Ba maal Aaron nɛ o biis la maanmaannib
8
1 Zugsɔb la da yɛl Moses ye, 2 “Mɔr Aaron nɛ o biribis la na, nɛ maanmaannib fuud la nɛ malʋŋ kpaam la, m paas tʋʋmbɛ'ɛd maan na'araug la, nɛ pɛraad ayi', ka nɔk bodobodo linɛ ka danbin kae la niŋ pɛogʋnɛ mɔr na; 3 ka buol nidib la wʋsa La'asʋg Fuug Sʋgʋrin la.” 4 Ka Moses maal wʋʋ Zugsɔb la yɛl si'em la. Ka nidib la la'as La'asʋg Fuug Sʋgʋr la za'anɔɔrin 5 ka Moses yɛl nidib la ye, “Zugsɔb la yɛlim ye m niŋ si'em nwa.”6 Ka Moses mɔr Aaron nɛ o biribis la yi tuon na ka nɔk ku'om sʋʋ ba, 7 ka nɔk fuwɔk la yɛɛl Aaron ka nɔk sɛnbidiŋ la lɔɔ o, ka nɔk fukanɛ pʋ paae fuwɔk la yɛɛli pa'al, ka yʋ'ʋn nɔk dansik la pa'al zugin, ka nɔki li pien vɛnligi lɔɔ o siaa ka li gban'e sʋ'ʋŋa, 8 ka nɔk linɛ lɔɔd nyɔ'ɔgin la lɔɔ paas, ka nɔk ban buon si'el ye Urim nɛ Tummim la suu li gɛfa ni, 9 ka nɔk zupibig la pid o zug, ka nɔk sanlima baŋ kanɛ pa'al ye o anɛ Wina'am nid la tabili li tuon, wʋʋ Zugsɔb la yɛl Moses si'em la.
10 Moses da nɔk malʋŋ kpaam la bu'oe niŋ Fuug Sʋgʋr la nɛ linɛ bɛɛ li pʋʋgin wʋsa ka pɛsigi li tis Zugsɔb la; 11 ka lɛn nɔk kpaam misi gilig daka la nɔɔra ayɔpɔi, nɛ li la'ad la wʋsa, nɛ ku'om latita'ar nɛ lin sʋn'ʋl si'el zug la, ka pɛsigi li tis Zugsɔb la. 12 Ka yʋ'ʋn bu'oe malʋŋ kpaam la niŋ Aaron zug ka pɛsig o tis Wina'am ka o lieb maanmaan, 13 ka mɛ mɔr Aaron biribis la yina ka yɛɛli ba dansikanam, ka nɔk piena lɔɔ ba sies ka pili ba zupibis wʋʋ Zugsɔb la yɛl Moses si'em la.
14 Ka o yʋ'ʋn nɔk na'araug linɛ ka ba na maal tʋʋmbɛ'ɛd maan la ka Aaron nɛ o biribis la nɔki ba nu'usi pa'ali o zug. 15 Ka Moses kɔdig na'araug la ka ti'el ziim la nɔk o nu'ubili tin'e niŋ iila banɛ bɛ daka la ni la ka kɛ ka daka la an nyain, ka kpa'ae ziim kanɛ kpɛlim la bas daka la gbinnin. Ala ka o pɛsigi li ka maal suguru sɔsʋg maannɛ li zug. 16 Ka Moses yis kpaam linɛ bɛ pʋʋgin la'ad la ni, nɛ siyaanini nɛ li kpaam la wʋsa, ka nwaae sɔɔnr la bi'ela, n nyu'oe daka la zug. 17 Amaa ka mɔr na'araug la gbauŋ, nɛ li ni'im banɛ kpɛlim la nɛ pʋʋgin la'ad nɛ pʋd la wʋsa yi teŋ la kpikpɛŋi nyu'oe li wʋsa anina, wʋʋ Zugsɔb la yɛl Moses si'em la.
18 Ka Moses mɔr pɛraug na ye ba maal nyu'or maan, ka Aaron nɛ o biribis la nɔki ba nu'usi pa'ali li zugin 19 ka o kɔdig pɛ'og la ka nɔk ziim la kpa'asi sɛɛnr daka la gilig; 20 ka waansi li baanlʋg ka la'asi ba nɛ zug nɛ kpaam la wʋsa nyu'oe daka la zug; 21 ka nɔk ku'om pie li pʋʋgin la'ad la nɛ li nɔba la, ka nyu'oe li wʋsa nyu'or daka la zug ka li an maan kanɛ nyu'od ka li nyuug la malisi tis Zugsɔb la, wʋʋ on Zugsɔb la yɛl Moses si'em la.
