.” 15 Ka Moses lɛbis ye, “Fʋ ya'a kʋ dɔlli ti keŋi da kɛ ka ti yi kpɛla. 16 Ka fʋ ya'a pʋ dɔlli tii keŋɛ, nidib na niŋ wala baŋ ye fʋ nini sid tig mam nɛ nimbama ka fʋ gaŋ ye ti bɛɛ ti kɔn' nɛ dunia dim wʋsa la?” 17 Ka Zugsɔb lɛbis o ye, “M na niŋ fʋn sɔs ye m tʋm si'em la. Bɔzugɔ, m mi' fʋ yʋ'ʋr ka m nini tigif.” 18 Ka Moses yɛl ya'as ye, “Kɛl ka m nyɛɛ fʋ girima la kpɛla.” 19 Ka Zugsɔb lɛbis ye, “M na kɛ ka fʋ nyɛɛm tʋʋm sʋma la ka m na buonnɛ m mɛŋ yʋ'ʋr ye, ‘Zugsɔb’ fʋ san'an. Man na zɔ nimbanɛ ka m gban'e ye m zɔɔ ba nimbaanlig, ka zʋ'ʋs nimbanɛ ka m gban'e ye m zʋ'ʋsi ba. 20 Amaa fʋ kʋ nyaŋi gɔsi kpa' m nindaa, bɔzugɔ sɔ' ka' na nyɛ m nindaa ka lɛn vʋeya.” 21 Ka o lɛn yɛl ye, “Gɔsima! Fʋ na tun'e zi'enɛ m san'an tampiing la zug kpɛla. 22 M girima la ya'a ti gat m na nɔki fʋ niŋ tampiing la yɔkin ka nɔki m nu'ugi ligilif, hali nɛ mam na ti gaadi naae. 23 Ka nyaan yisi m nu'ug ka fʋ nyɛ m nya'aŋ, amaa fʋ kʋ nyɛ m nindaa.”