Yɛlbanɛ nar tʋʋmbɛ'ɛd maan
5
1 Sɔ' ya'a zan'as ye o kʋ di kasɛt linɛ ka o nyɛ bɛɛ mi' li yɛlaa, o sɔb tʋm tʋʋmbɛ'ɛd ka taal na bɛɛ o zugin. 2 Bɛɛ sɔ' ya'a si'is si'el dinɛ ka' nyainnɛ, wʋʋ bʋnkpiilʋŋ kanɛ an yin bʋnkɔnbʋg bɛɛ sian'arin bʋnkɔnbʋg bɛɛ bʋnvuudir, o sɔb tʋm taal, baa o ya'a la'am zi'. 3 Bɛɛ sɔ' ya'a si'is saal dian'ad buudi wʋsa linɛ na kɛ ka o lieb dian'ad sɔb, hali la'am nɛ on zi' la, o ya'a ti baŋ nya'aŋ, o sɔb tʋm taal. 4 Bɛɛ sɔ' ya'a pʋ gu'usɛ ka pɔ nɔɔri zi'el ye o na tʋm sʋ'ʋm bɛɛ bɛ'ɛd baa o ya'a zi' on maal si'el la, o sɔb ya'a ti baŋ, taal na bɛɛ o zug. 5 Ka sɔ' ya'a baŋ ye o tʋm taal nɛ'ɛnam wʋsa ni, asɛɛ ka o pɛlig o pʋʋgʋ tu'asi o tʋʋmbɛ'ɛd 6 ka mɔr pɛnya'aŋ bɛɛ bʋnya'aŋ na tis Zugsɔb la, ka li an tʋʋmbɛ'ɛd maan; ka maanmaan la na maal suguru sɔsʋg maan o tʋʋmbɛ'ɛd yɛla.7 O sɔb ya'a kʋ nyaŋi paam pɛ'ogɔ, on mɔr sian'adawana ayi', bɛɛ na'adawanbibis ayi' na tis Zugsɔb la, o tʋʋmbɛ'ɛd la zug. Ayinne na an tʋʋmbɛ'ɛd la maan ka ayinne mɛ an nyu'or maan. 8 O na mɔri keŋ maanmaan la san'an, ka o nɔk yinne maal tʋʋmbɛ'ɛd la maan. O na nwɛligi li niŋgɔɔnr amaa ka kʋ fi'igi li zugɔ, 9 ka nɔk tʋʋmbɛ'ɛd maan ziim la bi'ela mis maan daka la lʋga ni, ka kpa'ae dinɛ kpɛlim la bas daka la gbinnin. 10 O yʋ'ʋn na nɔk na'adawan kanɛ kpɛlim la nyu'oe maal nyu'or maan wʋʋ lin nar si'em la. Ala ka maanmaan la na maal suguru sɔsʋg maannɛ o tʋʋmbɛ'ɛd la yɛla ka o paam suguru.
11 Amaa o ya'a kʋ nyaŋi mɔr sian'adawana bɛɛ na'adawana ayi' la naa, on mɔr zɔmbaanlig kuriba yinne na ka li an tʋʋmbɛ'ɛd maan. Din an tʋʋmbɛ'ɛd maan la zug, li pʋ sʋm ka kpaam bɛɛ tudaar gɛndigi lii. 12 O na nɔk zɔm la tis maanmaan la, ka o gbin'e li nu'ukukudug ka li an tiɛnr maan, ka nyu'oe li maan daka la zug wʋʋ nyu'or maan ka ba maannɛ tisid Zugsɔb si'em la. Ka li na an tʋʋmbɛ'ɛd maan. 13 Anwana ka maanmaan la na niŋ ka li pie o tʋʋmbɛ'ɛd banɛ ka o tʋm la bas ka o paam suguru. Zɔm kanɛ kpɛlim la na an maanmaan la bʋn wʋʋ zʋʋd maana an si'em la.
14 Ka Zugsɔb yɛl Moses ye, 15 “Sɔ' ya'a pʋ baŋɛ ka tʋm taal nɛ Zugsɔb la'abanɛ an kasi la, asɛɛ ka o mɔr pɛrakanɛ ka' dɛŋ na ka li na an taal maan. Li sʋm ye kɔnbʋg la ligidi zu'oe paae Wina'am Pʋ'ʋsim Yir ligidi makiri an si'em la. 16 Asɛɛ ka o lɛbis la'abanɛ an kasi la wʋsa, ka zaŋ o sam la pʋdigir yinne zin'is anu pʋʋgin paas pɛraug la zugʋ nɔki tis maanmaan la ka o maal suguru sɔsʋg maan ka Wina'am na kɛɛ o taali bas.
17 “Ka sɔ' ya'a zi' ka tʋm linɛ ka Zugsɔb nɔzi'ela la ye ba da tʋm la ka ti baŋ, o na paam tʋbtɛɛgir. 18 Asɛɛ ka o mɔr pɛrakanɛ ka' dɛŋŋa ka o ligidi zu'oe paae lin nar si'em na tis maanmaan la ka o maal suguru sɔsʋg maan tʋʋmbɛ'ɛd kanɛ ka o pʋ maal pɔn'ɔsim la zug ka Wina'am na bas o taal. 19 Nwa anɛ tʋʋmbɛ'ɛd maan, on tʋm taali tis Zugsɔb la zug.”