22 Ka o mɔr pɛrakanɛ kpɛlim ka o ye o maal banɛ na an maanmaannib maan la, ka Aaron nɛ o biribis la pa'ali ba nu'us pɛraug la zug, 23 ka Moses kɔdigi li ka ti'el ziim la niŋ Aaron datiuŋ tʋbirin, nɛ o datiuŋ nu'uraug nɛ o datiuŋ nɔbraug. 24 Ka kɛ ka Aaron biribis la yi tuon na, ka niŋ ziim la ba datiuŋ tʋba ni, nɛ ba datiuŋ nu'uraad nɛ ba datiuŋ nɔbraadin, ka nɔk ziim la kpa'asi sɛɛnr daka la gilig. 25 Ka o yis pɛraug la kpaam bi'ela, nɛ o zʋʋr, ka nwaae sɔɔnr la yis bi'ela, ka nɔk siyaanini la nɛ li kpaam la wʋsa, nɛ o datiuŋ gbɛr. 26 Ka yis bodobodo kanɛ ka' danbinnɛ ka zi'e Zugsɔb tuon la yinne, nɛ ma'asir yinne nɛ linɛ nwɛnɛ sa'akɔnt kpi'emis la yinne, ka pa'ali li kpaam la'ad nɛ datiuŋ gbɛr la zug. 27 Ka o daa nɔki li wʋsa niŋ Aaron nɛ o biribis la nu'usin ka nyɔɔsimi li wʋʋ ban niŋid nyɔɔsʋŋ malʋŋ si'em tisid Zugsɔb la. 28 Ka Moses di'e li wʋsa ba nu'usin nyu'oe maan daka la zugin ka li an maanmaannib liebʋg malʋŋ ka li nyɔ'ɔs la nyuug malisi tis Zugsɔb la. Li da anɛ maan kanɛ ka ba nyu'oe bugum tis Zugsɔb la. 29 Ka mɛ nɔk kugsir linɛ an Moses pʋʋr ka an maanmaannib liebʋg malʋŋ pɛraug la nyɔɔsimi li Zugsɔb tuon, wʋʋ nyɔɔsʋŋ malʋŋ nɛ, wʋʋ Zugsɔb la yɛl Moses si'em la.
30 Ani ka Moses da nɔk malʋŋ kpaam la bi'ela, nɛ ziim linɛ bɛ daka la zugin bi'ela, mis Aaron nɛ o biribis maanmaannib fusʋma la, ka pɛsig Aaron nɛ o biribis la nɛ ba fuud wʋsa tis Zugsɔb la. 31 Moses da yɛl Aaron nɛ o biribis la ye, “Nɔkimi ni'im la dʋgi La'asʋg Fuug Sʋgʋr la za'anɔɔrin ka ɔnbi li nɛ maanmaan liebʋg bodobodo linɛ bɛ pɛogʋn la, wʋʋ Zugsɔb la yɛl si'em la ye, ‘Aaron nɛ o biribis la an banɛ na dii li la.’ 32 Nɔkimi bodobodo nɛ ni'im linɛ kpɛlim la wʋsa nyu'oe. 33 Mid ka ya yi La'asʋg Fuug Sʋgʋr la za'anɔɔrin hali ti paae dabisa ayɔpɔi ka ya maanmaannib liebʋg malʋŋ la ti paae li bɛn. 34 Tinamɛ tʋm si'em zina la anɛ Zugsɔb la zi'el nɔɔr ye ti tʋm ala, ka li anɛ suguru sɔsʋg maannɛ tisi ya. 35 Alazug, asɛɛ ka ya bɛ La'asʋg Fuug Sʋgʋr la za'anɔɔrin la ka li paae dabisa ayɔpɔi, nintaŋ nɛ yʋ'ʋŋ, ka tʋm wʋʋ Zugsɔb la zi'eli ya si'em la; ka li ya'a ka' alaa, ya na kpi. Ala ka Zugsɔb la yɛli tisim.”
36 Ka Aaron nɛ o biribis la sid tʋm wʋʋ Zugsɔb la yɛl Moses ye ba tʋm si'em la.