Taal maan suor
7
1 “Nɛ'ɛŋa an taal maan zi'ela. Li anɛ man Zugsɔb la din ka an kasi. 2 Ba na kɔdig taal maan bʋnkɔnbʋg la zin'ikanɛ ka ba kɔdigid nyu'or maan la, ka nɔk ziim la misi mis maan daka la gilig. 3 Ka maanmaan la na nɔk zʋʋr la nɛ pʋʋgin la'ad la nɛ kpaam la wʋsa nyu'oe tis Zugsɔb la, 4 ka yis kpaam linɛ bɛ siyaanini la ni wʋsa, nɛ siyaanini la, ka nwaae sɔɔnr la yis bi'ela, 5 ka maanmaan la na nyu'oe li daka la zug ka li an nyu'or maannɛ tis mam Zugsɔb la. Li anɛ taal maan. 6 Maanmaannib nɛ ba biribis ma'aa na ɔnb maan kaŋa ni'im zin'ikanɛ an kasi la bɔzugɔ li anɛ kasi.7 “Taal maan la nɛ tʋʋmbɛ'ɛd maan la nwɛnɛ taaba. Ba wʋsa zi'ela la anɛ yinne. Maanmaan onɛ maan suguru sɔsʋg maan la sʋ'oe ni'im kan la. 8 Maanmaan ya'a maal nyu'or maan, onɛ sʋ'oe gbauŋ la. 9 Maanmaan onɛ maal zʋʋd maan wʋsa linɛ ka ba maal wʋʋ bodobodo nɛ, bɛɛ linɛ ka ba sɛn' bugum zugin, bɛɛ linɛ ka ba maal ma'aslaasin, na sʋ'oe diib la. 10 Ka zʋʋd maan linɛ kpɛlim ka an zɔm ka kpaam gɛndig bɛɛ linɛ pʋ gɛndig la na an Aaron biribis wʋsa din.”
Taaba la'asʋg maan
11 Nɛ'ɛŋa an taaba la'asʋg maan zi'ela, linɛ ka nid na tun'e maali tis Zugsɔb la: 12 O ya'a ye o maal ka li anɛ bareka pʋ'ʋsʋg maan, li sʋm ka o maal bodobodo linɛ ka danbin kae ka gɛndig nɛ kpaam, nɛ linɛ nwɛnɛ sa'akɔnt kpi'emis linɛ pʋ gɛndig danbinnɛ ka niŋi li kpaam, nɛ zɔmbaanlig ka ba nɔki maal ma'asa ma'aslaasin. 13 O mɛ na maal bodobodo linɛ mɔr danbin la paas taaba la'asʋg bareka pʋ'ʋsim la. 14 O na mɔr nwa buudi wʋsa yinne-yinne kena tis Zugsɔb la. Maanmaan onɛ nɔk ziim la misi gilig daka la ka maal taaba la'asʋg maana la sʋ'oe li wʋsa. 15 Taaba la'asʋg maan ni'im la ɔnbidnɛ daakan la nɔɔ. Li ni'im pʋ nied bɛogɔ. 16 Maan la ya'a anɛ o kaanbnɛ zi'el bɛɛ ya'amlɛog maan, li sʋm ye ba ɔnbi li wʋsa daakan la nɔɔ, amaa li ya'a kpɛlim bi'ela ba na nyaŋi ɔnbi li di yimbɛog, 17 amaa ni'im la ya'a paae daba atan' ban nyu'omi li nɛ bugum. 18 Sɔ' ya'a ɔnb taaba la'asʋg maan ni'im kanɛ paae daba atan', Zugsɔb la kʋ di'e lii. Maan la na lieb zaalim, bɔzugɔ ni'im la dian'a nɛ; ka onɛ ɔnbi li la, taal na dɔl on sɔb.
19 Ni'im kanɛ wʋsa si'is linɛ an dian'ad la pʋ sʋm ye ya ɔnbi li. Di sʋm ye ba nɔki nyu'oe bugum. Amaa ni'im banɛ kpɛlim la, onɛ wʋsa an nyain na nyaŋi ɔnb. 20 Amaa onɛ ka' nyain ya'a ɔnb taaba la'asʋg maan ni'im kanɛ an Zugsɔb bʋn la, ba na yis o Israel nidib la kallin. 21 Ka sɔ' ya'a si'is bʋnkanɛ wʋsa ka' nyainnɛ, ka li anɛ ninsaal bɛɛ bʋnkɔnbʋg dian'ad, bɛɛ bʋnsi'a wʋsa linɛ kis ka an dian'ad, ka ɔnb taaba la'asʋg maan ni'im kanɛ ka ba maali tis Zugsɔb la, o tʋm taal ka ba na yis on sɔb Israel nidib la kallin.
22 Ka Zugsɔb yɛl Moses ye, 23 “Yɛlim Israel dim la ye sɔ' da ɔnb naaf kpaam, bɛɛ pɛ'og kpaam, bɛɛ bʋʋg kpaam. 24 Li ya'a anɛ bʋnkɔnbkanɛ kpi, bɛɛ o bʋnkɔnbtaaba gban'e o kʋ, sɔ' da ɔnb o kpaam la, amaa ya na tun'e nɔki li maali ya tʋʋm si'a wʋsa. 25 Ka sɔ' ya'a ɔnb kpakanɛ ka ba maal nyu'or maannɛ tis Zugsɔb la asɛɛ ka ba yis o Israel nidib la kallin. 26 Yanamɛ bɛ zin'isi'a wʋsa, yanam da di bʋnkɔnbʋg ziim, bɛɛ bʋn-ian'adir ziim; 27 ka onɛ di ziim ban yisim o sɔb Israel nidib la kallin.”
28 Ka Zugsɔb yɛl Moses ye, 29 “Yɛlim Israel dim la ye onɛ mɔr o taaba la'asʋg maan na, asɛɛ o yis linɛ ka ba na maal malʋŋʋ tis Zugsɔb la. 30 Ka on sɔb na mɔr maan la o mɛŋ nu'usin na ka ba nyu'oe maali tis Zugsɔb la. O na mɔr kpaam nɛ kugsir la na ka nɔk kugsir la nyɔɔsim ka pʋ'ʋs Zugsɔb ka li an nyɔɔsʋŋ maan, 31 ka maanmaan la na nyu'oe kpaam la daka la zug. Amaa kugsir la anɛ Aaron nɛ o biribis la bʋn. 32 Ka ya na yisi ya taaba la'asʋg maana la datiuŋ gbɛri tis maanmaan la ka li an tɔnsir. 33 Aaron biig onɛ zaŋ ziim nɛ kpaam maal taaba la'asʋg maana la na sʋ'oe datiuŋ gbɛr la. 34 Man Zugsɔb nɔk kugsir kanɛ ka ba nyɔɔsim nɛ datiuŋ gbɛr kanɛ ka ba yis Israel dim taaba la'asʋg maanin la wʋsa tis Aaron nɛ o biribis la ka li aan ba pʋʋr saŋa wʋsa yit Israel dim nu'usin. 35 Li anɛ pʋʋr kanɛ yi nyu'or maan linɛ ka ba maali tis Zugsɔb la ni, ka zaŋi tis Aaron nɛ o biis la, lin yi saŋkanɛ ka ba gaŋi ba ye ba an maanmaannib la. 36 Daakanɛ ka ba bu'oe malʋŋ kpaam niŋi ba la, Zugsɔb la da yɛl Israel dim ye ba tisimi ba tɔnsir kaŋa ka li aan ba pʋʋr zʋmaaŋ wʋsa.”