Tʋʋmbɛ'ɛd maan
4
1 Ka Zugsɔb yɛl Moses ye, 2 “Yɛlim Israel dim ye sɔ' ya'a tʋm nyɔsig Zugsɔb zi'elʋg ka li ka' o mɛŋ bɔɔdim, yanamɛ na niŋ si'em nwa: 3 Li ya'a anɛ maanmaan kpɛɛm la tʋm bɛ'ɛd ka li kɛ ka taal dɔl nidib la wʋsa, o na tis Zugsɔb la na'arapɔl kanɛ ka' dɛŋŋa. 4 O na nɔk na'araug la tis Zugsɔb la Fuug Sʋgʋr la za'anɔɔrin ka pa'al o nu'ug na'araug la zug ka kɔdigi li tis Zugsɔb la anina. 5 O na bu'oe ziim la mɔri kpɛn' sʋgʋrin la, 6 ka nɔk o nu'ubili tʋm ziim la nii mis nɔɔra ayɔpɔi tis Zugsɔb la fuug linɛ ka ba ya'al Kasi Wʋsa Kasi Zin'ig la nya'aŋ la. 7 Maanmaan kpɛɛm la yʋ'ʋn na nɔk ziim la bi'ela niŋ iila banɛ bɛ maan daka kanɛ ka ba nyu'od bʋnnyubisa li zug, ka li bɛ Zugsɔb tuon sʋgʋrin la. Na'araug la ziim kanɛ kpɛlim la, ba na kpa'ae li niŋ daka kanɛ ka ba nyu'od maana la gbinnin, ka li bɛ Sʋgʋr la za'anɔɔr yiŋ la. 8 Ka o na yis kpaam linɛ bɛ na'araug kanɛ an tʋʋmbɛ'ɛd maan la pʋʋgin la wʋsa, 9 nɛ siyaanini la nɛ kpaam linɛ bɛɛ li ni la wʋsa, ka nwaae sɔɔnr la yis bi'ela, 10 ka nyu'oe li maan daka la zug ka li an maan wʋʋ ban maan na'araug bɛɛ na'anya'aŋ taaba la'asʋg maan si'em la. 11 Amaa na'araug la gbauŋ, nɛ li ni'im banɛ kpɛlim an nɔba nɛ zug nɛ pʋʋgin la'ad nɛ pʋd la wʋsa, 12 asɛɛ ba mɔri lii yi la'asʋg zin'ig la kpikpɛŋ, zin'ikanɛ an maan zin'isʋŋ ka ba kpa'asid tampɛligim la, ka nyu'oe li wʋsa ani.”13 “Li ya'a anɛ Israel dim la tʋm nyɔsig Zugsɔb zi'elʋg ka li ka' ba mɛŋ bɔɔdim, ka ba sɔ'ɔsɔ pʋ baŋi li yɛlaa, li taal dɔl nɛ nidib la wʋsa. 14 Ba ya'a ti baŋ tʋʋmbɛ'ɛd la yɛla, la'asʋg dim la na mɔr na'araugʋ kɛn Zugsɔb tuon Fuug Sʋgʋr la za'anɔɔrin na ka li an tʋʋmbɛ'ɛd maan. 15 Kpɛɛmnam la na pa'ali ba nu'us na'araug la zugin ka kɔdigi li tis Zugsɔb la. 16 Ka maanmaan la na mɔr ziim la bi'ela kpɛn' sʋgʋrin la 17 ka nɔk o nu'ubili tʋm ziim la ni n mis nɔɔra ayɔpɔi tis Zugsɔb la, fuug linɛ ka ba ya'al Kasi Wʋsa Kasi zin'ig la nya'aŋ. 18 Ka lɛn nɔk ziim la bi'ela niŋ iila banɛ bɛ maan daka kanɛ ka ba nyu'od bʋnnyubisa li zug la, ka li bɛ Zugsɔb la tuon, sʋgʋrin la. Na'araug la ziim kanɛ kpɛlim la, ba na kpa'ae li niŋ daka kanɛ ka ba nyu'od maana la gbinnin, ka li bɛ sʋgʋr la za'anɔɔr yiŋ. 19 Ka o na yis kpaam linɛ bɛ na'arakanɛ an tʋʋmbɛ'ɛd maan la pʋʋgin la wʋsa nyu'oe li nyu'or maan daka la zug. 20 O niŋim na'arakaŋa wʋʋ on niŋ na'arakanɛ ka ba nɔki maal tʋʋmbɛ'ɛd maan la si'em la. Maanmaan la na niŋ si'em nwa ka li an suguru sɔsʋg maannɛ tis nidib la ka ba paam suguru. 21 Ka maanmaan la na nɔk dinɛ kpɛlim la yi teŋ la kpikpɛŋ sa nyu'oe wʋʋ maanmaan kpɛɛm tʋʋmbɛ'ɛd maan la nyu'od si'em la. Nwa anɛ tʋʋmbɛ'ɛd maannɛ tis Israel dim la wʋsa.”
