Tʋʋmbɛ'ɛd linɛ nar taal maan
6
1 Ka Zugsɔb la yɛl Moses ye, 2 “Sɔ' ya'a tʋm tʋʋmbɛ'ɛdi san'am Zugsɔb la wada ka li anɛ o tiraanɛ tis o si'el ye o su'a tis o ka o ma' ye bʋn la bɔdignɛ, bɛɛ ba zuu li nɛ; bɛɛ o zam o tiraan la nɛ, 3 bɛɛ sɔ' si'eli bɔdig ka o pi'ig ka ma' ye o pʋ pi'igɛ, bɛɛ o ma'anɛ ziri ka pɔ ye li anɛ sida, bɛɛ sɔ' ya'a tʋm 4-5 tʋʋmbɛ'ɛbama buudi wʋsa ka baŋi li yɛla, asɛɛ ka o nɔk bʋnkanɛ ka o zu, bɛɛ filim, bɛɛ pi'ig ka ma' ziri la, bɛɛ o pɔ nɔɔri paam la, lɛbisi tisi li sɔb. Asɛɛ o lɛbis bʋn la ka pɛ'ɛsi o sɔba pʋdigir yinne zin'is anu pɔɔgin. 6 O na mɔr o taal maan na tis maanmaan ka o tis Zugsɔb la. Asɛɛ ka li an pɛrakanɛ ka' dɛŋŋa ka o ligidi zem nwɛnɛ din nar si'em nɛ. 7 Maanmaan la na maal suguru sʋsɔg maannɛ tis Zugsɔb la, ka o na kɛ tʋʋmbɛ'ɛd kanɛ ka o tʋm la taali bas.”Nyu'or maan
8 Ka Zugsɔb yɛl Moses ye o 9 pa'alim Aaron nɛ o biribis nyu'or maan la na an si'em. Nyu'or maan la sʋm ye li kpɛm bɛ maan daka la zug yʋ'ʋŋ hali nie bɛog. Asɛɛ bugum kanɛ bɛ maan daka la zug mɛ kpɛn dit ala. 10 Bɛog ya'a nie maanmaan la na yɛ fuug ka sɔɔn o kurigiŋ kanɛ ka ba zaŋ pien pielsʋŋʋ sɛn la ka keŋ vaae nyu'or maan bugum tampɛligim la daka la zugʋ basi li kpikpɛŋ, 11 ka yʋ'ʋn tiak o fuud la ka nyaan mɔr tampɛligim la yi ban la'asi bɛ zin'isi'a la keŋi bas zin'ikanɛ an maan zin'isʋŋ la kpikpɛŋ. 12 Amaa bugum la na kpɛn dit maan daka la zug saŋa wʋsa. Li pʋ sʋ'ʋm ye li kpiisɛ. Maanmaan la na paasid daad bugum la ni bɛkɛung wʋsa, ka na maan daar wʋsa nyu'or maan la nyu'oe li zug, nɛ taaba la'asʋg maana kpaam la. 13 Baŋim ye bugum la pʋ kpiisid maan daka la zugɔ.
Zʋʋd maan
14 Zʋʋd maan la pa'ala nwana: Aaron biribis la na nɔki li maali tis Zugsɔb la maan daka tuon. 15 Ka maanmaan la na gbin'e zɔm la nu'ukukudug ka li an kisir, la'am nɛ kpaam nɛ tudaar la wʋsa, n nyu'oe maan daka la zug ka li nyuug malisi tis Zugsɔb la. 16 Ka Aaron nɛ o biribis la na di linɛ kpɛlim la, amaa ba na ɔnb bodobodo linɛ pʋ gɛndig danbin la nɛ zin'ikanɛ an kasi la ni. Ba na dii li La'asʋg Fuug Sʋgʋr la zakin. 17 Baŋim ka zɔm kaŋa pʋ maan si'el ka danbin bɛɛ. M nɔki linɛ tis maanmaannib la ka li aan ba pʋʋri yit maan kanɛ ka nidib la tis mam ka li an bugum maan la ni na. Li nwɛnɛ tʋʋmbɛ'ɛd maan nɛ taal maan la, li anɛ kasi hali. 18 Aaron yaas banɛ an dap la na nyaŋi di dikaŋa bɔzugɔ li anɛ ba bʋn ka mam Zugsɔb tisi ba, hali saŋa linɛ ka' bɛnnɛ. Bʋn linɛ si'is dikaŋa na lieb kasi.
19 Ka Zugsɔb yɛl Moses ye, 20 “Daakanɛ ka ba na nɔk malʋŋ kpaam bu'oe niŋ Aaron nɛ o biribis la zug ka ba lieb maanmaannib la, asɛɛ ka ba nɔk zɔmbaanlig kuriba wʋʋ daar wʋsa zʋʋd maannɛ mɔr na, pʋdig zin'is ayi', maal yinne bɛogʋn ka maal yinne zaam. 21 Ba na gɛndig kpaam maali sɛn'. Ba ya'a sɛn' naae ba na zaŋi mɔr na ka pʋdigi li bi'el bi'eli tis Zugsɔb la ka li nyuug malisi tis o. 22 Ka bibanɛ na di'e ba saamnam maanmaan tʋʋma la, asɛɛ ka ba maal ala mɛn. Li anɛ Zugsɔb la bʋn ka li sʋm ye ba nyu'oe li saŋa wʋsa. 23 Maanmaannib la zʋʋd maan nyu'odi wʋsa ka sɔ' pʋ ditta.”
Tʋʋmbɛ'ɛd maan
24 Ka Zugsɔb yɛl Moses ye, 25 “Yɛlim Aaron nɛ o biribis la ye ban na dɔlis si'em nwa maal tʋʋmbɛ'ɛd maan la: Tʋʋmbɛ'ɛd maan la sʋm ye ba kɔdig bʋnkɔnbʋg la Zugsɔb la tuon zin'ikanɛ ka ba kɔtid nyu'or maan la; li anɛ kasi hali. 26 Ka maanmaan kanɛ maali li la na ɔnbi li zin'ikanɛ an kasi la, Fuug Sʋgʋr la zakin. 27 Sɔ' ya'a si'is ni'im kaŋa, asɛɛ ka o lieb man Zugsɔb la bʋn. Ka ziim la ya'a si'is sɔ' fuug on yɛɛgimi li pie zin'ikanɛ an kasi la ni. 28 Ka ya ya'a nɔk tan dʋkʋ dʋg ni'im la naae yanam nwa'am dʋg la. Ya ya'a nɔk kʋntzɛn'ug dʋkʋ dʋg yanam piemi li hali ka li yi. 29 Maanmaannib nɛ ba biribis ma'aa na ɔnb maan kaŋa ni'im bɔzugɔ li anɛ kasi. 30 Amaa mid ka sɔ' ɔnb tʋʋmbɛ'ɛd maan linɛ ka ya mɔri li ziim kpɛn' Fuug Sʋgʋrin la ye ya maal suguru sɔsʋg maan zin'ikanɛ an Kasi Zin'igin la. Asɛɛ ka ya nyu'oe ni'im la wʋsa nɛ bugum.”