22 “Li ya'a anɛ Israel kpɛɛm sɔ' tʋm nyɔsig Zugsɔb zi'elʋg ka li ka' o mɛŋ bɔɔdim, ka li kilim taali dɔl o, 23 o ya'a ti baŋ ye o maal bɛ'ɛd, o na tis maan dinɛ an bʋraug ka ka' dɛŋŋa, 24 ka pa'al o nu'ug bʋʋg la zugin ka kɔdigi li zin'ikanɛ ka ba kɔdigid nyu'or maannɛ tisid Zugsɔb la, ka li an tʋʋmbɛ'ɛd maan. 25 Ka maanmaan la na nɔk o nu'ubili tʋm tʋʋmbɛ'ɛd maan ziim la ni niŋ iila banɛ bɛ daka kanɛ ka ba nyu'od maan la zug, ka kpa'ae ziim la daka la gbinnin, 26 ka na nyu'oe bʋʋg la kpaam wʋsa maan daka la zug, wʋʋ taaba la'asʋg maan kpaam n nyu'od si'em la. Anwana ka maanmaan la na maal suguru sɔsʋg maan ka ba na kɛ dau la taali bas.”
27 “Li ya'a anɛ Israel nidi zi' ka tʋm nyɔsig Zugsɔb la zi'elʋg ka li ka' o mɛŋ bɔɔdim, taal dɔl o nɛ. 28 Amaa o ya'a baŋ ye o tʋm bɛ'ɛd o na mɔr bʋnya'aŋ kanɛ pʋ mɔr dɛŋ na tis tʋʋmbɛ'ɛd la yɛla. 29 O na nɔk o nu'ugi pa'al bʋʋg la zugin ka kɔdigi li zin'ikanɛ ka ba kɔdigid nyu'or maan la. 30 Ka maanmaan la na nɔk o nu'ubili tʋm tʋʋmbɛ'ɛd maan la ziimin niŋ iila banɛ bɛ maan daka kanɛ ka ba nyu'od maan la zug la, ka kpa'ae ziim la daka la gbinnin. 31 O na yis bʋʋg la kpaam wʋsa wʋʋ ban yisid taaba la'asʋg maan kpaam si'em la ka maanmaan la na nyu'oe li maan daka la zug ka li nyuug malisi tis Zugsɔb la. Ala ka maanmaan la na maal suguru sɔsʋg maan ka ba na kɛɛ o taali bas.
32 “Sɔ' ya'a mɔr pɛ'og na ye o maal tʋʋmbɛ'ɛd maan, li sʋm ka li an pɛnya'aŋ kanɛ ka' dɛŋŋa. 33 Ka o na nɔk o nu'ugi pa'al tʋʋmbɛ'ɛd pɛ'og la zugin ka kɔdigi li zin'ikan ka ba kɔdigid nyu'or maan la. 34 Ka maanmaan la na nɔk o nu'ubili tʋm tʋʋmbɛ'ɛd maan ziim la ni niŋ iila banɛ bɛ daka kanɛ ka ba nyu'od maan la zug la, ka kpa'ae ziim la daka la gbinnin. 35 O na yis pɛ'og la kpaam wʋsa wʋʋ ban yisid taaba la'asʋg maan kpaam si'em la ka maanmaan la nɔki li pa'al maan banɛ bɛ daka la zug ka nyu'oe li tis Zugsɔb la. Ala ka maanmaan la na maal suguru sɔsʋg maan ka ba na kɛɛ o taali bas.”